Last updated on February 1st, 2026 at 07:52 am
ಬೆಂಗಳೂರ್, ಫೆ. 1: ಧರ್ಮಸ್ಥಳದ ಸೌಜನ್ಯ ಪರ ಪೊರ್ಮ್ಬಾಟಗಾರೆ ಮಹೇಶ್ ಶೆಟ್ಟಿ ತಿಮರೋಡಿಯೆರೆಗ್ 9 ತಿಂಗೊಲು ರಾಯಚೂರ್ದ ಮಾನ್ವಿ ಪೊಲೀಸ್ ಸ್ಟೇಶನ್ ಸೀಮೆಗ್ ಗಡೀಪಾರ್ ಮಲ್ತ್ದ್ ಆದೇಶ ಕೊರ್ದಿತ್ತಿನ ಪುತ್ತೂರು ಉಪ ವಿಭಾಗಾಧಿಕಾರಿನ ಆದೇಶೊನು ಹೈ ಕೋರ್ಟ್ ಪಿರ ಕಡಪುಡ್ದುಂಡು.
ಅರ್ಜಿದಾರೆರೆ ಆಕ್ಷೇಪಣೆ ಪರಿಗಣಿತ್ದ್ 3 ವಾರೊಡು ಪೊಸತಾದ್ ಆದೇಶ ಕೊರ್ಯೆರೆ ನಿರ್ದೇಶನ ಕೊರ್ತುಂಡು. ತಿಮರೋಡಿ ರೆನ್ ರಾಯಚೂರ್ ಜಿಲ್ಲೆದ ಮಾನ್ವಿ ತಾಲೂಕ್ಗ್ 2025 ತ ಡಿಸೆಂಬರ್ 16 ರ್ದ್ 2026ತ ಸೆಪ್ಟೆಂಬರ್ 16ರ ಮುಟ್ಟ ಗಡೀಪಾರ್ ಮಲ್ತ್ದ್ ಪುತ್ತೂರು ಉಪ ವಿಭಾಗಾಧಿಕಾರಿ ಆದೇಶ ಕೊರ್ದಿತ್ತೆರ್. ಆ ಆದೇಶೊನು ಪ್ರಶ್ನೆ ಮಲ್ತ್ದ್ ತಿಮರೋಡಿ ಹೈಕೋರ್ಟ್ ಗ್ ಪೋದಿತ್ತೆರ್.
ಎಂಕ್ಲೆನ ಆಕ್ಷೇಪಣೆಲೆನ್ ಗೆನ್ಪಂದೇ ಗಡಿಪಾರ್ ಆದೇಶ ಕೊರ್ತೆರ್. ಖುಲಾಸೆ ಆತಿನ ಪ್ರಕರಣೊಲೆನ್ಲಾ ಉಲ್ಲೇಖ ಮಲ್ತ್ದ್, ಶೋಕಾಸ್ ನೋಟಿಸ್ ಜಾರಿ ಮಲ್ತಿ ಬೊಕ್ಕ ಸಂದಾದಿನ ಆಕ್ಷೇಪಣೆನ್ ಗೆನ್ಪಂದೆ, ವಿವೇಚನೆ ದಾಂತೆ ಆದೇಶ ಕೊರ್ತೆರ್ ಪನ್ದ್ ಅರ್ಜಿಡ್ ಬರೆತೆರ್
ಅರ್ಜಿದ ವಿಚಾರಣೆ ಮಲ್ತಿನ ನ್ಯಾ. ನಾಗಪ್ರಸನ್ನ ಮೆರೆನ ಏಕಸದಸ್ಯ ನ್ಯಾಯಪೀಠೊ, ಆದೇಶೊದ ಪ್ರತಿ ತಿಕ್ಕಿನ ಮೂಜಿ ವಾರೊದುಲಯಿ ಪ್ರಕರಣೊಗು ಸಂಬಂಧಿತ್ದ್ ಅರ್ಜಿದಾರೆರ್ ಸಂದಾದಿನ ಆಕ್ಷೇಪಣೆನ್ ಪರಿಗಣಿಪೊಡು. ಬೊಕ್ಕ ಕಾನೂನು ಪ್ರಕಾರ ಆದೇಶ ಕೊರೊಡು ಪನ್ದ್ ಆದೇಶ ಕೊರ್ತೆರ್.