Last updated on July 29th, 2026 at 08:19 am
ಕೋಳಿಕ್ಕೋಡ್, ಜು. 28: ಕೇರಳದ ಕೋಳಿಕ್ಕೋಡ್ ಗ್ರಾಮೀಣ ಪೊಲೀಸೆರೆ ವಿಶೇಷ ಜಡ್ತೆ ಕೂಟ (SIT) ಮಲ್ತೊಂದುಪ್ಪುನ ಎಂಡಿಎಂಎ (MDMA) ಮಾದಕ ಸೊತ್ತು ಜಾಲೊದ ಜಡ್ತೆಡ್ ಕುಡೊಂಜಿ ಶಾಕಿಂಗ್ ವಿಷಯ ಬೊಲ್ಪುಗು ಬೈದ್ಂಡ್, ಪೆರಂಬ್ರಾ ಬಿಆರ್ಸಿದ ಮೂಜನೇ ವಿಶೇಷ ಟೀಚರ್ ವಿ.ಪಿ. ನೀಶ್ಮಾ (30) ಅಂಗಾರೆ ಕೈದಾತೆರ್.
ಆಟಿಸಂ ಕೇಂದ್ರೊದ ವಿಶೇಷ ಟೀಚರ್, ಅವಲಾ ಕುಟ್ಟೋತ್ ಮೂಲೊದ ವಿ.ಪಿ. ನೀಶ್ಮಾ ಕೈದಾಯಿನೆರ್ದಾವರ ಪ್ರಕರಣೊಡು ತಿಕ್ಕ್ದ್ ಬೂರ್ದಿನ ಟೀಚರ್ನಕಲೆನ ಸಂಖ್ಯೆ 3ಕ್ ಏರ್ದ್ಂಡ್. ಇಂದೆಕ್ ದುಂಬು ದೈಹಿಕ ಶಿಕ್ಷಣ ಟೀಚರ್ ಕೀರ್ತನಾ ಬೊಕ್ಕ ಕಾವ್ಯಾ ಪನ್ಪಿನಕಲೆನ್ ಕೈದ್ ಮಲ್ತ್ದ್ ಬೇಲೆರ್ದ್ ದೆತ್ತ್ದಿತ್ತೆರ್. ಈ ಮೂಜಿ ಜನಲಾ ಏಪೊಲಾ ಮಾದಕ ದ್ರವ್ಯ (MDMA) ಗೆತೊನೊಂದಿತ್ತಿನತ್ತಂದೆ, ಇನ್ಸ್ಟಾಗ್ರಾಮ್ ಮುಕೇನ ಗಿರಾಕಿಲೆನ್ ಒಯ್ತ್ದ್ ಹೈಟೆಕ್ ದಂಧೆ ಮಲ್ತೊಂದಿತ್ತೆರ್ ಪನ್ದ್ ವಟಕರ ಇನ್ಸ್ಪೆಕ್ಟರ್ ಎ.ವಿ. ದಿನೇಶ್ ಪನ್ಡೆರ್.
ಮಾದಕ ಸೊತ್ತುದ ಜಾಲೊದ ಕೊಲಿಕ್ಕೆ ಗಲ್ಫ್ ದೇಶೊದ ನಂಬರ್ಗ್ ಲಿಂಕ್ ಆದಿತ್ತ್ದ್, ಗಲ್ಫ್ ನಂಬರ್ದ ಮುಕೇನ ವಾಟ್ಸಾಪ್/ಮೆಸೇಜ್ ಮಲ್ತ್ದ್ ಬುಕಿಂಗ್ ಮಲ್ತೊಂದಿತ್ತೆರ್. ಕಾಸ್ ಕಟ್ಟೆರ ಕೀರ್ತನಾ ನ ಕ್ಯೂಆರ್ ಕೋಡ್ ಗಲಸೊಂದಿತ್ತೆರ್. ಕಾಸ್ ಕಟ್ಟಿನೇ ಡ್ರಗ್ಸ್ ದೆಂಗಾದ್ ದೀತಿನ ಜಾಗೆದ ಫೋಟೋ ಕಡಪುಡ್ದ್ ಡೆಲಿವರಿ ಮಲ್ಪೆದೆರ್. ಕೀರ್ತನಾ ನ ಅಕೌಂಟ್ಗ್ ₹14 ಲಕ್ಷ ಅಂಚೆನೇ ಕಾವ್ಯಾ ನ ಅಕೌಂಟ್ಗ್ ಕಾಲಿ 5 ತಿಂಗೊಲುಡು ₹9 ಲಕ್ಷ ಜಮೆ ಆತಿನ ತೆರಿದ್ ಬೈದ್ಂಡ್. ತಿಂಗೊಲುಗು ಕಾಲಿ ₹12,000 ಕಾಂಟ್ರಾಕ್ಟ್ ಪಡಿ ಗೆತೊನೊಂದಿತ್ತಿನ ಈ ಟೀಚರ್ನಕಲೆಗ್ ಕುಡ್ಲ ಮೂಲೊದ ಒರಿ ದೋಸ್ತಿ ಈ ದಂಧೆದ ಗುರ್ತ ಮಲ್ತ್ ಕೊರ್ದಿತ್ತೆಗೆ, ಮೊಕುಲು ಬೆಂಗಳೂರ್ಗ್ ಬೆರಬೆರಿ ಪೋವೊಂದು ಬರೊಂದು ಇಪ್ಪುನ ಬೊಕ್ಕ ಅಕುಲು ಗೆತೊಂದಿನ ಐಷಾರಾಮಿ ಕಾರ್ದ ಮೂಲೊದ ಬಗೆಟ್ ಎಸ್ಐಟಿ ಜಡ್ತೆ ಮಲ್ತೊಂದುಂಡು.