Last updated on December 21st, 2025 at 04:20 pm
ಕೊಲ್ಲೂರು, ಡಿ. 21: ಕೊಲ್ಲೂರು ಮೂಕಾಂಬಿಕಾ ದೇಲಂತಡೆಗ್ ಸಂಬಂಧಿತ್ದ್ ರೂಮ್ ಬುಕ್ಕಿಂಗ್ಗ್ ಕೊಲ್ಲೂರು ಶ್ರೀಮೂಕಾಂಬಿಕಾ ದೇಲಂತಡೆದ ಪುದರ್ಡ್ ಡೂಪ್ಲಿಕೇಟ್ ವೆಬ್ಸೈಟ್ ಮಲ್ತ್ದ್ ಭಕ್ತರೆಗ್ ಕಾಸ್ ದಗೆ ಮಲ್ದಿನ ಪ್ರಕರಣೊಡು ಒರಿ ಆರೋಪಿನ್ ಕೊಲ್ಲೂರು ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಾಯನ್ ರಾಜಸ್ಥಾನ ರಾಜ್ಯೊದ ತಿಜಾರಿ ಜಿಲ್ಲೆದ ನಾಸೀರ್ ಹುಸೇನ್(21) ಪನ್ದ್ ಗುರ್ತ ಪತ್ತ್ದೆರ್. ಉಂಬ್ಯೆ ದೇಲಂತಡೆದ ಅಧಿಕೃತ ವೆಬ್ಸೈಟ್ಗ್ ಒಂಬುನ ಡೂಪ್ಲಿಕೇಟ್ ವೆಬ್ಸೈಟ್ ಉಂಡು ಮಲ್ತ್ದ್ ದೇಲಂತಡೆದ ಭಕ್ತೆರೆರ್ದ್ ಅಡ್ವಾನ್ಸ್ ರೂಮ್ ಬುಕಿಂಗ್ ಮಲ್ಪಾವುನ ಬಗೆಟ್ ಕಾಸ್ ಗೆತೊಂದು ಡೂಪ್ಲಿಕೇಟ್ ರಶೀದಿ ಕೊರ್ದು ದಗೆ ಮಲ್ತೊಂದಿತ್ತೆ. ಈ ಬಗೆಟ್ ಕೊಲ್ಲೂರು ಶ್ರೀಮೂಕಾಂಬಿಕಾ ದೇಲಂತಡೆದ ಕಾರ್ಯಾನಿರ್ವಹಣಾಧಿಕಾರಿ ಬರೆಪಾದಿನ ಒಯಿಲ್ದ ಪ್ರಕಾರ ನ.3ತಾನಿ ಕೊಲ್ಲೂರು ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ಂಡ್.
ಜಡ್ತೆ ಮಲ್ತಿನ ಪೋಲೀಸೆರ್, ಆರೋಪಿನ್ ಡಿಸೆಂಬರ್ 19ದಾನಿ ಕೈದ್ ಮಲ್ತ್ದ್, ಆಯರ್ದ್ ಕೃತ್ಯೊಗು ಗಲಸ್ದಿನ ಲ್ಯಾಪ್ಟಾಪ್ನ್ ವಶೊಕು ಗೆತೊಂದೆರ್. ಡಿಸೆಂಬರ್ 20ದಾನಿ ಆರೋಪಿನ್ ಬೈಂದೂರು ನ್ಯಾಯಂತಡೆದ ಎದುರು ಲೆತೊಂದು ಪೋದಿತ್ತ್ದ್, ನ್ಯಾಯಂತಡೆ ಆರೋಪಿಗ್ ನ್ಯಾಯಾಂಗ ಕೈದ್ ಕೊರ್ತುಂಡು.