Last updated on March 12th, 2026 at 08:22 am
ಜಮ್ಮು, ಮಾ. 12 : ಜಮ್ಮು ಡ್ ನಡತಿನ ಒಂಜಿ ಮದಿಮೆದ ಲೇಸ್ಡ್ ಜಮ್ಮು-ಕಾಶ್ಮೀರದ ಮಾಜಿ ಮುಖ್ಯಮಂತ್ರಿ ಫಾರೂಕ್ ಅಬ್ದುಲ್ಲಾ ಮೆರೆನ ಮಿತ್ತ್ ಗುಂಡುದ ದಾಳಿ ಆತ್ಂಡ್. ಆರ್ ಒಂತೆ ಅಂತರೊಡೇ ಬಚಾವಾದಿತ್ತ್ದ್, ಭದ್ರತಾ ಸಿಬ್ಬಂದಿ ಶೂಟ್ ಮಲ್ತಿನಾಯನ್ ಪತ್ತ್ದೆರ್.
ಜಮ್ಮು-ಕಾಶ್ಮೀರದ ಮಾಜಿ ಮುಖ್ಯಮಂತ್ರಿ ಬೊಕ್ಕ ನ್ಯಾಷನಲ್ ಕಾನ್ಫರೆನ್ಸ್ ಅಧ್ಯಕ್ಷೆ ಡಾ. ಫಾರೂಕ್ ಅಬ್ದುಲ್ಲಾ ಮೆರೆನ್ ಈಡ್ ಮಲ್ತ್ ಶೂಟ್ ಮಲ್ತಿತ್ತ್ದ್, ಒಂತೆಟೇ ಬಚಾವಾತೆರ್. ಬುಧವಾರ (ಮಾರ್ಚ್ 11) ಜಮ್ಮುದ ಗ್ರೇಟರ್ ಕೈಲಾಶ್ ಪ್ರದೇಶೊಡು ನಡತಿನ ಲಾಯರ್ ಒರಿಯನ ಮದಿಮೆಗ್ ಅಬ್ದುಲ್ಲಾ ಪೋದಿತ್ತೆರ್. ಶೂಟ್ ಮಲ್ತಿನ ಕಮಲ್ ಸಿಂಗ್ ಜಮ್ವಾಲ್ ಪನ್ಪಿನಾಯನ್ ಭದ್ರತಾ ಸಿಬ್ಬಂದಿ ಪತ್ತ್ದ್ ಉಲಕೈ ಮಲ್ತೊಂದಿತ್ತ್ದ್, ಪೊಲೀಸೆರ್ ಜಡ್ತೆ ಸುರು ಮಲ್ತ್ದೆರ್.
ಘಟನೆದ ಬಗೆಠ್ ಪಾತೆರ್ನ ಜಮ್ಮು-ಕಾಶ್ಮೀರ ಮುಖ್ಯಮಂತ್ರಿ ಬೊಕ್ಕ ಫಾರೂಕ್ ಅಬ್ದುಲ್ಲಾನ ಮಗೆ ಒಮರ್ ಅಬ್ದುಲ್ಲಾ, ‘ದೇಬೆರೆ ದಯೆಟ್ ಎನ್ನ ಅಮ್ಮೆರ್ ಬಚಾವಾತೆರ್. ಈ ದಾಳಿ ಮಲ್ದಿನಿ ದಾಯೆ, ಏರ್ ಪನ್ಪಿ ಬಗೆಟ್ ಪತ್ತ ಒಲವು ಇಜ್ಜಿ. ಆಂಡ ಲೋಡ್ ಆದಿತ್ತಿನ ಪಿಸ್ತೂಲ್ ಇತ್ತಿನಾಯೆ ಒರಿ ಎನ್ನ ಅಮ್ಮೆರೆ ಕೈತಡೆ ಬತ್ತ್ದ್ ಶೂಟ್ ಮಲ್ತ್ದೆ ಪನ್ದ್ ತೆರಿದ್ ಬೈದ್ಂಡ್ ಪನ್ದ್ ಪನ್ಡೆರ್.
ಫಾರೂಕ್ ಅಬ್ದುಲ್ಲಾ ಮೆರೆಗ್ ಭದ್ರತಾ ವ್ಯವಸ್ಥೆ ಮಲ್ತ್ದೆರ್. ಆರೆನ ಒಟ್ಟುಗು ಜಮ್ಮು ಕಾಶ್ಮೀರ ಉಪಮುಖ್ಯಮಂತ್ರಿ ಸುರೀಂದರ್ ಚೌಧರಿ ಲಾ ಇತ್ತೆರ್. ಚೌಧರಿಗ್ ಕಿಞ್ಞ ಕಿಞ್ಞ ಗಡಿಕುಲಾದಿತ್ತ್ದ್, ಆರೆಗ್ ರಪಕ್ಕ ಮರ್ದ್ ಮಲ್ತ್ದೆರ್. ಮದಿಮೆದ ಮಂಟಮೆದ ಪಿದಯಿ ಆರೋಪಿ ಕಾತೊಂದಿತ್ತೆ. ಅಬ್ದುಲ್ಲಾ ಬೊಕ್ಕ ಚೌಧರಿ ಪಿದಯಿ ಬತ್ತಿನೇ ಅಕಲೆಗ್ ಶೂಟ್ ಮಲ್ಪೆರ ತೂತೆ. ಅಪಗ, ಅಲ್ಪನೇ ಇತ್ತಿನ ಇರ್ವೆರ್ ಪೊಲೀಸ್ ಅಧಿಕಾರಿಲು ಆಯನ್ ಉಂತಾದೆರ್ ಪನ್ದ್ ಅಧಿಕಾರಿಲು ಪನ್ತೆರ್.
ಪ್ರಾಥಮಿಕ ಜಡ್ತೆಡ್ ಕಮಲ್ ಸಿಂಗ್ ಜಮ್ವಾಲ್ಗ್ ಫಾರೂಕ್ ಅಬ್ದುಲ್ಲಾನ ಮಿತ್ತ್ ಪಾಕ ವರ್ಸೊರ್ದಿಂಚಿ ಪಗೆ ಇತ್ತ್ಂಡ್, ಶೂಟ್ ಮಲ್ಪೆರೆ ಬತ್ತಿನ ಪೊರ್ತುಡು ಸಮ ಕುಡ್ಚಿದಿತ್ತೆ ಪನ್ದ್ ತೆರಿದ್ ಬೈದ್ಂಡ್. ಈ ದಾಳಿ ರಾಜಕೀಯ ಪ್ರೇರಿತ ಅತ್ತ್ ಪನ್ದ್ ತೆರಿದ್ ಬೈದ್ಂಡ್. ಎಚ್ಚಿಗೆ ಒಲವು ನನ ತೆರಿದ್ ಬರೊಡಾತೆ.