Last updated on July 7th, 2026 at 10:59 am
ಒಡಿಪು, ಜು. 07: ಕೊಲ್ಲೂರ್ ಶ್ರೀ ಮೂಕಾಂಬಿಕಾ ದೇಲಂತಡೆಡ್ ಒರ್ತಿನ ವ್ಯಾನಿಟಿ ಬ್ಯಾಗ್ರ್ದ್ 80,000 ರೂ. ಕಾಸ್ ಕನ್ಡ್ದಿನ ಆರೋಪಡ್ ಕೊಲ್ಲೂರ್ ಪೊಲೀಸೆರ್ ಕಾಲಿ 24 ಗಂಟೆದುಲಯಿ ಕನ್ಡ್ದಿನ ಮೂವೆರ್ ಪೊಂಜೊವುಲೆನ್ ಕೈದ್ ಮಲ್ತ್ದೆರ್.
ಕೈದಾತಿನಕಲೆನ್ ನೇತ್ರಾವತಿ (33), ಶಾರದಾ (50) ಬೊಕ್ಕ ದುರ್ಗಮ್ಮ (44) ಪನ್ದ್ ಗುರ್ತ ಪತ್ತ್ದಿತ್ತ್ದ್, ಮಾತೆರ್ಲಾ ಶಿವಮೊಗ್ಗ ಜಿಲ್ಲೆದ ಭದ್ರಾವತಿ ಮೂಲೊದಕುಲು.
ಪೊಲೀಸೆರೆ ಪ್ರಕಾರ, ಜುಲೈ 5 ತಾನಿ ನಿಮಿಷಾ ಬೊಕ್ಕ ಆರೆನ ಕಂಡನಿ ಪ್ರಜೋಶ್ ಅಪ್ಪೆ ಮೂಕಾಂಬಿಕೆನ ದರ್ಶನೊಗು ಕೊಲ್ಲೂರ್ ದೇಲಂತಡೆಗ್ ಬತ್ತಿತ್ತೆರ್. ಕಾಂಡೆ 8.20 ದ ಅಂದಾಜಿಗ್, ದೇಲಂತಡೆದ ಆವರಣೊರ್ದು ಪಿದಯಿ ಬನ್ನಗ, ನಿಮಿಷಾ ಆರೆನ ವ್ಯಾನಿಟಿ ಬ್ಯಾಗ್ದ ಜಿಪ್ ಓಪನ್ ಇಪ್ಪುನೆನ್ ತೂದು, ಬ್ಯಾಗ್ದುಲಯಿ ತೂನಗ, 80,000 ರೂ. ಕಾಸ್ ಇತ್ತಿನ ಪರ್ಸ್ ಕಾಣೆ ಆತಿನ ತೆರಿದ್ ಬೈದ್ಂಡ್.
ದೇಲಂತಡೆದ ಸುತ್ತಮುತ್ತ ನಾಡ್ಂಡಲಾ ದಾಲ ತೆರಿಯಂದಿನೆರ್ದಾವರ ನಿಮಿಷಾ ಕೊಲ್ಲೂರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಪೋಲೀಸೆರ್ ಒಯಿಲ್ದ ಆಧಾರೊಡು ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತ್ದೆರ್.
ಸಿಸಿಟಿವಿ ಫೂಟೇಜ್, ಅಲ್ಪದ ಸಾರ್ವಜನಿಕೆರ್ ದೆತ್ತಿನ ಫೋಟೋ ಬೊಕ್ಕ ತಾಂತ್ರಿಕ ಪುರಾಪುಲೆನ ಸಕಾಯೊಡು ಪೊಲೀಸೆರ್ ಆರೋಪಿಲೆನ್ ನಾಡ್ಪತ್ತಿಯೆರ್. ಪ್ರಕರಣ ದಾಕಲಾತಿನ 24 ಗಂಟೆದುಲಯಿ ಮೂವೆರೆನ್ ಕೈದ್ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ನ್ಯಾಯಂತಡೆ ಆರೋಪಿಲೆಗ್ ನ್ಯಾಯಾಂಗ ಕೈದ್ ಕೊರ್ತುಂಡು.
ದುರ್ಗಮ್ಮನ ಮಿತ್ತ್ ದುಂಬೇ ರಡ್ಡ್ ಕಲ್ವೆದ ಪ್ರಕರಣೊಲು ದಾಕಲಾದುಲ್ಲ – ಒಂಜಿ ಮೈಸೂರ್ದ ಲಷ್ಕರ್ ಪೊಲೀಸ್ ಸ್ಟೇಶನ್ಡ್ ಬೊಕ್ಕ ಕುಡೊಂಜಿ ಭದ್ರಾವತಿದ ಓಲ್ಡ್ ಟೌನ್ ಪೊಲೀಸ್ ಸ್ಟೇಶನ್ಡ್ ದಾಕಲಾದುಂಡು. ಶಾರದಾ ನ ಮಿತ್ತ್ ಬೆಂಗಳೂರ್ ನಗರ ರೈಲ್ವೆ ಪೊಲೀಸ್ ಸ್ಟೇಶನ್ಡ್ ರಡ್ಡ್ ಬೊಕ್ಕ ಮೈಸೂರ್ದ ಅಶೋಕಪುರಂ ಪೊಲೀಸ್ ಸ್ಟೇಶನ್ಡ್ ಒಂಜಿ ಸೇರ್ದ್ ಒಟ್ಟು ಮೂಜಿ ಕಲ್ವೆದ ಪ್ರಕರಣೊಲು ದಾಕಲಾದುಲ್ಲ ಪನ್ದ್ ಪೊಲೀಸೆರ್ ತೆರಿಪಾದೆರ್.