Last updated on July 29th, 2026 at 08:39 am
ಮಂಜೇಶ್ವರ, ಜು. 29: ಕಾಸರಗೋಡು ಜಿಲ್ಲಾ ಕುಲಾಲ ಸಂಘ ಮಂಜೇಶ್ವರ ಶಾಖೆದ ಮಹಾಸಭೆ ಬೊಕ್ಕ ಆಟಿದ ಕೂಟ ಲೇಸ್ ತೂಮಿನಾಡ್, ಕುಂಜತ್ತೂರ್ದ ಜಿಲ್ಲಾ ಕುಲಾಲ ಸಮುದಾಯ ಭವನೊಡು 26 ನೇ ಜುಲೈ 2026 ಐತಾರದಾನಿ ನಡತ್ಂಡ್.
ಈ ಲೇಸ್ನ್ ಶ್ರೀ ಲಕ್ಕಣಪಾಲ್ ಮೂಲಸ್ಥಾನೊದ ಗೌರವಾಧ್ಯಕ್ಷೆರಾಯಿನ ಕೊರಗಪ್ಪ ಬಂಗೇರ ಮಣಿಹಳ್ಳ ಮೇರ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಮಂಜೇಶ್ವರ ಕುಲಾಲ ಶಾಖೆದ ಅಧ್ಯಕ್ಷೆರಾಯಿನ ಗೋಪಾಲ ಸಾಲ್ಯಾನ್ ಕುಂಜತ್ತೂರ್ ಲೇಸ್ದ ಗುರ್ಕಾರ್ಮೆದ ವಯಿತೊಂಡೆರ್. ಮಲ್ಲ ಬಿನ್ನೆರಾದ್ ಜಿಲ್ಲಾ ಸಂಘೊದ ಅಧ್ಯಕ್ಷೆರಾಯಿನ ನ್ಯಾಯವಾದಿ ರವೀಂದ್ರ ಮುನ್ನಿಪ್ಪಾಡಿ, ತಾಲೂಕ್ ಪ್ರಚಾರ ಕಾರ್ಯಪ್ರಮುಖ್ ಪ್ರಶಾಂತ್ ಬಡಾಜೆ, ಮಂಜೇಶ್ವರ ಸರ್ವಿಸ್ ಕೋ. ಆಪರೇಟಿವ್ ಬ್ಯಾಂಕ್ದ ನಿರ್ದೇಶಕೆರಾಯಿನ ರಾಮಚಂದ್ರ ಕುಲಾಲ್ ಕಣ್ವತೀರ್ಥ ಪಾಲ್ಪಡೆಯೆರ್. ಆಟಿ ತಿಂಗೊಲ್ದ ವಿಶೇಷತೆ, ಆಚರಣೆದ ಬಗೆಟ್ ಕುಡ್ಲದ ಶಾರದಾ ಪಿ. ಯು. ಕಾಲೇಜ್ದ ಉಪನ್ಯಾಸಕೆರಾಯಿನ ಶ್ರೀಮತಿ ರಂಜನಿ ಅಗರ್ತಬೈಲ್ ಮೇರ್ ಪೊಲಬು ಪಟ್ಟಿಯೆರ್. ದೀಕ್ಷಾ ವುಡ್ ಇಂಡಸ್ಟ್ರೀಸ್ದ ದನಿ ಬಾಲಕೃಷ್ಣ ಬಿ ಬೊಕ್ಕ ಜೆ. ಕೆ. ಇಂಜಿನಿಯರಿಂಗ್ ವರ್ಕ್ಸ್ದ ಜಗದೀಶ್ ವಿ ಕುಲಾಲ್ ಒತ್ತುಪಾಲಿತ್ತೆರ್.
ಮಂಜೇಶ್ವರ ಕುಲಾಲ ಶಾಖೆದ ಕಡೆರ್ದ್ ಪೆರಿಯ ಕೃಷಿಕೆರಾಯಿನ ರಾಮ ಕುಲಾಲ್ ಮಜಲ್ ಕುಂಜತ್ತೂರ್ ಬೊಕ್ಕ ದಿನೇಶ್ ಕುಲಾಲ್ ಅಂಬಿತ್ತಡಿ ಉದ್ಯಾವರ ಮಾಡ ಮೊಕಲೆಗ್ ಗಣ್ಯೆರೆ ಒತ್ತುಪಾಲ್ಡ್ ಗೌರವಾರ್ಪಣೆ ನಡತ್ಂಡ್. ಈ ಪೊರ್ತುಡು ಪ್ರೋತ್ಸಾಹಕ ವಿದ್ಯಾನಿಧಿಗ್ ಅಜತ್ ಬೈದಿನ ಇರ್ವೆರ್ ಪೊಣ್ಣುಲೆಗ್ ವಿದ್ಯಾನಿಧಿ ಪಟ್ಟಿಯೆರ್.
ಕರಿನ ವರ್ಸೊದ ಕಾರ್ಯಕಾರಿ ಸಮಿತಿನ್ ದುಂಬರಿಪುನ ಬಗೆಟ್ ಸಭೆ ಅನುಮೋದನೆ ಕೊರ್ಂಡ್. ಜತೆ ಕಾರ್ಯದರ್ಶಿ ಆನಂದ ಸಾಲ್ಯಾನ್ ವರದಿ ಓದಿಯೆರ್, ಕೋಶಾಧಿಕಾರಿ ಜಗದೀಶ್ ಕುಲಾಲ್ ಲೆಕ್ಕಪತ್ರ ಮಂಡನೆ ಮಲ್ತೆರ್. ಬೇತೆ ಬೇತೆ ಪಂತೊಲು, ನಲಿಕೆಲು, ಆಟಿದ ತೆನಸ್ ವನಸ್ ಇತ್ತ್ಂಡ್. ಕಾರ್ಯದರ್ಶಿ ಈಶ್ವರ್ ಕುಲಾಲ್ ಕಣ್ವತೀರ್ಥ ಎದುಕೊಂದು, ಲೇಸ್ ಸುದಾರ್ಮೆ ಮಲ್ತೆರ್, ತಾರಾನಾಥ ಕುಲಾಲ್ ಸೊಲ್ಮೆ ಸಂದಾಯೆರ್.