Last updated on November 15th, 2025 at 09:15 am
ಶ್ರೀನಗರ, ನ. 15: ಜಮ್ಮು ಬೊಕ್ಕ ಕಾಶ್ಮೀರದ ಶ್ರೀನಗರದ ನೌಗಾಮ್ ಪೊಲೀಸ್ ಸ್ಟೇಶನ್ಡ್ ಶುಕ್ರವಾರ ರಾತ್ರೆ ಭಾರಿ ಮಲ್ಲ ಸ್ಫೋಟ ನಡತ್ದ್ಂಡ್. ಹರಿಯಾಣದ ಫರಿದಾಬಾದ್ಡ್ ವಶೊಕು ಗೆತೊಂದಿನ ಸ್ಫೋಟಕ ಸೊತ್ತುಲೆನ ಸ್ಯಾಂಪಲ್ ಒಟ್ಟುಮಲ್ತ್ ದೀನಲ್ಪ ಆಕಸ್ಮಿಕ ಸ್ಫೋಟ ನಡತ್ದ್ 9 ಜನ ತೀರ್ದೆರ್ ಅಂಚೆನೇ 27 ರ್ದ್ ಎಚ್ಚ ಜನೊಕ್ಲೆಗ್ ಗಡಿಕುಲಾತ ಪನ್ದ್ ಮೂಲೊಲು ತೆರಿಪಾದ. ಸ್ಫೋಟದ ಬರಸ್ಗ್ ಪೊಲೀಸ್ ಸ್ಟೇಶನ್ದ ಉಲಯಿರ್ದ್ ಮಲ್ಲೆಟ್ ಪುಗೆ ಬೊಕ್ಕ ಸೂತ ಎರಿ ಪಿದಯಿ ಬರ್ಪುನವು ಸಿಸಿಟಿವಿಡ್ ಕೈದಾತ. ಗಡಿಕುಲಾತಿನಕ್ಲೆನ್ ಅಪಗನೇ ಆಸ್ಪತ್ರೆಗ್ ಲೆತೊಂದು ಪೋತೆರ್.
ದೆಲ್ಲಿದ ಕೆಂಪು ಕೋಟೆ ಕೈತಲ್ ಕಾರ್ ಬಾಂಬ್ ಸ್ಫೋಟ ನಡತಿನ ಒಂತೆ ದಿನೊಟೇ ಇತ್ತೆ ಶ್ರೀನಗರಡ್ಲಾ ಸ್ಫೋಟ ನಡತ್ದ್ಂಡ್. ದೆಲ್ಲಿ ಸ್ಫೋಟಡ್ ಒಟ್ಟು 13 ಜನ ತೀರ್ದಿತ್ತೆರ್.
ದೆಹಲಿ ಸ್ಫೋಟಗ್ಲಾ ಈ ಸ್ಫೋಟಗ್ಲಾ ಉಂಡು ಲಿಂಕ್!
ಕೈದಾತಿನ ಉಗ್ರೆ, ಡಾಕ್ಟರ್ ಮುಜಮ್ಮಿಲ್ ಗನೈ ನ ಬಾಡಾಯಿದಿಲ್ಲರ್ದ್ ವಶೊಕು ಗೆತೊಂದಿನ 360 ಕೆಜಿದಾತ್ ಸ್ಫೋಟಕೊಲೆಡ್ ಒಂತೆನ್ ಜಡ್ತೆಗ್ ಬೋಡಾದ್ ಸ್ಯಾಂಪಲ್ ಆದ್ ಸ್ಟೇಶನ್ಡ್ ದೀದಿತ್ತೆರ್ ಪನ್ದ್ ಅಧಿಕಾರಿಲು ತೆರಿಪಾದೆರ್. ಐಕುಲೆರ್ದೇ ಸ್ಫೋಟ ನಡತ್ದ್ಂಡ್. ಜಾಗೆರ್ದ್ ಪುನೊಕ್ಲೆನ್ ಪಿದಯಿ ದೆತ್ತ್ದಿತ್ತ್ದ್, ತೀರ್ದಿನಕ್ಲೆನ ಗುರ್ತ ಪತ್ತುನ ಬೇಲೆ ನಡತೊಂದುಂಡು.
ಪೊಲೀಸ್ ಸ್ಟೇಶನ್ಗ್ ಸ್ಫೋಟಕ ಕನತಿನ ದಾಯೆ?
ಉಗ್ರನ ಇಲ್ಲರ್ದ್ ವಶೊಕು ಗೆತೊಂದಿನ ಕೆಲ ಸ್ಫೋಟಕೊಲೆನ್ ಪೊಲೀಸ್ ವಿಧಿವಿಜ್ಞಾನ ಪ್ರಯೋಗಾಲಯಡ್ ದೀದಿತ್ತೆರ್. 360 ಕೆಜಿ ದಾತ್ ಸ್ಫೋಟಕೊಲೆಡ್ ಎಚ್ಚಿನೆನ್ ಭಯೋತ್ಪಾದಕ ಘಟಕೊದ ವಿರುದ್ಧ ಎಫ್ಐಆರ್ ದಾಕಲ್ತಿನ ಪೊಲೀಸ್ ಸ್ಟೇಶನ್ಡ್ ದೀದಿತ್ತೆರ್. ಅಕ್ಟೋಬರ್ ಡ್ ನೌಗಾಮ್ದ ಬನ್ಪೋರಾಡ್ ಗೋಡೆಲೆನ ಮಿತ್ತ್ ಭಯೋತ್ಪಾದಕ ಪೋಸ್ಟರ್ಲೆನ್ ಪೊಲೀಸೆರ್ ಬೊಕ್ಕ ಭದ್ರತಾ ಪಡೆಕುಲು ನಾಡ್ ಪತ್ತಿ ಬೊಕ್ಕ ಇಡೀ ಪ್ಲಾನಿಂಗ್ ರಟ್ಟಾದಿತ್ತ್ಂಡ್. ಈ ನಡಕೆನ್ ದೇಶೊದ ಭದ್ರತೆಗ್ ಗಾತಿದ ಪೆಟ್ಟ್ ಪನ್ದ್ ಪರಿಗಣಿತ್ದ್, ಶ್ರೀನಗರ ಪೊಲೀಸೆರ್ ಅಕ್ಟೋಬರ್ 19 ದನಿ ಪ್ರಕರಣ ದಾಕಲ್ತೊಂದು ಜಡ್ತೆಗ್ ಕೂಟ ಉಂಡು ಮಲ್ದೆರ್. ಜಡ್ತೆ ನಡತ್ದ್ ಉಗ್ರೆರೆ ಮಲ್ಲ ಪಟ್ಟ್ನ್ ಪತ್ತ್ದೆರ್. ಆ ಪೊರ್ತುಡೇ ಕೆಂಪುಕೋಟೆ ದ ಸ್ಫೋಟ ಲಾ ನಡತ್ದ್ಂಡ್.