Last updated on February 27th, 2026 at 08:09 am
ಕಡಬ, ಫೆ. 27: ಸುಬ್ರಹ್ಮಣ್ಯ ವಲಯ ಅರಣ್ಯೊದ ಐತ್ತೂರು ಪನ್ಪಿನಲ್ಪ ನಡತಿನ ಕಾಟಿದ ಬೋಂಟೆಗ್ ಸಂಬಂಧಿತ್ದ್ ಜಾಗೆಡ್ ಇತ್ತಿನ ಆರೋಪಿಲೆನ ಸ್ಟೇಟ್ಮೆಂಟ್ ಗೆತೊನರೆ ವಲಯ ಅರಣ್ಯಾಧಿಕಾರಿ ಕಚೇರಿಗ್ ಲೆಪ್ಪುಡಾದ್ ಅಮಾನುಷವಾದ್ ಆಕ್ದಿನ ಆರೋಪ ಕೇನ್ದ್ ಬೈದಿತ್ತ್ದ್, ಜವನನ್ ಪುತ್ತೂರು ಸರಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್.
ಕಡಬ ತಾಲೂಕ್ ಐತ್ತೂರು ಗ್ರಾಮೊದ ಕೊಂಡೆ ಮನೆ ನಿವಾಸಿ ಮೋನಪ್ಪ ಗೌಡ ಪನ್ಪಿನಾರೆನ ಮಗೆ ಜೀವನ್ (27) ಬೊಕ್ಕ 102 ನೆಕ್ಕಿಲಾಡಿ ಗ್ರಾಮೊದ ಕೆರ್ಮಾಯಿ ನಿವಾಸಿ ಜೈನ್ ವರ್ಕಿ (50) ಪನ್ಪಿನಕ್ಲೆನ ಮಿತ್ತ್ ಇಂಚಿಪ ಐತ್ತೂರು ಕಾಡ್ಡ್ ಕಾಟಿದ ಬೋಂಟೆ ಮಲ್ತಿನ ಪ್ರಕರಣ ದಾಕಲಾತ್ಂಡ್. ಇರ್ವೆರ್ಲಾ ಸ್ಟೇಟ್ಮೆಂಟ್ ಕೊರ್ಯೆರೆ ಬುಧವಾರದಾನಿ ಸುಬ್ರಹ್ಮಣ್ಯ ವಲಯ ಅರಣ್ಯಾಧಿಕಾರಿಲೆನ ಆಫೀಸ್ಗ್ ಪೋದಿತ್ತೆರ್.
ಜೈನ್ ವರ್ಕಿ ಪನ್ಪಿನಾರೆನ್ ಪಿದಯಿ ಕಡಪುಡ್ದ್ ಜೀವನ್ಗ್ ಅಮಾನುಷವಾದ್ ಆಕ್ದಿನತ್ತಂದೆ, ವೈದ್ಯಕೀಯ ತಪಾಸಣೆಗ್ ಕಡಬ ಸಮುದಾಯ ಆರೋಗ್ಯ ಕೇಂದ್ರೊಗು ಲೆತೊಂದು ಪೋತೆರ್ ಪನ್ದ್ ಆರೋಪ ಉಂಡು. ಈ ಪೊರ್ತುಡು ಆಕ್ದಿನ ವಿಷಯ ತೆರಿದ್ ಸಾರ್ವಜನಿಕೆರ್ ಆಸ್ಪತ್ರೆದ ವಠಾರೊಡು ಸೇರ್ದಿತ್ತ್ದ್, ಅರಣ್ಯಾಧಿಕಾರಿಲೆನ ಮಿತ್ತ್ ಆಕ್ರೋಶ ತೂಪಾಯೆರ್. ಆಕ್ದಿನ ಸುಬ್ರಹ್ಮಣ್ಯ ವಲಯ ಅರಣ್ಯಾಧಿಕಾರಿ ವಿಮಲ್ ಬಾಬು, ಸಿಬ್ಬಂದಿಲಾಯಿನ ಪ್ರಕಾಶ್ ಬೊಕ್ಕ ಆದರ್ಶ್ನ ಮಿತ್ತೊ ಕ್ರಮ ಗೆತೊನರೆ ಆಗ್ರಹ ಮಲ್ತ್ದೆರ್. ಗಾತಿದ ಗಡಿಕುಲಾತಿನ ಜವನನ್ ಪುತ್ತೂರು ಸರಕಾರಿ ಆಸ್ಪತ್ರೆಗ್ ದಾಕಲ್ತ್ದೆರ್.