Last updated on November 25th, 2025 at 08:37 am
ಢಾಕಾ, ನ. 25: ಭಾರತೊದ ಪೊಂಜೊವುಲೆನ ಕೂಟ ರಡ್ಡನೇ ಸರ್ತಿ ಕಬಡ್ಡಿ ವಿಶ್ವಕಪ್ ಗೆಂದ್ದ್ಂಡ್. ಸೋಮಾರ ಬಾಂಗ್ಲಾದೇಶೊದ ಢಾಕಾ ಡ್ ನಡತಿನ 2025ತ ಮಹಿಳಾ ಕಬಡ್ಡಿ ವಿಶ್ವಕಪ್ ಟೂರ್ನಿಡ್ ಚೈನೀಸ್ ತೈಪೆ ಕೂಟೊನು 35-28 ಪಾಯಿಂಟ್ಡ್ ಸೋಪಾದ್ ಭಾರತ ಗೆಲ್ಮೆನ್ ಸಾದಿತ್ದ್ಂಡ್.
ಈ ಮುಕೇನ ಭಾರತೀಯ ನಾರಿಯೆರ್ ಬೆರಿಬೆರಿ ರಡ್ಡನೇ ಸರ್ತಿ ವಿಶ್ವಕಪ್ ಗೆಂದ್ದೆರ್. 2012ಟ್ ಬಿಹಾರಡ್ ಕರಿನ ಸರ್ತಿದ ವಿಶ್ವಕಪ್ ಗೊಬ್ಬು ನಡತಿತ್ತ್ಂಡ್. ಅವು ಆಯಿ ಬೊಕ್ಕ 13 ವರ್ಸ ಕರಿದ್ ರಡ್ಡನೇ ಆವೃತ್ತಿದ ಮಹಿಳಾ ವಿಶ್ವಕಪ್ ಟೂರ್ನಿ ಅಟ್ಟನೆ ಆದಿತ್ತ್ಂಡ್. ಕಡೀರ ಆವೃತ್ತಿಡ್ಲಾ ಭಾರತ ಚಾಂಪಿಯನ್ ಆದಿತ್ತ್ಂಡ್.
11 ದೇಶೊಲು ಪಾಲ್ಪಡೆತಿನ ಪಂದ್ಯಾವಳಿಡ್ ಭಾರತ ಗೆಂದ್ದ್ಂಡ್. ಪೊಣ್ಣು-ಪೊಂಜೊವುಲೆನ ಸಾದಗೊಗು ಪ್ರಧಾನಿ ನರೇಂದ್ರ ಮೋದಿ, ಗೃಹ ಸಚಿವೆ ಅಮಿತ್ ಶಾ ಸೇರ್ದ್ ಪಾಕ ಜನ ಎಡ್ಡೆಪ್ಪು ಬಯಕ್ದೆರ್. ಭಾರತ 33–21ತ ಅಂತರೊಡು ಇರಾನ್ ನ್ ಸೋಪಾದ್ ಫೈನಲ್ಗ್ ಬತ್ತಿತ್ತ್ಂಡ್, ಚೈನೀಸ್ ತೈಪೆ ಸೆಮಿಫೈನಲ್ಡ್ ಬಾಂಗ್ಲಾದೇಶೊನು 25-18 ಅಂತರೊಡು ಸೋಪಾದ್ ಫೈನಲ್ಗ್ ಎತ್ತ್ದಿತ್ತ್ಂಡ್.
ಭಾರತೀಯ ಕಬಡ್ಡಿ ಕೂಟೊಡು ಕುಡ್ಲದ ಜವನ್ದಿ ಧನಲಕ್ಷ್ಮೀ ಪೂಜಾರಿ ಇತ್ತೆರ್. ಈ ಮುಕೇನ ತುಳುನಾಡ್ಗ್ ಪೆರ್ಮೆ ಕನತ್ದೆರ್. ಮೇರ್ ತೊರ್ತಲ್ ಇಡ್ಯಾ ನಿವಾಸಿ ನಾರಾಯಣ ಪೂಜಾರಿ ಬೊಕ್ಕ ಶಶಿಕಲಾ ಮೊಕಲೆನ ಮಗಲ್.