Last updated on June 5th, 2026 at 08:40 am
ಸುಳ್ಯ, ಜೂ. 04: ದುಗಲಡ್ಕ ಕೈತಲ್ದ ಕಂದಡ್ಕಡ್ 40 ಫೀಟ್ ಗಂತ್ದ ಗೂವೆಲ್ಗ್ ಆಕಸ್ಮಿಕವಾದ್ ಬೂರ್ದಿನ ಆಂಜೊವು ಒರಿಯನ್ ಸುಳ್ಯ ಅಗ್ನಿಶಾಮಕ ದಳೊದ ಸಿಬಂದಿ ಸಾಹಸಮಯ ಕಾರ್ಯಾಚರಣೆ ಮಲ್ತ್ದ್ ರಕ್ಷಣೆ ಮಲ್ದಿನ ನಡಕೆ ಜೂನ್ 4ತಾನಿ ಗುರುವಾರ ನಡತ್ದ್ಂಡ್.
ಸುಳ್ಯ ತಾಲೂಕ್ದ ಕಸಬ ಗ್ರಾಮೊದ ಕಂದಡ್ಕಡ್ ನವೀನ್ ಕುಮಾರ್ ಪನ್ಪಿನಾರ್ ಆರೆನ ಇಲ್ಲದ ಸುಮಾರ್ ನಲ್ಪ ಫೀಟ್ ಗಂತ್ದ ಗೂವೆಲ್ದ ಕೆಸರ್ ದೆಪ್ಪೆರ ಜತ್ತಿತ್ತೆರ್. ಬೇಲೆ ಮಲ್ತೊಂದುಪ್ಪುನಗ ಗೂವೆಲ್ಡ್ ಆಮ್ಲಜನಕೊದ ಪ್ರಮಾಣ ಕಮ್ಮಿ ಆದಿತ್ತ್ದ್, ದಮ್ಮು ದೆಪ್ಪೆರಾವಂದೆ ಆರ್ ಮತಿ ತತ್ತ್ದ್ ಗೂವೆಲ್ಡೇ ಕುಸ್ಕ್ದ್ ಬೂರ್ದೆರ್.
ನಡಕೆದ ಬಗೆಟ್ ಒಲವು ತಿಕ್ಕಿನ್ನೇ ಅಗ್ನಿಶಾಮಕ ದಳೊದ ಸಿಬ್ಬಂದಿ ಜಾಗೆಗ್ ಬತ್ತ್ದ್ ತುರ್ತು ರಕ್ಷಣಾ ಕಾರ್ಯಾಚರಣೆ ಸುರು ಮಲ್ತ್ದೆರ್. ಈ ಪೊರ್ತುಡು ಗೂವೆಲ್ದುಲಯಿ ಜತ್ತಿನ ಸಿಬ್ಬಂದಿ ನಾಗರಾಜ್ ಪೂಜಾರಿ ಮೇರ್ ಆಮ್ಲಜನಕೊದ ಕುಂದೆಲ್ ಇಪ್ಪುನೆನ್ ತೆರಿದ್ ಅಪಗನೇ ಬೋಡಾಪಿನ ಅಗತ್ಯ ಸುರಕ್ಷತಾ ಕ್ರಮೊಕುಲೆನ್ ದೆತೊಂಡೆರ್. ಬೊಕ್ಕ ಆಕ್ಸಿಜನ್ ಕಿಟ್ ಪಾಡೊಂದು ಕುಡ ಗೂವೆಲ್ಗ್ ಜತ್ತ್ದ್ ಪ್ರಾಣಾಪಾಯೊದ ಸ್ಥಿತಿಟಿತ್ತಿನ ನವೀನ್ ಕುಮಾರ್ ರೆನ್ ಸುರಕ್ಷಿತವಾದ್ ಮಿತ್ತ್ ಲೆತೊಂದು ಬತ್ತ್ದೆರ್. ನವೀನ್ ಕುಮಾರ್ ರೆಗ್ ಅಲ್ಪನೇ ಕಡೀರ ಮರ್ದ್ ಮಲ್ತ್ದ್, ಬೊಕ್ಕ ಎಚ್ಚಿಗೆ ಮರ್ದ್ಗ್ ಆಂಬುಲೆನ್ಸ್ಡ್ ಕೈತಲ್ದ ಆಸ್ಪತ್ರೆಗ್ ದಾಕಲ್ತ್ದೆರ್.
ಅಗ್ನಿಶಾಮಕ ಠಾಣಾಧಿಕಾರಿ ಕಿರಣ್ ಕುಮಾರ್ ಮೆರೆನ ಮುತಾಲಿಕೆಡ್ ನಡತಿನ ಕಾರ್ಯಾಚರಣೆಡ್ ಸಿಬಂದಿಲಾಯಿನ ನಾಗರಾಜ್, ಮಹಮ್ಮದ್ ರಫಿಕ್, ಹರ್ಷವರ್ಧನ್, ಮೋಹನ್ ಬಾಬು, ಹರೀಶ್ ಗೌಡ, ಆನಂದ್ ಹಾಗೂ ರಾಜೇಶ್ ಎಸ್.ಕೆ. ಪಾಲ್ಪಡೆಯೆರ್.