Last updated on December 23rd, 2025 at 08:36 am
ಒಡಿಪು, ಡಿ. 22: ಮಲ್ಪೆ ಕಡಲ ಕರೆಟ್ ಕೃಷ್ಣನ ಒರು ಪಾಂಬೊಂದು ಬತ್ತ್ದ್ ಕಾರ್ನಿಕ ನಡತ್ದ್ಂಡ್ ಪನ್ಪಿ ಸುದ್ದಿ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆವೊಂದುಂಡು. ಐತಾರ ಕೃಷ್ಣಮಠೊಟು ಇಸ್ಕಾನ್ ಸಂಸ್ಥೆದ ಧಾರ್ಮಿಕ ಕಾರ್ಯಕ್ರಮ ಇತ್ತ್ಂಡ್, ಸುಮಾರ್ 18 ಬಸ್ಸ್ಡ್ ಇಸ್ಕಾನ್ ಭಕ್ತೆರ್ ಕಡಲ ಕರೆಕ್ ಪೋದಿತ್ತೆರ್. ಆ ಪೊರ್ತುಡು ಕಡಲ ಸಿರೆಟ್ ಬತ್ತಿನ ಒರು ಒಂಜೆತಂಚಿ ಮಾತೆರ್ನ ಗೇನ ಪೋತುಂಡು.
ಅಲ್ಪ ಸೇರ್ದಿತ್ತಿನ ಪಾಕ ಜನ ಆ ಒರುನು ಮಿತ್ತ್ ದೇರ್ತ್ದ್ ಕುಸಿ ಪಡೆಯೆರ್. ಒಡಿಪುದ ಕಿಟ್ಣೆಲಾ ಕಡಲ್ಡೇ ತಿಕ್ಕಿನೆರ್ದಾವರ, ಭಾವುಕೆರಾಯಿನ ಭಕ್ತೆರ್ ಅವ್ವೇ ಕಾರ್ನಿಕ ಕುಡೊರ ನಡತ್ದ್ಂಡ್ ಪನ್ದ್ ಸಂಭ್ರಮಿತ್ದೆರ್. ಅಲ್ಪ ಸೇರ್ದಿತ್ತಿನ ಸಾರಗಟ್ಲೆ ಇಸ್ಕಾನ್ ಭಕ್ತೆರ್ ಆ ಒರು ಕೃಷ್ಣನವ್ವೇ ಪನ್ದ್ ಅಲ್ಪರ್ದ್ ಪತೊಂದು ಪೋತೆರ್. ಆಂಡ ಆ ಒರು ತೂಯೆರ ಎಚ್ಚಾದ್ ತುಳುನಾಡ ದೇಲಂತಡೆಲೆನ ಬಾಕಿಲ್ದಲ್ಪ ಇಪ್ಪುನ ಜಯೆ- ವಿಜಯೆರೆಡ್ ಒರಿಯನ ಒರು ಪನ್ದ್ ತೋಜಿದ್ ಬರ್ಪುಂಡು.
ದೇಲಂತಡೆಲೆಡ್ ಭಿನ್ನ ಆತಿನ ಒರುಕ್ಲೆನ್ ಕಡಲ್ಡ್ ಬುಡ್ಪುನ ಕ್ರಮ ಉಂಡು. ಇಂಚ ಬುಡ್ತಿನ ಜಯೆ- ವಿಜಯೆರೆ ಒರುವೇ ಕರೆಕ್ ಬತ್ತ್ದ್, ಭಕ್ತೆರೆ ಕುಸಿಕ್ ನೆವನ ಆತ್ಂಡ್. ಉಂದು ಕಡಲ್ಡ್ ಪಾಂಬೊಂದು ಬತ್ತಿನ ಕೃಷ್ಣನ ಒರು ಪನ್ದೇ ಮಾತೆರ್ಲಾ ನಲಿತ್ದೆರ್. ಇತ್ತೆ ಈ ವಿಡಿಯೋ ಒರ್ಮೆಲಾ ವೈರಲ್ ಆತ್ಂಡ್.
ಜಯೆ-ವಿಜಯೆರ್ ಏರ್?
ಪುರಾಣೊಲೆ ಪ್ರಕಾರ ಶ್ರೀ ಮಹಾವಿಷ್ಣು ಇಪ್ಪುನ ವೈಕುಂಠೊದ ದ್ವಾರಪಾಲಕೆರೇ ಈ ಜಯೆ-ವಿಜಯೆರ್. ನಾಲ್ ಜನ ಋಷಿಕುಮಾರೆರೆ ಸಾಪೊರ್ದಾವರ ಪುಡಮಿಡ್ ರಕ್ಕಸೆರಾದ್ ಪುಟ್ಟುದು, ಮಹಾವಿಷ್ಣುನ ಬೇತೆ ಬೇತೆ ಅಬತರೊಲೆನ ಕೈರ್ದ್ ಮೋಕ್ಷ ಪಡೆಪೆರ್. ಈ ದ್ವಾರಪಾಲಕೆರೆನ ಒರುನು ಎಚ್ಚಾದ್ ವಿಷ್ಣು ದೇಲಂತಡೆಲೆನ ಬಾಕಿಲ್ದ ರಡ್ಡ್ ಮೆಯಿಟ್ ದೀದಿಪ್ಪೆರ್.