Last updated on May 8th, 2026 at 02:57 pm
ಮಡಿಕೇರಿ, ಮೇ 08: : ಪೋವೊಂದಿತ್ತಿನ ಬಸ್ಡೇ ಡ್ರೈವರ್ಗ್ ಹಾರ್ಟ್ ಅಟ್ಯಾಕ್ ಆದ್ ಅಲ್ಪನೇ ತೀರ್ದಿನ ನಡಕೆ ಮಡಿಕೇರಿ ಕೈತಲ್ದ ತಾಳತ್ತಮನೆ ತಲ್ಪ ರಾಷ್ಟ್ರೀಯ ಪೆರ್ಸಾದಿಡ್ ಇನಿ ಪುಲ್ಯಾನಗ ನಡತ್ದ್ಂಡ್. ಡ್ರೈವರ್ನ ಸಮಯಪ್ರಜ್ಞೆರ್ದಾವರ ಬಸ್ಸ್ಡ್ ಇತ್ತಿನ 20 ಪ್ರಯಾಣಿಕೆರ್ ಬಚಾವಾತೆರ್. ತೀರ್ದಿನಾರೆನ್ ಬೆಂಗಳೂರು ಮೂಲೊದ ಶಿವಕುಮಾರ್ (50) ಪನ್ದ್ ಗುರ್ತ ಪತ್ತ್ದೆರ್.
ಮಡಿಕೇರಿರ್ದ್ ಸುಳ್ಯದಂಚಿ ಪೋವೊಂದಿತ್ತಿನ ಪ್ರೈವೇಟ್ ಬಸ್ ಇನಿ ಪುಲ್ಯ 4:45ತ ಅಂದಾಜಿಗ್ ತಾಳತ್ತಮನೆ ಎತ್ತನಗ ಈ ನಡಕೆ ನಡತ್ದ್ಂಡ್. ಬಸ್ ಬುಡೊಂದುಪ್ಪುನಗನೇ ಶಿವಕುಮಾರ್ಗ್ ಹಾರ್ಟ್ ಅಟ್ಯಾಕ್ ಆತ್ಂಡ್. ಆ ಪೊರ್ತುಡು ಅಂಕೆ ತತ್ತಿನ ಬಸ್ ಸಾದಿದ ಬಲತ್ತ ಮೆಯಿಕ್ ಬರೆಕ್ ಎಡ್ತ್ದ್ ಗೋಡ ಆದ್ ಉಂತುದುಂಡು.
ಬಸ್ ಬೀಸ ಪೋವೊಂದಿತ್ತ್ಂಡಲಾ ಮಲ್ಲ ಮಟ್ಟ್ದ ಅನಾಹುತ ಆವಂದೆ, ಬರೆಕ್ ತಾಂಗ್ದ್ ಉಂತಿನೆರ್ದಾವರ ಪ್ರಯಾಣಿಕೆರ್ ಮಾತೆರ್ಲಾ ಸುರಕ್ಷಿತವಾದುಲ್ಲೆರ್. ನಡಕೆ ನಡತಿನ ಒಂತೆ ಪೊರ್ತುಡೇ ಶಿವಕುಮಾರ್ ತೀರ್ದೆರ್ ಪನ್ದ್ ಪೊಲೀಸೆರ್ ತೆರಿಪಾದೆರ್. ಈ ಬಗೆಟ್ ಮಡಿಕೇರಿ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಪುನೊನು ಮರಣೋತ್ತರ ಪರೀಕ್ಷೆಗ್ ಕಡಪುಡ್ದೆರ್.