Last updated on January 28th, 2026 at 08:35 am
ಪುತ್ತೂರು, ಜ. 28: ತಿಂಗೊಲುಗು ದುಂಬು ಮಂಗಳೂರು ಕಂಬುಲಡ್ ದಾಕಲಾತಿನ ಕಂಬುಲದ ಬಾರೀ ಬೀಸದ ಗಿಡಪುದ ದಾಕಲೆನ್ ಪುತ್ತೂರು ಕೋಟಿ ಚೆನ್ನಯ ಜೋಡುಕರೆ ಕಂಬಳಕೂಟ ಮಾಜಾದ್ ಪೊಸ ದಾಕಲೆ ಬರೆತ್ಂಡ್.
ಶ್ರೀ ಪಂಚಲಿಂಗೇಶ್ವರ ಉರುವಾಲ್ ನಾರಾಳಗುತ್ತು ಸದಾನಂದ ಗೌಡ್ರೆನ ಕುಟ್ಟಿ-ಕಾಲೆ ಎರ್ಲೆನ ಜೋಡಿ ಈ ಪೊಸ ದಾಕಲೆನ್ ಬರೆತ. ಜ. 24-25 ತಾನಿ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇಲಂತಡೆದ ಕಂಡೊಡು ನಡತಿನ 33 ನೇ ವರ್ಸೊದ ಕೋಟಿ ಚೆನ್ನಯ ಜೋಡುಕೆರೆ ಕಂಬುಲಡ್ ಈ ದಾಕಲೆ ಆತ್ಂಡ್.
ಒಂಜೇ ತಿಂಗೊಲುಡು ಪೊಸ ದಾಕಲೆ
ಈ ಎರ್ಲೆನ್ 22 ವರ್ಸ ಪ್ರಾಯೊದ ಪಡುಸಾಂತೂರ್ದ ಪೃಥ್ವಿರಾಜ್ ಪೂಜಾರಿ ಗಿಡತ್ದೆರ್. ಈ ಎರ್ಲು 125 ಮೀ ದೂರೊನು 10.65 ಸೆಕೆಂಡ್ಡ್ ಪಾರ್ದ. ಈ ಲೆಕ್ಕೊಡು 100 ಮೀ ದೂರೊನು 8.52 ಸೆಕೆಂಡ್ಡ್ ಪಾರಿಲೆಕ. ಕರಿನ ತಿಂಗೊಲು ಮಂಗಳೂರು ರಾಮ -ಲಕ್ಷ್ಮಣ ಜೋಡುಕರೆ ಕಂಬುಲದ ನಾಯೆರ್ದ ಮಲ್ಲ ವಿಭಾಗೊದ ಫೈನಲ್ಡ್ ಶ್ರೀಕಾ ಸಂದೀಪ್ ಶೆಟ್ರೆನ ಗಾಂಧಿ ಮೈದಾನ ಸಂತು ಬೊಕ್ಕ ಸುರತ್ಕಲ್ ಪಾಂಚ ಎರ್ಲೆನ್ ಗಿಡತಿನ ಕುಂದ ಬಾರಂದಡಿ ಮಾಸ್ತಿಕಟ್ಟೆದ ಸ್ವರೂಪ್, ಕುಮಾರ್ 125 ಮೀ. ದೂರವನ್ನು 10.87 ಸೆಕೆಂಡ್ಡ್ ಗಿಡತ್ದೆರ್. ಆ ಪ್ರಕಾರ 100 ಮೀ ದೂರೊನು 8.69 ಸೆಕೆಂಡ್ಡ್ ಗಿಡತಿಲೆಕ ಆದಿತ್ತ್ಂಡ್.
ದುಂಬುದ ದಾಕಲೆ
ಕಂಬುಲಡ್ ಬಾರೀ ಬೀಸಡ್ ಗಿಡತಿನ ದಾಕಲೆ ದುಂಬು ಮಿಜಾರ್ ಅಶ್ವತ್ಥಪುರ ಶ್ರೀನಿವಾಸ ಗೌಡ್ರೆನ ಪುದರ್ಡ್ ಇತ್ತ್ಂಡ್. 2021ಟ್ ಕಕ್ಯಪದವು ಕಂಬುಲಡ್ ಮಿಜಾರ್ ಪ್ರಸಾದ್ ನಿಲಯ ಶಕ್ತಿ ಪ್ರಸಾದ್ ಮೆರೆನ ಮಾಳ ಪುಟ್ಟ ಬೊಕ್ಕ ಮಿಜಾರ್ಅಪ್ಪು ಎರ್ಲೆನ್ ಆರ್ ಗಿಡತಿತ್ತೆರ್. ಆ ಎರ್ಲು 125 ಮೀಟರ್ನ್ 10.95 ಸೆಕೆಂಡ್ಡ್ ಬಲ್ತಿತ್ತ, ಪನ್ಡ 100 ಮೀ ದೂರೊಗು 8.76 ಸೆಕೆಂಡ್. ಇತ್ತೆ ಇರ್ವೆರ್ ಈ ದಾಕಲೆನ್ ಆಕ್ದೆರ್.
ಈ ಕುಟ್ಟಿ-ಕಾಲೆ ಎರ್ಲೆನ್ ಗಿಡತಿನ ಒಡಿಪುದ ಪಡುಸಾಂತೂರ್ದ ರಾಮ ಪೂಜಾರಿ ಬೊಕ್ಕ ರಂಜನಿ ಮೊಕಲೆನ ಮಗೆ ಪೃಥ್ವಿರಾಜ್ ಡಿಪ್ಲೊಮಾ ಸಿವಿಲ್ ಎಂಜಿನಿಯರಿಂಗ್ ಮಲ್ತ್ದೆರ್. ತನ್ನ ಇಲ್ಲಡೇ ಕಂಬುಲದ ಎರ್ಲು ಇತ್ತ್ದ್, ಅವೆನ್ ಗಿಡತಿನ ಅನುಭವ ಇತ್ತ್ಂಡ್.
ಮೂಜಿ ವರ್ಸೊರ್ದಿಂಚಿ ಕಂಬುಲದ ಎರ್ಲೆನ್ ಗಿಡತೊಂದುಲ್ಲೆ. ಕೋಟಿ ಚೆನ್ನಯ ಕಂಬುಲಡ್ ಈ ದಾಕಲೆ ಆತ್ಂಡ್. ಮಸ್ತ್ ಖುಷಿಯಾತ್ಂಡ್ ಪನ್ದ್ ಪಡುಸಾಂತೂರು ಪೃಥ್ವಿರಾಜ್ ಪೂಜಾರಿ ಪನ್ಡೆರ್.
ಕೋಟಿ ಚೆನ್ನಯ ಕಂಬುಲಡ್ ಆತಿನ ಈ ದಾಕಲೆ ಬಾರೀ ಬೀಸದವು. ವಿಶೇಷ ಬಹುಮಾನ ಕೊರ್ದು ಪ್ರೋತ್ಸಾಹ ಮಲ್ತ್ದ ಪನ್ದ್ ಪುತ್ತೂರು ಕಂಬುಲ ಸಮಿತಿದ ನಿರಂಜನ ರೈ ಮರ್ತೊಟ್ಟು ಪನ್ಡೆರ್.