Last updated on November 11th, 2025 at 09:17 am
ಪೆರಿಯಡ್ಕ, ನ, 11: ಆಣ್ ಒರಿ ತನ್ನ ದೋಸ್ತಿನ ಒಟ್ಟುಗು ಸುದೆಟ್ ಮೀಯೆರೆ ಪೋದುಪ್ಪುನಗ ನೀರ್ಡ್ ಮುರ್ಕ್ದ್ ತೀರ್ದಿನ ನಡಕೆ ಪೆರ್ಡೂರು ಆಲಂಗಾರ್ ದ ಕೈತಲ್ ನಡತ್ದ್ಂಡ್. ದೋಸ್ತಿ ಸುದೆಟ್ ಮುರ್ಕ್ದ್ ತೀರ್ದಿತ್ತ್ಂಡಲಾ ಒಟ್ಟುಗಿತ್ತಿನ ಆಣ್ ವಿಷಯ ತೆರಿಪಾವಂದೆ ಮುಚ್ಚಿದ್ ದೀತೆ ಪನ್ದ್ ವರದಿ ಆತ್ಂಡ್.
ತೀರ್ದಿನ ಆಣನ್ ಪೆರ್ಡೂರು ಆಲಂಗಾರ್ ನಿವಾಸಿ ಶ್ರೀಶಾನ್ ಶೆಟ್ಟಿ(15) ಪನ್ದ್ ಗುರ್ತ ಪತ್ತ್ದೆರ್. ಐತಾರ ಮಧ್ಯಾಹ್ನ ದ ಪೊರ್ತು ಶ್ರೀಶಾನ್ ಶೆಟ್ಟಿ ತನ್ನ ಬರಿತಿಲ್ಲದ ದೋಸ್ತಿನ ಒಟ್ಟುಗು ಮೀಂದ್ಯೆರ ಪೋತೆ. ಸುದೆಟ್ ಮೀಂದೊಂದಿತ್ತಿನ ಶ್ರೀಶಾನ್ ಶೆಟ್ಟಿ ಅಕಸ್ಮಿಕವಾದ್ ನೀರ್ಡ್ ಮುರ್ಕ್ದ್ ತೀರ್ದೆ ಪನ್ದ್ ತೆರಿದ್ ಬೈದ್ಂಡ್. ಆಂಡ ಬರಿತಿಲ್ಲದ ಆಣ್ ಈ ವಿಚಾರೊನು ಇಲ್ಲಡ್ ಪನಂದೆ ಮುಚ್ಚಿದ್ ದೀತೆ, ಶ್ರೀಶಾನ್ ನ ಇಲ್ಲದಕುಲು ನಾಪತ್ತೆ ಆತೆ ಪನ್ದ್ ಏತ್ ನಾಡ್ಂಡಲಾ ತಿಕ್ಕಂದೆ ಇಪ್ಪುನಗ, ಪೊಲೀಸೆರೆಗ್ ಒಲವು ಕೊರ್ತೆರ್, ಪೊಲೀಸೆರ್ ಶ್ರೀಶಾನ್ ನ ದೋಸ್ತಿನ್ ವಿಚಾರಿಪುನಗ ಆಯೆ ನಡತಿ ಸಂಗತಿನ್ ವಿವರಿತ್ದೆ. ಸೋಮಾರ ಬಯ್ಯ 5ಗಂಟೆದ ಅಂದಾಜಿಗ್ ಸುದೆಟ್ ಪುನ ತಿಕ್ಕ್ದ್ಂಡ್ ಪನ್ದ್ ತೆರಿದ್ ಬೈದ್ಂಡ್.
ಶ್ರೀಶಾಂತ್ ಶೆಟ್ಟಿ ಪೆರಿಯಡ್ಕ ಕರ್ನಾಟಕ ಪಬ್ಲಿಕ್ ಸ್ಕೂಲ್ಡ್ 10ನೇ ಕ್ಲಾಸ್ ಓದೊಂದಿತ್ತ್ದ್, ಈ ಬಗೆಟ್ ಪೆರಿಯಡ್ಕ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.