Last updated on December 5th, 2025 at 01:20 pm
ಕುಡ್ಲ, ಡಿ. 05: ಒಡಿಪು ಶ್ರೀಕೃಷ್ಣ ಮಠೊತ ಗೀತೋತ್ಸವಗ್ ಬರ್ಯೆರ ಕುಡ್ಲ ವಿಮಾನ ಉಂತಡೆಗ್ ಬತ್ತಿನ ಮೋದಿಯೆರೆನ್ ಎದುಕೊನುನ ಪೊರ್ತುಡು ಮಾಮಲ್ಲ ಭದ್ರತಾ ಲೋಪ ಆತಿನ ವರದಿ ಆತ್ಂಡ್.
ನವೆಂಬರ್ 28 ಗ್ ಒಡಿಪು ಶ್ರೀಕೃಷ್ಣ ಮಠೊಟು ನಡತೊಂದುಪ್ಪುನ ಗೀತೋತ್ಸವೊಡು ಪಾಲ್ಪಡೆಯೆರೆ ಪ್ರಧಾನಿ ನರೇಂದ್ರ ಮೋದಿಯೆರ್ ಕುಡ್ಲ ವಿಮಾನ ಉಂತಡೆಗ್ ಬತ್ತಿತ್ತೆರ್. ಆಂಡ ಅಲ್ಪ ಆರೆನ್ ಎದುಕೊನರೆ ಬತ್ತಿನ ಜನೊಕ್ಲೆಡ್ ಒರ್ತಿನ್ ಕಲು ಪನ್ಡ್ದ್ ಲೆಪ್ಪುಡಾದೆರ್ ಪನ್ದ್ ಇತ್ತೆ ಆರೋಪ ಕೇನ್ದ್ ಬರೊಂದುಂಡು. ರಾಜ್ಯ ಸರ್ಕಾರ ಬೊಕ್ಕ ಕೇಂದ್ರ ಸರ್ಕಾರೊದ ನಡುಟು ಸಮನ್ವಯ ಮಲ್ಪುನ ಅಧಿಕಾರಿಲೆನ ಪ್ರಕಾರ ಉಂದೊಂಜಿ ಮಾಮಲ್ಲ ಭದ್ರತಾ ಲೋಪ ಪನ್ದ್ BLRPost ವರದಿ ಮಲ್ತ್ದ್ಂಡ್.
ಮೋದಿಯೆರೆನ್ ಎದುಕೊನರೆ ಬತ್ತಿನ ಜನೊಕುಲೆ ನಡುಟು MLC ಕಿಶೋರ್ ಕುಮಾರ್ ಬೊಟ್ಯಾಡಿಯೆರೆನ ಬೊಡೆದಿ, ಪ್ರೀತಿ ದಾಸು ಭಂಡಾರಿಲಾ ಇತ್ತೆರ್. ಮೇರೆನ್ ಪಕ್ಷೊದ ಒವ್ವೇ ಜವಾಬ್ದಾರಿ ಇಜ್ಜಿಂಡಲಾ ಜಿಲ್ಲಾ ಮಹಿಳಾ ಮೋರ್ಚಾದ ಉಪಾಧ್ಯಕ್ಷೆದಿ ಪನ್ಡ್ದ್ ಕಲು ದಾಕಲೆಲೆನ್ ಕೊರ್ದು ಮೋದಿಯೆರೆನ್ ಎದುಕೊನರೆ ಲೆತ್ತ್ದೆರ್ ಪನ್ದ್ ಆರೋಪ ಕೇನ್ದ್ ಬತ್ತ್ದ್ಂಡ್.
ಕಿಶೋರ್ ಕುಮಾರ್ ಬೊಟ್ಯಾಡಿಯೆರ್ 2024ಟ್ ಎಲೆಕ್ಷನ್ದಪಗ ಸಂದಾದಿನ ಅಫಿಡವಿಟ್ಡ್ ಬೊಡೆದಿ ಪ್ರೀತಿ ದಾಸು ಭಂಡಾರಿನ್ ಜಿ. ಎಮ್. ಅಮ್ಯೂಸ್ಮೆಂಟ್ ಆಂಡ್ ಲೀಷರ್ ಪಾರ್ಕ್ದ ಉಪಾಧ್ಯಕ್ಷೆದಿ ಪನ್ದ್ ತೂಪಾದೆರ್ ಅತ್ತಂದೆ ಪಕ್ಷೊದ ಜವಾಬ್ದಾರಿದ ಉಲ್ಲೇಖ ಮಲ್ದಿಜೆರ್.
ಸಾಮಾಜಿಕ ಬಲೆತ್ತಾನೊಡು ಈ ಬಗೆಟ್ ಚರ್ಚೆ ಸುರು ಆದಿತ್ತ್ದ್ ಪರ-ವಿರೋಧ ಕೇನ್ದ್ ಬರೊಂದುಂಡು. ಸಾಮಾನ್ಯ ಕಾರ್ಯಕರ್ತೆರ್ ಎದುಕೊನರೆ ಪೋಯೆರ ಬಲ್ಲಿಯಾ ಪನ್ದ್ ಒಂಜಿ ಕಡೆತಕುಲು ಕೇನ್ಡೆರ್ನ್ಡ ಕುಡೊಂಜಿ ಕಡೆತಕುಲು ಸಾಮಾನ್ಯ ಕಾರ್ಯಕರ್ತೆರ್ ಪೋವೊಲಿ, ಆಂಡ ಕಲು(ಸುಳ್ಳು) ಪನ್ಡ್ದ್ ದಾಯೆ ಪೋವೊಡು ಪನ್ದ್ ಕೇನೊನ್ದುಲ್ಲೆರ್.
ಈ ವಿಷಯೊಗು ಪ್ರತಿಕ್ರಿಯೆ ಕೊರ್ತಿನ ಬಿಜೆಪಿ ಜಿಲ್ಲಾಧ್ಯಕ್ಷೆ ಕುಂಪಲ ಸತೀಶೆರ್ ಎಂಕ್ಲ ದಾಲ ತಪ್ಪು ಮಲ್ದಿಜ ಪನ್ದ್ ಪನ್ತೆರ್.