Last updated on December 9th, 2025 at 10:19 am
ಕುಡ್ಲ, ಡಿ. 09: ಜವನೆ ಒರಿ ಮದಿಮೆದ ಲೆಪ್ಪೋಲೆನ್ ದೋಸ್ತಿಲೆಗ್ ಬೊಕ್ಕ ಬಿನ್ನೆರೆಗ್ ಕೊರ್ಯೆರೆ ಉಂಡು ಪನ್ಡ್ದ್ ಇಲ್ಲರ್ದ್ ಪೋತಿನಾಯೆ ಕಾಣೆ ಆತಿನ ನಡಕೆ ಕುಡ್ಲಡ್ ನಡತ್ದ್ಂಡ್.
ತೋಜಂದೆ ಆತಿನ ಜವನನ್ ರಕ್ಷಣ್ ಜೆ.ಕೆ (32) ಪನ್ದ್ ಗುರ್ತ ಪತ್ತ್ದೆರ್. ಡಿಸೆಂಬರ್ 6 ತಾನಿ ತನ್ನ ಅಪ್ಪೆನ ಕಾರ್ಡ್ ಪಿದಡ್ದ್ ಬಿನ್ನೆರೆಗ್ ಬೊಕ್ಕ ದೋಸ್ತಿಲೆಗ್ ಮದಿಮೆದ ಲೆಪ್ಪೋಲೆ ಕೊರ್ದು ಬರ್ಪೆ ಪನ್ದ್ ಪೋದು ಕಾಣೆ ಆತಿನ ಬಗೆಟ್ ಪ್ರಕರಣ ತೆನ್ಕಾಯಿ ಪೋಲಿಸ್ ಸ್ಟೇಷನ್ಡ್ ದಾಕಲಾತ್ಂಡ್. ಡಿಸೆಂಬರ್ 6 ತಾನಿ ರಾತ್ರೆ 10:30 ಗಂಟೆಗ್ ಪೇಂಟೆದ ಟೌನ್ಹಾಲ್ ಕೈತಲ್ ಕಾರ್ ತೋಜಿದ್ ಬೈದ್ಂಡ್.
ಕಾಣೆ ಆತಿನಾರೆನ ಪೊಲಬು: 5.8 ಅಡಿ ಎತ್ತರ, ಗೋಧಿ ಮೆಯಿ ರಂಗ್, ಕಪ್ಪು ಕುಜಲ್, ಅಕ್ಕಸನೀಲಿ ರಂಗ್ದ ಉದ್ದ ಕೈತ ಶರ್ಟ್ ಬೊಕ್ಕ ಕಪ್ಪು ರಂಗ್ದ ಪ್ಯಾಂಟ್ ಪಾಡ್ದಿತ್ತೆರ್. ತುಳು ಕನ್ನಡ, ಇಂಗ್ಲೀಷ್ ಭಾಷೆ ಪಾತೆರುವೆರ್.
ಜವನೆ ಎಂಕ್ ಮದಿಮೆ ಇಷ್ಟ ಇಜ್ಜಿ ಪನ್ದ್ ಇಲ್ಲದಕ್ಲೆಡ ಪನ್ಡ್ದಿತ್ತ್ಂಡಲಾ ಮದಿಮೆಗ್ ಅಟ್ಟನೆ ಮಲ್ತೊಂದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಸನಿಯಾರ ಇಲ್ಲರ್ದ್ ಪೋದಿತ್ತಿನ ಆರ್ ಮಧ್ಯಾಹ್ನದ ರೈಲ್ಡ್ ಚೆನ್ನೈಗ್ ಪೋತೆರ್. ಸೋಮಾರ ಮೊಬೈಲ್ ಕಾಲ್ ರಿಸೀವ್ ಮಲ್ತಿತ್ತ್ದ್, ಯಾನ್ ಚೆನ್ನೈಡ್ ಉಲ್ಲೆ ಪನ್ದ್ ತೆರಿಪಾದೆರ್. ಅಪಗನೇ ಪೊಲೀಸೆರ್ ಲೋಕೇಷನ್ ಸರ್ಚ್ ಮಲ್ಪುನಗ ಚೆನ್ನೈಡ್ ಇಪ್ಪುನ ದೃಢ ಆತ್ಂಡ್. ಪಿರ ಕುಡ್ಲಗ್ ಲೆತೊಂದು ಬರ್ಪುನ ಪುನೆಪು ಬರೊಂದುಲ್ಲೆರ್.