Last updated on March 10th, 2026 at 11:41 am
ಉಬಾರ್, ಮಾ. 10: ರಾಂಗ್ ಸೈಡ್ಡ್ ಬತ್ತಿನ ರಿಕ್ಷಾಗ್ ಒಂಜಿ ಕಾರ್ ಎಡ್ತಿನೆರ್ದಾವರ ರಿಕ್ಷಾಡ್ ಇತ್ತಿನ ಒಂಜೇ ಇಲ್ಲದ ಐವೆರ್ ಜೋಕುಲೆಗ್ ಬೊಕ್ಕ ರಿಕ್ಷಾ ಡ್ರೈವರ್ ಆಯಿನ ಜೋಕುಲೆನ ಅಮ್ಮಗ್ ಗಾತಿದ ಗಡಿಕುಲಾತಿನ ನಡಕೆ ಉಬಾರ್ಡ್ ನಡತ್ದ್ಂಡ್.
ರಿಕ್ಷಾ ಡ್ರೈವರ್ ಕಲಂದರ್ ಶಾಫಿ, ಆರೆನ ಜೋಕುಲು ಮಹಮ್ಮದ್ ಜಾಝೀರ್ (13), ಮಹಮ್ಮದ್ ಇರ್ಷಾದ್ (11), ಮಹಮ್ಮದ್ ರಾಝೀಕ್ (9), ಮಹಮ್ಮದ್ ನೂರ್ (5), ಸಝ್ಮಾ (4) ಗಡಿಕುಲಾತಿನಕುಲು. ಇಂದೆಟ್ ಕಲಂದರ್ ಶಾಫಿ, ಸಝ್ಮಾ ಹಾಗೂ ಮಹಮ್ಮದ್ ಜಾಝೀರ್ ಮೊಕಲೆಗ್ ಗಾತಿದ ಗಡಿಕುಲಾದಿತ್ತ್ದ್, ಅಕಲೆನ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದೆರ್.
ಕಲಂದರ್ ಶಾಫಿ ಮೇರ್ ಉಬಾರ್ದ ಸರಕಾರಿ ಮಾದರಿ ಉನ್ನತ ಪೆರಿಯ ಪ್ರಾಥಮಿಕ ಶಾಲೆಡ್ ಓದೊಂದುಪ್ಪುನ ತನ್ನ ಜೋಕುಲೆನ್ ಕೋಡೆ ಬಯ್ಯಡ್ ರಿಕ್ಷಾಡ್ ಶಾಲೆರ್ದ್ 34 ನೆಕ್ಕಿಲಾಡಿನ ತನ್ನ ಇಲ್ಲಗ್ ಲೆತೊಂದು ಪೋವೊಂದುಪ್ಪುನಗ ರಾಂಗ್ಸೈಡ್ಡೆ ರಿಕ್ಷಾ ಕೊನೊತೆರ್, ಈ ಪೊರ್ತುಡು ಕುಡ್ಲರ್ದ್ ಉಬಾರ್ದಂಚಿ ಬರೊಂದಿತ್ತಿನ ಒಂಜಿ ಕಾರ್ ಕುಡ್ಲ- ಬೆಂಗಳೂರು ರಾಷ್ಟ್ರೀಯ ಪೆರ್ಸಾದಿರ್ದ್ ಸರ್ವೀಸ್ ರೋಡ್ಗ್ ಜಪ್ಪುನಗ ರಾಂಗ್ಸೈಡ್ಡ್ ಬರೊಂದಿತ್ತಿನ ರಿಕ್ಷಾಗ್ ಎಡ್ತ್ದ್ಂಡ್. ಎಡ್ತಿನ ಬರಸ್ಗ್ ರಿಕ್ಷಾ ಕಬ್ಬೆ ಬೂರ್ದಿತ್ತ್ದ್ ಐಟ್ ಇತ್ತಿನ ಒಂಜೇ ಇಲ್ಲದ ಆಜಿ ಜನೊಕುಲಾ ಗಡಿಕುಲಾತ. ಈ ಬಗೆಟ್ ಪೊಲೀಸ್ ಸ್ಟೇಷನ್ಡ್ ಪ್ರಕರಣ ದಾಕಲಾತ್ಂಡ್.