Last updated on February 21st, 2026 at 07:57 am
ಬೋಲ್ತೇರ್, ಫೆ. 21: ಬೋಲ್ತೇರ್ ತಾಲೂಕ್ದ ಶಿಬಾಜೆ ಗ್ರಾಮೊದ ಸಾರಾ ಫಾರ್ಮ್ಸ್ದ ಶ್ರೀಧರ್ ತೀರ್ದಿನ ಪ್ರಕರಣೊದ ಕುಡೊರ ಜಡ್ತೆ ಮಲ್ಪರೆಗ್ ಎಸ್ಐಟಿ ನೇಮಕ ಮಲ್ತ್ದ್ ರಾಜ್ಯ ಸರ್ಕಾರ ಆದೇಶ ಕೊರ್ತುಂಡು. ಹೈಕೋರ್ಟ್ ಪಿಸ್ರಾತಿನ ಬೆರಿಟೇ ಇತ್ತೆ ಎಸ್ಐಟಿ ಉಂಡು ಮಲ್ತಿತ್ತ್ದ್, ಬೋಲ್ತೇರ್ ತಾಲೂಕ್ಡ್ ಧರ್ಮಸ್ಥಳ ಪ್ರಕರಣೊರ್ದು ಬೊಕ್ಕ ಇತ್ತೆ ಕುಡೊರ ಎಸ್ಐಟಿ ರಚನೆ ಆತ್ಂಡ್.
ಬೆಂಗಳೂರು ಕೇಂದ್ರ ವಲಯೊದ ಐಜಿಪಿ ಲಾಂಬೂ ರಾವ್ ಮೆರೆನ ಮುತಾಲಿಕೆಡ್ ಮಲ್ದಿನ ಕೂಟೊಡು ಒಡಿಪು ಜಿಲ್ಲಾ ಎಸ್.ಪಿ ಹರಿರಾಮ್ ಶಂಕರ್ ಐಪಿಎಸ್, ಡಿವೈಎಸ್ಪಿ ಎಂಆರ್ ಹರೀಶ್ ಮೊಕುಲು ಉಲ್ಲೆರ್.
2022ತ ಡಿಸೆಂಬರ್ 18ದಾನಿ ಶಿಬಾಜೆಡ್ ಬೇಲೆ ಮಲ್ತೊಂದಿತ್ತಿನ ತೋಟದ ಉಲಯಿ ಶ್ರೀಧರೆರೆನ್ ಏರೋ ಕೆರ್ದ್ ಪಾಡ್ದಿತ್ತೆರ್. ಈ ಪ್ರಕರಣೊಡು ಪಾಕ ಪ್ರಭಾವಿ ಜನೊಕುಲು ಪಾಲ್ಪಡೆತಿನ ಆರೋಪ ಸುರುರ್ದೇ ಕೇನ್ದ್ ಬೈದಿತ್ತ್ಂಡ್. ಅಂಚಾದ್ ಬೋಲ್ತೇರ್ದ ದಲಿತ ಸಂಘಟನೆಲು ಮಲ್ಲ ಪೊರ್ಮ್ಬಾಟಲಾ ಮಲ್ತಿತ್ತೆರ್. ಆಂಡ ಶ್ರೀಧರನ್ ಕೆರ್ತಿನ ಆರೋಪಿಲು ತಿಕ್ಕ್ದಿನೇ ಇಜ್ಜಿ.
ಈ ಪ್ರಕರಣೊಗು ಸಂಬಂಧಿತ್ದ್ ಸಾರಾ ಫಾರ್ಮ್ಸ್ ಮ್ಯಾನೇಜರ್ ಹರೀಶ್ ಮುಗರೆ ಹೈಕೋರ್ಟ್ಡ್ ರಿಟ್ ಅರ್ಜಿ ಪಾಡ್ದಿತ್ತೆರ್. ಶ್ರೀಧರ್ನ್ ಕೆರ್ತಿನ ಪ್ರಕರಣೊದ ಪಿರಜಡ್ತೆ ಮಲ್ಪೆರ ರಾಜ್ಯ ಸರ್ಕಾರ ನಾಲ್ ವಾರೊದುಲಯಿ ಎಸ್ಐಟಿ ಮಲ್ಪೊಡು. ಜಡ್ತೆ ಸುರು ಮಲ್ತಿನ ದಿನೊರ್ದು ನಾಲ್ ತಿಂಗೊಲುಡು ಸಂಬಂಧಿತಿನ ನ್ಯಾಯಂತಡೆಗ್ ಫೈನಲ್ ರಿಪೋರ್ಟ್ ಸಂದಾವೊಡು’ ಪನ್ದ್ ಹೈಕೋರ್ಟ್, 2025ತ ಸೆಪ್ಟೆಂಬರ್ 9ದಾನಿ ಆದೇಶ ಮಲ್ತಿತ್ತ್ಂಡ್.
ಆಂಡ ಸರ್ಕಾರ ಮಾತ್ರ ಹೈಕೋರ್ಟ್ದ ಆದೇಶೊನು ಗೆನ್ಪಂದೆ ಸೈಲೆಂಟ್ ಆದಿತ್ತ್ಂಡ್, ಇತ್ತೆ ಹೈಕೋರ್ಟ್ ಪಿಸ್ರಾತಿನೆಕ್ ರಾಜ್ಯ ಸರ್ಕಾರ ಎಸ್ಐಟಿ ಮಲ್ದ್ಂಡ್. ಅಂಚಾದ್ ಬೋಲ್ತೇರ್ಡ್ ರಡ್ಡ್ ರಡ್ಡ್ ಎಸ್ಐಟಿ ಜಡ್ತೆ ಆಪಿಲೆಕ ಆತ್ಂಡ್.