Last updated on March 6th, 2026 at 10:21 am
T20 World Cup 2026: ಟಿ20 ವಿಶ್ವಕಪ್ದ ರಡ್ಡನೇ ಸೆಮಿಫೈನಲ್ ಗೊಬ್ಬುಡು ಗಟ್ಟಿದ ಇಂಗ್ಲೆಂಡ್ನ್ ಸೋಪಾದ್ ಟೀಮ್ ಇಂಡಿಯಾ ಫೈನಲ್ಗ್ ಏರ್ದ್ಂಡ್. ಮುಂಬೈದ ವಾಂಖೆಡೆ ಸ್ಟೇಡಿಯಂಡ್ ನಡತಿನ ಈ ರಣರೋಚಕ ಗೊಬ್ಬುಡು ಸುರುಕು ಬ್ಯಾಟ್ ಮಲ್ತಿನ ಭಾರತ 20 ಓವರ್ಡ್ 253 ರನ್ ಮಲ್ತ್ಂಡ್. ಈ ಈಡ್ನ್ ಬೆರಿಪತ್ತಿನ ಇಂಗ್ಲೆಂಡ್ 20 ಓವರ್ಡ್ 246 ರನ್ ಮಲ್ತ್ದ್ 7 ರನ್ಡ್ ಸೋತ್ಂಡ್.
ಮುಲ್ಪ ಭಾರತ ಬೊಕ್ಕ ಇಂಗ್ಲೆಂಡ್ದ ನಡುತ ಗೆಲ್ಮೆದ ಅಂತರ ಕಾಲಿ 7 ರನ್ ಮಾತ್ರ. ಈ ಅಂತರ ಬತ್ತಿನಿ ಎಂಚ? ಈ ಗೆಲ್ಮೆಗ್ ನೆವನ ಏರ್ ಪನ್ದ್ ತೂಯೆರ ಪೋಂಡ…
- ಸಂಜು ಸ್ಯಾಮ್ಸನ್ ಅಬ್ಬರ: ಟೀಮ್ ಇಂಡಿಯಾದ ಪರವಾದ್ ಓಪನರ್ ಆದ್ ಜತ್ತಿನ ಸಂಜು ಸ್ಯಾಮ್ಸನ್ ಕಾಲಿ 42 ಬಾಲ್ಡ್ 89 ರನ್ (7 ಸಿಕ್ಸರ್, 8 ಫೋರ್) ಮಲ್ತ್ದ್ ಭಾರತೊಗು ಮಲ್ಲ ಸ್ಕೋರ್ದ ಅಡಿಪಾಯ ಪಾಡ್ದ್ ಕೊರ್ಯೆರ್. ಈ ಒಂಜಿ ಮಲ್ಲ ಇನಿಂಗ್ಸ್ ಟೀಮ್ ಇಂಡಿಯಾಗ್ ಮಲ್ಲ ರನ್ ಮಲ್ಪೆರ ನೆವನ ಆಂಡ್.
- ತಿಲಕ್ ವರ್ಮಾನ 3 ಸಿಕ್ಸ್: ಟೀಮ್ ಇಂಡಿಯಾದ ಪರ ಮಾತಾ ಬ್ಯಾಟರ್ನಕುಲು ಎಡ್ಡೆ ಗೊಬ್ಬಿಯೆರ್ನ್ಡಲಾ ಮುಲ್ಪ ತೂವೊಡಾಯಿನ ಮಲ್ಲ ಅಂಶ ಪನ್ಡ ತಿಲಕ್ ವರ್ಮಾ ನ ಮೂಜಿ ಸಿಕ್ಸ್. ದಾಯೆ ಪನ್ಡ 18ನೇ ಓವರ್ದ ಅಕೇರಿಗ್ ಕ್ರೀಸ್ಗ್ ಬತ್ತಿನ ತಿಲಕ್ ವರ್ಮಾ ಜೋಫ್ರಾ ಅರ್ಚರ್ನ 19ನೇ ಓವರ್ಡ್ 3 ಸಿಕ್ಸ್ ಆಕ್ದೆರ್. ಈ ಮುಕೇನ 7 ಬಾಲ್ಡ್ 21 ರನ್ ಮಲ್ತ್ದೆರ್.
- ಬುಮ್ರಾ ಮ್ಯಾಜಿಕ್ ಸ್ಪೆಲ್: ಇಂಗ್ಲೆಂಡ್ ಗೆಲ್ಮೆದ ಸಾದಿಡ್ ಇಪ್ಪುನಗ ಜಸ್ಪ್ರೀತ್ ಬುಮ್ರಾ ಇಡೀ ಗೊಬ್ಬುನೇ ತಿರ್ಗಾಯೆರ್. ಆರೆನ ಅಕೇರಿದ ರಡ್ಡ್ ಓವರ್ಡ್ ಬುಮ್ರಾ ಕೊರ್ತಿನಿ ಕಾಲಿ 14 ರನ್ ಮಾತ್ರ. 16ನೇ ಓವರ್ಡ್ 8 ರನ್ ಕೊರ್ದಿತ್ತಿನ ಬುಮ್ರಾ 18ನೇ ಓವರ್ಡ್ ಬುಡ್ದುಕೊರ್ತಿನಿ ಕಾಲಿ 6 ರನ್ ಮಾತ್ರ. ಈ ರಡ್ಡ್ ಓವರ್ ಇಂಗ್ಲೆಂಡ್ ರನ್ ಮಲ್ಪಂದಿಲೆಕ ಕಟ್ಟ್ದ್ ಪಾಡ್ಂಡ್.
- ಅಕ್ಷರ್ ಪಟೇಲ್ನ ಚಾತುರ್ಪು: ಅಕ್ಷರ್ ಪಟೇಲ್ ಪತ್ತಿನ ರಡ್ಡ್ ಅದ್ಭುತ ಕ್ಯಾಚ್ಲು ಗೊಬ್ಬುನು ಅಲಕ್ಕ ತಿರ್ಗಾಯ. ಸುರುಕು ಹ್ಯಾರಿ ಬ್ರೂಕ್ ನ ಅದ್ಭುತ ಕ್ಯಾಚ್ ಪತ್ತಿನ ಅಕ್ಷರ್ ಪಟೇಲ್, ಬೊಕ್ಕ ಡೇಂಜರಸ್ ವಿಲ್ ಜ್ಯಾಕ್ಸ್ ರೆನ ರಿಲೇ ಕ್ಯಾಚ್ ಪತ್ಯೆರ ಸಕಾಯ ಮಲ್ತೆರ್.
- ಇಷನ್ ಕಿಶನ್, ಶಿವಮ್ ದುಬೆ ಬೊಕ್ಕ ಹಾರ್ದಿಕ್ ಪಾಂಡ್ಯಾನ ಇನ್ನಿಂಗ್ಸ್ಲಾ ಭಾರತೊಗು ಮಲ್ಲ ರನ್ ಮಲ್ಪೆರೆ ಸಕಾಯ ಮಲ್ತ.
ಭಾರತ ಬೊಕ್ಕ ಇಂಗ್ಲೆಂಡ್ ನಡುತ 7 ರನ್ದ ಎಚ್ಚಿಕಮ್ಮಿಗ್ ಮಲ್ಲ ನೆವನ ಅಕ್ಷರ್ ಪಟೇಲ್ರೆನ ಅತ್ಯದ್ಭುತ ಫೀಲ್ಡಿಂಗ್ ಬೊಕ್ಕ ಜಸ್ಪ್ರೀತ್ ಬುಮ್ರಾ ನ ಮೆಂಚಿದ ಲೆಕಂದಿನ ಬೌಲಿಂಗ್ ದಾಳಿ ಪನ್ಡ ತಪ್ಪಾವಂದ್!