Last updated on June 10th, 2026 at 01:27 pm
ಹೊನ್ನಾವರ, ಜೂ. 10 : ಪಲ್ಲಿಡ್ ಭಕ್ತಿಭಾವೊಡು ಅಸರ್ ನಮಾಜ್ಗ್ ಬಾಂಗ್ ಲೆತ್ತೊಂದಿತ್ತಿನ ಪವಿತ್ರ ಪೊರ್ತುಡೇ ಮೌಲ್ವಿ ಒರಿ ಹಾರ್ಟ್ ಅಟ್ಯಾಕ್ ಆದ್ ತೀರ್ದಿನ ನಡಕೆ ಉತ್ತರ ಕನ್ನಡ ಜಿಲ್ಲೆದ ಹೊನ್ನಾವರ ತಾಲೂಕ್ದ ಕಾಸರಕೋಡ ಟೊಂಕಾಡ್ ಕೋಡೆ, ಅಂಗಾರೆ ಬಯ್ಯಡ್ ನಡತ್ದ್ಂಡ್.
ತೀರ್ದಿನಾರೆನ್ ಕುಡ್ಲ ಮೂಲೊದ ಕುಕ್ಕಾಜೆದ ಅಬ್ದುಲ್ ಲತೀಫ್ ಮದನಿ ಪನ್ದ್ ಗುರ್ತ ಪತ್ತ್ದೆರ್. ಮೇರ್ ಇಸ್ಲಾಮಿಕ್ ಧಾರ್ಮಿಕ ಬೊಕ್ಕ ಮದರಸಾ ಶಿಕ್ಷಣೊನು ಜೋಕುಲೆಗ್ ಕಲ್ಪಾಯೆರ ಆಜಿ ತಿಂಗೊಲುಗು ದುಂಬು ಕುಡ್ಲರ್ದ್ ಹೊನ್ನಾವರದ ಕಾಸರಕೋಡ ಟೊಂಕಾದ ಎಮ್.ಜೆ.ಎಮ್ (MJM) ಪಲ್ಲಿಗ್ ಧಾರ್ಮಿಕ ಗುರು ಆದ್ ಬತ್ತಿತ್ತೆರ್.
ಅಂಗಾರೆ ಬಯ್ಯಡ್ ಏಪೊಲ್ದ ಲೆಕ ಪಲ್ಲಿಡ್ ಅಸರ್ ನಮಾಜ್ಗ್ ದುಂಬು ಮೌಲ್ವಿ ಅಬ್ದುಲ್ ಲತೀಫ್ ಮೇರ್ ಮೈಕ್ ಪತೊಂದು ಬಾಂಗ್ ಲೆತ್ತೊಂದಿತ್ತೆರ್. ಅಪಗನೇ ಆರೆಗ್ ಹಾರ್ಟ್ ಅಟ್ಯಾಕ್ ಆದಿತ್ತ್ದ್, ಮೈಕ್ ಪತೊಂದೇ ಆರ್ ಕುಸ್ಕ್ದ್ ಬೂರ್ದೆರ್. ಮೌಲ್ವಿ ಒರರ್ದ್ ಒರಾನೆ ಬೂರ್ದಿನೆನ್ ತೂಯಿನ ಪಲ್ಲಿಡ್ ಇತ್ತಿನಕುಲು ಆರೆನ್ ಅಪಗನೇ ಹೊನ್ನಾವರದ ಸೆಂಟ್ ಇಗ್ನೇಶಿಯಸ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಆಂಡ ಆಸ್ಪತ್ರೆಗ್ ಎತ್ತುನೆಕ್ ದುಂಬೇ ಮೌಲ್ವಿ ಅಬ್ದುಲ್ ಲತೀಫ್ ತೀರ್ದೆರ್ ಪನ್ದ್ ಡಾಕ್ಟರ್ ದೃಢ ಮಲ್ತ್ದೆರ್.
ಮೌಲ್ವಿಯೆರೆನ ಅಕೇರಿದ ಪೊರ್ತು ಪಲ್ಲಿದ ಉಲಯಿದ ಸಿಸಿಟಿವಿ (CCTV) ಕ್ಯಾಮೆರಾಡ್ ಕೈದಾದಿತ್ತ್ದ್, ಸೋಷಿಯಲ್ ಮೀಡಿಯಾಡ್ ವೈರಲ್ ಆತ್ಂಡ್.