Last updated on March 20th, 2026 at 09:48 am
ಹುಬ್ಬಳ್ಳಿ, ಮಾ. 20: ಅಪ್ರಾಪ್ತ ಪ್ರಾಯದಕುಲು ರೀಲ್ಸ್ಗ್ ಬೋಡಾದ್ ಕಾರ್-ಬೈಕ್ ಸ್ಟಂಟ್ ಮಲ್ಪರೆ ಪೋದು ಒರಿ ಆಣ್ ಜೂವ ಕಲೆವೊಂದಿನ ನಡಕೆ ಗುರುವಾರ ನಡತ್ದ್ಂಡ್.
ತೀರ್ದಿನ ಆಣನ್ ಹುಬ್ಬಳ್ಳಿ ಬಿಜೆಪಿ ಮುಖಂಡೆ ಒರಿಯನ ಮಗೆ ನಮೀಷ್ ಸಂಗಳದ ಪನ್ದ್ ಗುರ್ತ ಪತ್ತ್ದೆರ್. ಮೈಸೂರ್ಡ್ 9 ನೇ ಕ್ಲಾಸ್ ಓದೊಂದಿತ್ತಿನ ಉಂಬ್ಯೆ ಯುಗಾದಿದ ರಜೆಟ್ ಇಲ್ಲಗ್ ಬತ್ತಿತ್ತೆ. ದೋಸ್ತಿಲೆನ ಒಟ್ಟುಗು ಐಷಾರಾಮಿ ಆಡಿ ಕಾರು ಬೊಕ್ಕ ಬೈಕ್ಡ್ ಸ್ಟಂಟ್ ಮಲ್ಪರೆ ಪೋತೆರ್. ಈ ಪೊರ್ತುಡು ಕಾರ್ ಅಂಕೆ ತತ್ತ್ದ್ ನಮೀಷ್ ಸಂಗಳದ ಬುಡೊಂದಿತ್ತಿನ ಬೈಕ್ಗ್ ಎಡ್ತ್ದ್ಂಡ್. ಕಾರ್ದ ಎದುರು ಮೆಯಿ ಒಂತೆ ಞಕ್ಕೆ ಆತ್ಂಡ್, ನಮೀಷ್ ಅಲ್ಪನೇ ತೀರ್ದೆ.
ಬಿಜೆಪಿ ಮುಖಂಡೆ ವೀರೇಶ ಸಂಗಳದ ಮೆರೆನ ಇಲ್ಲಡ್ ಯುಗಾದಿದ ದಿನೊನೇ ಅತ್ತಂದಿ ನಡಕೆ ನಡತ್ದ್ಂಡ್. ಪಾಕ ಜನ ಬಿಜೆಪಿ ಕಾರ್ಯಕರ್ತೆರ್ ಬೊಕ್ಕ ಮುಖಂಡೆರ್ ಬತ್ತ್ದ್ ಸಾಂತ್ವನ ಪನ್ಡೆರ್.
ವಿದ್ಯಾನಗರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಹುಬ್ಬಳ್ಳಿ-ಧಾರವಾಡ ಪೊಲೀಸ್ ಆಯುಕ್ತೆ ಎನ್. ಶಶಿಕುಮಾರ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಎಡ್ತೆಗ್ ನೆವನ ಆತಿನ ಅಪ್ತಾಪ್ತ ಆಣನ್ ವಿಚಾರಣೆ ಮಲ್ತ್ದೆರ್. ಲೈಸನ್ಸ್ದಾಂತೆ ಕಾರ್ ಬೊಕ್ಕ ಬೈಕ್ ಬುಡ್ಯೆರ ಅವಕಾಶ ಕೊರ್ತಿನ ಬಗೆಟ್ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್.