Last updated on December 31st, 2025 at 12:17 pm
ಫರೀದಾಬಾದ್, ಡಿ. 31: ಲಿಫ್ಟ್ ಕೊರ್ಪ ಪನ್ದ್ ಕಾರ್ಡ್ ಲೆತೊಂದು ಪೋಯಿನ ಇರ್ವೆರ್ ಕಾರ್ಡೇ 25 ವರ್ಸ ಪ್ರಾಯೊದ ಪೊಣ್ಣನ ಮಿತ್ತ್ ಸಾಮೂಹಿಕ ಅತ್ಯಾಚಾರ ಮಲ್ದಿನ ನಡಕೆ ಫರೀದಾಬಾದ್ಡ್ ನಡತ್ದ್ಂಡ್. ಒಯಿಲ್ ಬರೆಪಾಯಿ ಬೊಕ್ಕ ಕ್ರಮ ಗೆತೊಂದಿನ ಪೋಲೀಸೆರ್ ಇರ್ವೆರೆನ್ ಕೈದ್ ಮಲ್ತ್ದ್, ಪ್ರಕರಣೊದ ಜಡ್ತೆ ಮಲ್ತೊಂದುಲ್ಲೆರ್. ವರದಿಲೆನ ಪ್ರಕಾರ, ಪೊಂಜೊವುನ ಇಲ್ಲದಕುಲು ಡಿ. 30 ದಾನಿ ಮಧ್ಯಾಹ್ನ 3 ಗಂಟೆದ ಅಂದಾಜಿಗ್ ಪೊಲೀಸೆರೆಡ ಒಯಿಲ್ ಬರೆಪಾದೆರ್.
ಒಯಿಲ್ದ ಪ್ರಕಾರ, ಪೊಣ್ಣು ತನ್ನ ಕಂಡನ್ಯರ್ದ್ ದೂರ ಆದ್ ಬೊಕ್ಕ ತನ್ನ ಅಪ್ಪೆನೊಟ್ಟುಗು ಇತ್ತೆರ್. ಡಿಸೆಂಬರ್ 29 ದ ರಾತ್ರೆ, 8.30 ತ ಅಂದಾಜಿಗ್, ತನ್ನ ಅಪ್ಪೆಡ ಲಡಯಿ ಮಲ್ತ್ದ್, ತನ್ನ ದೋಸ್ತಿ ಒರ್ತಿನ್ ತಿಕ್ಯೆರೆ ಪೋದಿತ್ತೆರ್ಗೆ.
ರಾತ್ರಿ 12.30 ತ ಅಂದಾಜಿಗ್, ಆರ್ ಇಲ್ಲಗ್ ಪಿರ ಬನ್ನಗ ಮೆಟ್ರೋ ಚೌಕ್ದ ಕೈತಲ್ ರಿಕ್ಷಾದಕ್ಲೆಡ ಪಾತೆರೊಂದಿತ್ತೆರ್ಗೆ. ಈ ಪೊರ್ತುಡು, ವ್ಯಾನ್ ಒಂಜಿ ಬತ್ತ್ದ್ ಆರೆಗ್ ಲಿಫ್ಟ್ ಕೊರ್ಪ ಪನ್ದ್ ಪನ್ಡ್ದ್ ಕಾರ್ಗ್ ಬರ್ತಾವೊಂದೆರ್. ಆರೋಪಿಲು ಆರೆನ್ ಗುರುಗ್ರಾಮದಂಚಿ ಲೆತೊಂದು ಪೋದು ಕಾಡ್ ಜಗೆಡ್ ಅತ್ಯಾಚಾರ ಮಲ್ತ್ದೆರ್ ಪನ್ದ್ ವರದಿ ಆತ್ಂಡ್.
ಅತ್ಯಾಚಾರ ಮಲ್ತ್ದ್ ಪೊಣ್ಣನ್ ಪೋವೊಂದಿತ್ತಿನ ಕಾರ್ರ್ದ್ ದಕ್ಕಿನೆರ್ದಾವರ ಸಂತ್ರಸ್ತೆದಿನ ತರೆಕ್ ಗಾತಿದ ಗಡಿಕುಲಾದಿತ್ತ್ದ್, 12 ಕಟ್ಟ ಪಾಡ್ದೆರ್. ಒಯಿಲ್ ಬರೆಪಾಯಿನೇ ಎಫ್ಐಆರ್ ದಾಕಲಾದಿತ್ತ್ದ್, ಇರ್ವೆರ್ ಆರೋಪಿಲೆನ್ಲಾ ಕೈದ್ ಮಲ್ತ್ದ ಪನ್ದ್ ಪೊಲೀಸೆರ್ ತೆರಿಪಾದೆರ್. ಇರ್ವೆರ್ಲಾ ಫರಿದಾಬಾದ್ ದಕುಲು ಪನ್ದ್ ತೆರಿದ್ ಬೈದ್ಂಡ್.