Last updated on November 20th, 2025 at 09:37 am
ಬಂಟ್ವಾಳ, ನ. 20: ಬಿ.ಸಿ.ರೋಡ್ಡ್ ಇಪ್ಪುನ ಕೃಷ್ಣಕುಮಾರ್ ಸೋಮಯಾಜಿ ಮೇರೇನ ಸೋಮಯಾಜಿ ಟೆಕ್ಸ್ ಟೆಕ್ಸ್ಟೈಲ್ಸ್ಡ್ ಸೇಲ್ಸ್ವುಮನ್ ಆದ್ ಬೇಲೆ ಮಲ್ತೊಂದು ಇಪ್ಪುನ ನಮಿತಾ ಮೇರ್ ದನಿಕ್ ಒರ್ತಿ ಪೊಂಜೊವು ಬೀಸತ್ತಿ ಪಾಡ್ದಿನ ಬಗೆಟ್ ಒಯಿಲ್ ಬರೆಪಾದೆರ್.
ಒಯಿಲ್ದ ಪ್ರಕಾರ, ನವೆಂಬರ್ 19 ದಾನಿ ಬಯ್ಯಡ್ 7 ಗಂಟೆದ ಅಂದಾಜಿಗ್ ದೂರುದಾರೆದಿ ಬೊಕ್ಕ ಅಂಗಡಿದ ದನಿ ಕೃಷ್ಣಕುಮಾರ್ ಸೋಮಯಾಜಿ ಅಂಗಡಿಡ್ ಇಪ್ಪುನಗ ಬುರ್ಖಾ ಪಾಡೊಂದಿನ ಪೊಂಜೊವು ಒರ್ತಿ ಬತ್ತ್ದ್ ಕೃಷ್ಣಕುಮಾರ್ರೆಗ್ ಬೀಸತ್ತಿ ಪಾಡ್ದೆರ್.
ಕೃಷ್ಣಕುಮಾರ್ ಬಲಿಪೆರೆ ತೂನಗ, ದೂರುದಾರೆದಿ ಆರೆನ ರಿಕ್ಷಾಡ್ ಮುಟ್ಟದ ಆಸ್ಪತ್ರೆಗ್ ಲೆತೊಂದು ಪೋತೆರ್, ಅಲ್ಪ ಆರೆಗ್ ಪ್ರಾಥಮಿಕ ಮರ್ದ್ ಕೊರ್ತೆರ್. ಬೊಕ್ಕ ಆರೆನ್ ಕುಡ್ಲದ ಎಜೆ ಆಸ್ಪತ್ರೆಗ್ ಲೆತೊಂದು ಪೋದಿತ್ತ್ದ್, ಐಸಿಯು ಡ್ ಉಲ್ಲೆರ್. ಅಲ್ಪ ಆರೆಗ್ ಮರ್ದ್ ನಡತೊಂದಿತ್ತ್ದ್, ಒವ್ವೇ ಪಡಾಯಿದಾಂತೆ ಬಚಾವಾತೆರ್.
ಹಲ್ಲೆ ಮಲ್ದಿನ ಪೊಂಜೊವುನು ಕೃಷ್ಣಕುಮಾರ್ ರೆನ ಬೊಡೆದಿ ಜ್ಯೋತಿ ಕೆ.ಟಿ. ಪನ್ದ್ ಗುರ್ತ ಪತ್ತ್ದೆರ್. ಜ್ಯೋತಿ ದುಂಬು ಅಂಗಡಿಗ್ ಬತ್ತ್ದ್ ಕೆರ್ಪೆ ಪನ್ದ್ ಪೋಡಿಕಟ್ಟಾದಿತ್ತೆರ್ ಪನ್ದ್ ಒಯಿಲ್ಡ್ ತೆರಿಪಾದೆರ್. ದಂಪತಿಲೆನ ನಡುಟು ಕೌಟುಂಬಿಕ ಕೊಲಲೊಲು ನಡತೊಂದೇ ಇಪ್ಪೆದ ಅಂಚೆನೇ ಈ ಪಗೆಟೇ, ಜ್ಯೋತಿ ಕೃಷ್ಣಕುಮಾರ್ ರೆನ್ ಬೀಸತ್ತಿ ಪಾಡ್ದ್ ಕೆರ್ಯೆರ ತೂತೆರ್ ಪನ್ದ್ ಎಂದು ಆರೋಪ ಮಲ್ತ್ದೆರ್.
ಒಯಿಲ್ದ ಆಧಾರೊಡು, ಬಂಟ್ವಾಳ ನಗರ ಪೊಲೀಸೆರ್ ಅಪರಾಧ ಸಂಖ್ಯೆ 131/2025, ಸೆಕ್ಷನ್ 118(1), 118(2), 351(3), 109 ಆಫ್ ಬಿಎನ್ಎಸ್-2023, ಬೊಕ್ಕ ಸೆಕ್ಷನ್ 2(1)(ಸಿ), 27 ಆಫ್ ಇಂಡಿಯನ್ ಆರ್ಮ್ಸ್ ಆಕ್ಟ್-1959 ಅಡಿಟ್ ಪ್ರಕರಣ ದಾಕಲ್ತೊಂದೆರ್. ಜಡ್ತೆ ಮಲ್ತೊಂದುಲ್ಲೆರ್.