Last updated on November 13th, 2025 at 04:00 pm
ಒಡಿಪು: ನೇಜಾರ್ಡ್ ನಾಲ್ವೆರೆನ್ ಕೆರ್ತಿನ ಪ್ರಕರಣೊಗು ವರ್ಸ ರಡ್ಡ್ ಕರೀಂಡಲಾ ತೀರ್ದಿನಕ್ಲೆನ ಇಲ್ಲದಕ್ಲೆಗ್ ನನಲ ಸಮ ನ್ಯಾಯ ತಿಕ್ಕ್ದಿಜಿ. ರಡ್ಡ್ ವರ್ಸೊರ್ದಿಂಚಿ ಈ ಪ್ರಕರಣ ನ್ಯಾಯಂತಡೆಡ್ ವಿಚಾರಣೆದ ನಿಲವುಡೇ ಉಂಡು.
ಮಲ್ಪೆ ಸ್ಟೇಶನ್ ಸೀಮೆದ ನೇಜಾರ್ಡ್ 2023ತ ನ.12 ತಾನಿ ಪಟ್ಟಪಗೆಲೇ ಅಪ್ಪೆ ಬೊಕ್ಕ ಮೂವೆರ್ ಜೋಕುಲೆನ್ ಕೆರ್ದಿತ್ತೆರ್. ಈ ಪ್ರಕರಣೊದ ಬಗೆಟ್ ಒಡಿಪುದ ರಡ್ಡನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆಡ್ ವಿಚಾರಣೆ ನಡತೊಂದುಂಡು.
ನಡಕೆ ನಡತಿನ ಎಂಚ?
ಕುಡ್ಲದ ವಿಮಾನ ಉಂತಡೆಡ್ ಏರ್ ಇಂಡಿಯಾ ಎಕ್ಸ್ಪ್ರೆಸ್ ಸಂಸ್ಥೆಡ್ ಗಗನಸಖಿಯಾದ್ ಬೇಲೆ ಮಲ್ತೊಂದಿತ್ತಿನ ನೇಜಾರ್ದ ನೂರ್ ಮುಹಮ್ಮದ್ ಮೆರೆನ ಮಗಲ್ ಐನಾಝ್ (21)ನ ಮಿತ್ತ್ ವ್ಯಾಮೋಹಡ್ ಅವೇ ಸಂಸ್ಥೆಡ್ ಬೇಲೆ ಮಲ್ತೊಂದಿತ್ತಿನ ಮಹಾರಾಷ್ಟ್ರ ಸಾಂಗ್ಲಿ ಮೂಲೊದ ಪ್ರವೀಣ್ ಪ್ರದೀಪ್ ಚೌಗುಲೆ(40) ನ.12ತಾನಿ ಕೆರ್ಪುನ ಯೋಜನೆ ಮಲ್ತಿತ್ತೆ. ಅಂಚೆನೇ ಒವ್ವೇ ಪುರಾಪು ತಿಕ್ಕಂದಿಲೆಕ ತನ್ನ ಕಾರ್ನ್ ಪೆಜಮಾಡಿ ಟೋಲ್ಗ್ ದುಂಬೇ ಉಂತಾದ್, ರಿಕ್ಷಾ, ಬಸ್, ಬೈಕ್ಡ್ ನೇಜಾರ್ ಎತ್ತ್ದೆ. ಅಲ್ಪ ಕಾಂಡೆ 9ದ ಅಂದಾಜಿಗ್ ಐನಾಝ್ನ ಇಲ್ಲಗ್ ಪೊಗ್ಗಿನ ಆಯೆ ಐನಾಝ್ ಬೊಕ್ಕ ಅಡ್ಡ ಬತ್ತಿನ ಆಲೆನ ಅಪ್ಪೆ ಹಸೀನಾ(48), ಪಲಿ ಅಫ್ಘಾನ್(23) ಬೊಕ್ಕ ಮೆಗ್ಯೆ ಆಸೀಮ್ (13)ನ್ ಬರ್ಬರವಾದ್ ಬೀಸತ್ತಿ ಪಾಡ್ದ್ ಕೆರ್ದ್ ಪದ್ರಾಡಾದಿತ್ತೆ.
ಇಲ್ಲಡ್ ಇತ್ತಿನ ಹಸೀನಾನ ಮಾಮಿ ಹಾಜಿರಾ(80) ಬೀಸತ್ತಿ ಬೂರ್ನ್ಡಲಾ ಪೆರಣಗ್ ದಾಲ ಆವಂದೆ ಬಚಾವಾದಿತ್ತೆರ್ . ಈ ಬಗೆಟ್ ಮಲ್ಪೆ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್. ಜಡ್ತೆ ಮಲ್ತಿನ ಪೊಲೀಸೆರ್ ನ.14ತಾನಿ ರಾಯಭಾಗ್ ತಾಲೂಕ್ದ ಕುಡಚಿ ಪೋಲೀಸ್ ಸ್ಟೇಷನ್ ಸೀಮೆಡ್ ಆರೋಪಿನ್ ಕೈದ್ ಮಲ್ತಿತ್ತೆರ್.
ಪ್ರಕರಣೊದ ಜಡ್ತೆ ಮಲ್ತಿನ ಪೊಲೀಸೆರ್ ಒಟ್ಟು 15 ಸಂಪುಟೊಡು 2202 ಪುಟೊತ ದೋಷಾರೋಪಣ ಪಟ್ಟಿನ್ ನ್ಯಾಯಂತಡೆಗ್ ಸಂದಾದೆರ್. 244 ಸಾಕ್ಷ್ಯೊಲೆನ್ ಒಟ್ಟು ಮಲ್ತಿತ್ತೆರ್.
ಇತ್ತೆ ಮಾತಾ ನಿಲವುಲು ಮುಗಿದ್, ಸಾಕ್ಷಿಲೆನ ವಿಚಾರಣೆ ನಡತೊಂದುಂಡು. ಪ್ರಕರಣೊದ ದೂರುದಾರೆದಿ ಐಫಾ, ಆರೆನ ಅಪ್ಪೆ ಶಾಹಿನ್ ಬೀಬಿ ಬೊಕ್ಕ ರಿಕ್ಷಾ ಡ್ರೈವರ್ ಶ್ಯಾಮ್ ಮೊಕಲ್ನ ಮುಖ್ಯ ವಿಚಾರಣೆ ಬೊಕ್ಕ ಪಾಟಿ ಸವಾಲ್ ಮುಗಿದಿತ್ತ್ದ್, ಒಟ್ಟು ಐನ್ ಸಾಕ್ಷಿಲೆನ ವಿಚಾರಣೆ ಮುಗಿದ್ಂಡ್.
ನ.14 ಬೊಕ್ಕ ನ.15ತಾನಿ ಒಟ್ಟು ಎಣ್ಮ ಜನೊತ ವಿಚಾರಣೆಗ್ ದಿನ ಗೊತ್ತುಮಲ್ದೆರ್. ನ.15ತಾನಿ ತೀರ್ದಿನ ಕುಟುಮೊದ ಎಜಮಾನೆ ನೂರ್ ಮುಹಮ್ಮದ್ ಬೊಕ್ಕ ಆರೆನ ಮಗೆ ಸಾಕ್ಷ್ಯ ಪನರೆ ಉಲ್ಲೆರ್. ಸುರೂಟು ಆರೋಪಿ ಹೈಕೋರ್ಟ್ ತಡೆಯಾಜ್ಞೆ ಕನತಿನೆರ್ದಾವರ ಅಂಚೆನೇ ನ್ಯಾಯವಾದಿಲೆನ ಪಗತೆರ್ದಾವರ ವಿಚಾರಣೆ ಕಡೆಸ್ಸ್ದಿತ್ತ್ಂಡ್. ಇತ್ತೆ ಸಮ ನಡತೊಂದುಂಡು ಪನ್ದ್ ವಿಶೇಷ ಸರಕಾರಿ ಅಭಿಯೋಜಕೆ ಶಿವಪ್ರಸಾದ್ ಆಳ್ವೆರ್ ತೆರಿಪಾದೆರ್.