Last updated on December 11th, 2025 at 10:34 am
ಒಡಿಪು, ಡಿ. 11: ಅರ್ಜೆಂಟ್ ಕಾಸ್ ಬೋಡು ಪನ್ದ್ ಲೋನ್ ಆ್ಯಪ್ ಡ್ ಕಡ ಗೆತೊಂದಿತ್ತಿನ ಆಟೋ ಮೊಬೈಲ್ ಇಂಜಿನಿಯರ್ ಜವನಗ್ ಕಡ ಸಂದಾಯಿ ಬೊಕ್ಕ ಪೋಡಿಕಟ್ಟಾದ್ ಸುಮಾರ್ 4 ಲಕ್ಷರ್ದ್ಲಾ ಎಚ್ಚ ಕಾಸ್ ವಸೂಲಿ ಮಲ್ದಿನ ನಡಕೆ ನಡತಿತ್ತ್ದ್, ಈ ಬಗೆಟ್ ಕೋಟ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಬೆಂಗಳೂರ್ಡ್ ಆಟೋ ಮೊಬೈಲ್ ಇಂಜಿನಿಯರ್ ಬೇಲೆ ಮಲ್ತೊಂದಿತ್ತಿನ ಜವನಗ್ ಒಂಜಿ ತಿಂಗೊಲ್ದ ಕಾಸ್ದ ಅವಶ್ಯಕತೆ ಬತ್ತಿತ್ತ್ಂಡ್, ಅಂಚಾದ್ ಮೊಬೈಲ್ ಡ್ SMART RUPIYA ONELINE LOAN APP ಡ್ 7 ದಿನೊತ ಲೋನ್ ಗ್ ಅಪ್ಲೈ ಮಲ್ತ್ದ್ ಆಧಾರ್ ಕಾರ್ಡ್, ಪಾನ್ ಕಾರ್ಡ್, ಸೆಲ್ಪಿ ಪೋಟೋ, ಮೊಬೈಲ್ ಲೋಕೇಶನ್, ಮೊಬೈಲ್ ಕಾಂಟಾಕ್ಟ್ ಡಿಟೈಲ್ಸ್ ನ್ ಮಾತಾ ಕೊರ್ದು 12,000/- ಕಡ ಗೆತೊಂದೆ. 7 ದಿನೊತ ಉಲಯಿ ಕಾಸ್ ಪಿರ ಕಟ್ಟೆರೆ ಇತ್ತಿನೆರ್ದಾವರ 6 ದಿನೊತ ಉಲಯೇ ಗೆತೊಂದಿನ 12,000 ಕಾಸ್ನ್ ಪಿರ ಕಟ್ಪ್ದೆ.
ಬೊಕ್ಕ ಆಯನ ನಂಬರ್ ಡೇ ಎಚ್ಚ ಎಚ್ಚ ಲೋನ್ ಗೆತೊಂದು ಜವನನ ಮೊಬೈಲ್ ನಂಬ್ರರ್ದ್ ವಾಟ್ಸಾಪ್ ಬೊಕ್ಕ ಟೇಲಿಗ್ರಾಮ್ APP ಮುಕೇನ ಏರೋ ಸೈಬರ್ ದಗೆ ಮಲ್ಪುನಕ್ಲು ಕಾಲ್ ಮಲ್ತ್ದ್ ಕಾಸ್ ಕೊರ್ಜಿಂಡ ಮೊಬೈಲ್ ಡಾಟಾ ಎಂಕ್ಲೆಡ ಉಂಡು, ಅವೆನ್ ಸಾಮಾಜಿಕ ಬಲೆತ್ತಾನೊಡು ಪಾಡುವ ಪನ್ದ್ ಪೋಡಿಕಟ್ಟಾದೆರ್.
ಜವನೆ ಪೋಡಿದ್ ಒಂತೆ ಒಂತೆನೇ APPದ ಮುಕೇನ 4,37,253 ರೂಪಾಯಿ ಪಾಡ್ದೆ. ಈ ಬಗೆಟ್ ಕೋಟ ಪೊಲೀಸ್ ಸ್ಟೇಶನ್ ಅಪರಾಧ ಕ್ರಮಾಂಕ 216/2025 ಕಲಂ: 66(c), 66(d) IT ACT ದ ಪ್ರಕಾರ ಪ್ರಕರಣ ದಾಕಲಾತ್ಂಡ್.