Last updated on November 5th, 2025 at 02:35 pm
ಕುಂದಾಪುರ, ನ. 05: ಕುಂದಾಪುರಗ್ ಕೈತಲ್ದ ತಲ್ಲೂರ್ಡ್ ಅಂಗಾರೆ ಬಯ್ಯಡ್ ಏರೋ ಕೆಂಗುಡೆರ್, ಉಂತಾದಿತ್ತಿನ ಕಾರ್ದ ಗ್ಲಾಸ್ ಪುಡತ್ದ್ 2 ಲಕ್ಷ ರೂಪಾಯಿ ಕಾಸ್ ಕನ್ಡ್ದ್ ಪದ್ರಾಡಾತೆರ್.
ಕೆಂಚನೂರು ನಿವಾಸಿ ಅಂಚೆನೇ ಕಾಂಟ್ರಾಕ್ಟರ್ ಗುಂಡು ಶೆಟ್ಟಿ ಪನ್ಪಿನಾರ್ ತಲ್ಲೂರ್ದ ಬ್ಯಾಂಕ್ರ್ದ್ 2 ಲಕ್ಷ ರೂ. ಡ್ರಾ ಮಲ್ತ್ದ್ ತನ್ನ ಕಾರ್ದುಲಯಿ ಕಾಸ್ನ್ ದೀದಿತ್ತೆರ್. ಬೊಕ್ಕ ತಲ್ಲೂರು ಪೇಂಟೆದ ಕೈತಲ್ದ ರೆಸಿಡೆನ್ಸಿಯಲ್ ಕಟ್ವಾನೊದ ಎದುರು ಕಾರ್ ಉಂತಾದ್ ತನ್ನ ಬಾಡಾಯಿದ ಇಲ್ಲಗ್ ಪೋತೆರ್. ಸುಮಾರ್ 10-15 ನಿಮಿಷ ಕರಿದ್ ಪಿರ ಬನ್ನಗ, ಕಾರ್ದ ಗ್ಲಾಸ್ ಪುಡದಿತ್ತ್ದ್ ಕಾಸ್ ಕಾಣೆ ಆತಿನ ತೋಜಿದ್ ಬೈದ್ಂಡ್.
ವರದಿಲೆನ ಪ್ರಕಾರ, ಕೆಂಗುಡೆರ್ ಕಾರ್ದ ಒಂಜಿ ಮೆಯಿತ ಗ್ಲಾಸ್ ಪುಡತ್ದ್ ಡ್ಯಾಶ್ಬೋರ್ಡ್ಡ್ ಇತ್ತಿನ ಕಾಸ್ನ್ ಕನ್ಡ್ದೆರ್. ತಲ್ಲೂರು ಜಂಕ್ಷನ್ ಕೈತಲ್ ಎಚ್ಚ ಜನೊಕುಲು ಇಪ್ಪುನ ಜಾಗೆಡೇ ಈ ಕಲ್ವೆ ನಡತ್ದ್ಂಡ್, ನೆಟೆ ಅಪಾರ್ಟ್ಮೆಂಟ್ಲು, ಕಮರ್ಷಿಯಲ್ ಕಟ್ವಾನೊಲು ಬೊಕ್ಕ ಮುಟ್ಟಡೇ ಬಸ್ ಬೊಕ್ಕ ರಿಕ್ಷಾ ಉಂತಡೆಲಾ ಉಂಡು. ಇಂಚಿಞಯನ ಜಾಗೆಡ್ ಪಟ್ಟಪಗೆಲ್ಡೇ ಈ ನಡಕೆ ನಡತಿತ್ತ್ದ್, ನೆಟೆದಕ್ಲೆಗ್ ಮಂಡೆಬೆಚ್ಚ ಉಂಡು ಮಲ್ದ್ಂಡ್.
ಕೆಂಗುಡೆರ್ ಗುಂಡು ಶೆಟ್ಟಿ ಮೇರ್ ಬ್ಯಾಂಕ್ರ್ದ್ ಕಾಸ್ ಡ್ರಾ ಮಲ್ದಿನೆನ್ ತೆರಿದ್ ಬೆರಿಯೆ ಬತ್ತ್ದ್ ಕನ್ಡುದುಪ್ಪೆರ್ ಪನ್ದ್ ಅಂದಾಜಿ ಮಲ್ದೆರ್
ಕುಂದಾಪುರ ಎಸ್ಐ ನಂಜಾ ನಾಯಕ್ ಬೊಕ್ಕ ಆರೆನ ಕೂಟ ಜಾಗೆಗ್ ಬತ್ತ್ದ್ ಒಲವು ಒಟ್ಟು ಮಲ್ತ್ದ್, ಜಡ್ತೆ ಮಲ್ತೊಂದುಲ್ಲೆರ್. ಕುಂದಾಪುರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.