Last updated on July 11th, 2026 at 08:51 am
ಕುಡ್ಲ, ಜು. 11: ಕಾಲೇಜ್ದ ಪೊಣ್ಣುಲೆಗ್ ಬಸ್ಡ್ ಲೈಂಗಿಕ ಉಪದ್ರ ಕೊರ್ತಿನ ಆರೋಪಡ್ ಪ್ರೈವೇಟ್ ಬಸ್ದ ಕಂಡಕ್ಟರ್ ಒರಿಯನ್ ತೆನ್ಕಾಯಿ ಕುಡ್ಲ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೈದಾತಿನಾಯನ್ ಇರ್ಫಾನ್ (32) ಪನ್ದ್ ಗುರ್ತ ಪತ್ತ್ದೆರ್. ಇಂಬ್ಯೆ ಉಬಾರ್ಗ್ ಕೈತಲ್ದ ಕಲ್ಲೇರಿ ನಿವಾಸಿ ಆದಿತ್ತ್ದ್, ಇತ್ತೆ ಉಬಾರ್ದ ಕರ್ವೇಲ್ ದಲ್ಪ ಬಾಡಾಯಿದ ಇಲ್ಲಡ್ ಉಲ್ಲೆ. ಕುಡ್ಲ-ಇಟ್ಟೆಲ್ ರೂಟ್ಡೆ ಪೋಪುನ ಪ್ರೈವೇಟ್ ಬಸ್ಡ್ ಕಂಡಕ್ಟರ್ ಆದ್ ಬೇಲೆ ಮಲ್ತೊಂದುಲ್ಲೆ.
ಪೊಲೀಸೆರೆ ಪ್ರಕಾರ, ಜುಲೈ 9 ದಾನಿ ಬಯ್ಯಡ್ ಸುಮಾರ್ 5 ಗಂಟೆದ ಅಂದಾಜಿಗ್ ಬಸ್ಡ್ ಕುಲ್ಲುದಿತ್ತಿನ ಕಾಲೇಜ್ ಪೊಣ್ಣುಲೆನ್ ಈಡ್ ಮಲ್ತ್ದ್ ಆರೋಪಿ ಆಯನ ಗುಪ್ತಾಂಗೊನು ತೋಜಾದ್ ಅಸಭ್ಯ ಸನ್ನೆ ಮಲ್ತಿನತ್ತಂದೆ, ಪಿರವುದ ಸೀಟ್ಗ್ ಬರ್ಯೆರ ಲೆತ್ತ್ದ್ ಲೈಂಗಿಕ ಉಪದ್ರ ಕೊರ್ತೆ ಪನ್ಪಿ ಆರೋಪ ಕೇನ್ದ್ ಬೈದ್ಂಡ್.
ಈ ಬಗೆಟ್ ತೆನ್ಕಾಯಿ ಕುಡ್ಲ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಜುಲೈ 10 ತಾನಿ ಆರೋಪಿನ್ ಕೈದ್ ಮಲ್ತ್ದೆರ್. ಪ್ರಕರಣೊದ ಬಗೆಟ್ ಪೊಲೀಸೆರ್ ನನದ ಜಡ್ತೆ ಮಲ್ತೊಂದುಲ್ಲೆರ್.