Last updated on December 22nd, 2025 at 08:55 am
ಇಟ್ಟೆಲ್, ಡಿ. 21: ಕೇಪು ಶ್ರೀ ಉಳ್ಳಾಲ್ತಿ ದೇವಸ್ಥಾನೊಡು ಕಜಂಬು ಜಾತ್ರೆ ಕರಿದ್ ವರ್ಸೊಲಾ ನಡಪುನ ಕೋರಿದ ಕಟ್ಟಗ್ ಕೋಡೆ ಪೊಲೀಸೆರ್ ಕುಡ ದಾಳಿ ಮಲ್ತ್ದ್, 20 ಕೋರಿಲೆನ್ ಸೀಜ್ ಮಲ್ತ್ದ್ 27 ಜನೊತ ಮಿತ್ತ್ ಕೇಸ್ ಪಾಡ್ದೆರ್.
ಕಾಂಡೆ ಬಿಜೆಪಿದಕುಲು ಕೇಪು ಶ್ರೀ ಉಳ್ಳಾಲ್ತಿ ದೇವಸ್ಥಾನೊಗು ಬತ್ತ್ದ್ ಕಂಡೊಡು ಕೋರ್ದಟ್ಟ ಮಲ್ಪೆರ ಪ್ರೇರೇಪಿತೆರ್. ಪಾಕ ದುಂಬುರ್ದೇ ಕೇಪು ಕ್ಷೇತ್ರೊಡು ಕಜಂಬು ಜಾತ್ರೆ ಆದ್ ಮೂಜಿ ದಿನೊತ ಕೋರ್ದಟ್ಟ ನಡತೊಂದು ಬೈದ್ಂಡ್. ಉಂದು ಜುಗಾರಿ ಅತ್ತ್, ನಂಬೊಲಿಗೆ. ಅಂಚಾದ್ ಧಾರ್ಮಿಕ ಕಾರ್ಯಕ್ರಮೊದ ಭಾಗ ಆದೊ ಈ ಕೋರ್ದಟ್ಟ ಮಲ್ಪುನ ತಪ್ಪತ್ತ್ ಪನ್ದ್ ಪನ್ಡೆರ್.
ಕೋರ್ದಟ್ಟ ಸುರು ಆದ್ ಒಂತೆ ಪೊರ್ತುಡೇ ಪೊಲೀಸೆರ್ ದಾಳಿ ಮಲ್ತ್ದ್ ಅಲ್ಪ ಇತ್ತಿನ ಸಂಜೀವ ಮಠಂದೂರು, ಮುರಳೀಧರ ರೈ , ಸತೀಶ ಕುಂಪಲ, ದಯಾನಂದ ಉಜಿರೆಮಾರ್, ಹರಿಪ್ರಸಾದ್ ಯಾದವ್, ಅಶೋಕ ಶೆಟ್ಟಿ ವಿಟ್ಲ , ರಾಜೇಶ್ ಬಾರೆಕಲ್ಲ್ ಸೇರ್ದ್ 27 ಜನೊನು ವಶೊಕು ದೆತೊಂದು, ಅಲ್ಪ ಇತ್ತಿನ 20 ಪೂಂಜೆರೆನ್ ಬೊಕ್ಕ ಕಟ್ಟದ ಬಾಲ್ಲೆನ್ ವಶೊಕು ಗೆತೊಂದೆರ್.
ಕಾನೂನು ಬಾಹಿರ ಕೃತ್ಯೊಗು ಪ್ರಚೋದನೆ ಬೊಕ್ಕ ದುಷ್ಪ್ರೇರಣೆ ಕೊರ್ತಿನಕುಲು ಬೊಕ್ಕ ಕಾನೂನು ಬಾಹಿರ ಕೃತ್ಯೊಡು ಪಾಲ್ಪಡೆತಿನಕುಲು ಸೇರ್ದ್ ಒಟ್ಟು 27 ಜನೊತ ಮಿತ್ತ್ ವಿಟ್ಲ ಪೊಲೀಸ್ ಸ್ಟೇಶನ್ಡ್ ಅ.ಕ್ರ: 191/2025, ಕಲಂ: 189(2), 49, 221, 223, 190 BNS 2023 ಬೊಕ್ಕ 3, 11 PREVENTION OF CRUELTY TO ANIMALS ACT ಅಡಿಟ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.