Last updated on July 31st, 2026 at 03:46 pm
ಕುಡ್ಲ, ಜು. 31: ಮೋಕೆದ ಪುದರ್ಡ್ ಅಪ್ರಾಪ್ತ ಪೊಣ್ಣನ್ ಕೆಲ ತಿಂಗೊಲು ಮುಟ್ಟ ಗಡೀ ಗಡಿ ಅತ್ಯಾಚಾರ ಮಲ್ತ್ದ್, ಆಲೆನ ಉರ್ಬುಲಿ ಫೋಟೋ ಕಲೆದ್ ವೈರಲ್ ಮಲ್ಪೆ ಪನ್ದ್ ಅಂಚೆನೇ ಇಲ್ಲದಕಲೆನ್ ಕೆರ್ಪೆ ಪನ್ದ್ ಪೋಡಿಕಟ್ಟಾದಿನ ಪ್ರಕರಣೊದ ಆರೋಪಿಗ್ ಕುಡ್ಲದ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ (FTSC-2) ಕಠಿಣ ಶಿಕ್ಷೆ ಕೊರ್ತುಂಡು.
ಮಂಗಳೂರು ತಾಲೂಕ್ದ ಕುಂಜತ್ತಬೈಲ್ ದೇವಿನಗರ ನಿವಾಸಿ ಗಿಲ್ಬರ್ಟ್ ನೊರೊನ್ಹ ಮೆರೆನ ಮಗೆ ಸೋನು ಮ್ಯಾಕ್ಲಿನ್ ನೊರೊನ್ಹ (20) ಪ್ರಕರಣೊದ ಅಪರಾಧಿ. ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ (FTSC-2) ಕುಡ್ಲದ ನ್ಯಾಯಾಧೀಶರೆರಾಯಿನ ಮಾನು ಕೆ.ಎಸ್. ಮೇರ್ ಶಿಕ್ಷೆ ಘೋಷಣೆ ಮಲ್ತ್ದೆರ್.
ಆರೋಪಿ 2024ತ ಫೆಬ್ರವರಿ ತಿಂಗೊಲುರ್ದ್ ಅಪ್ರಾಪ್ತ ಪೊಣ್ಣನ್ ಮೋಕೆ ಮಲ್ಪುನ ನೆವನೊಡು ಗುರ್ತ ಮಲ್ತೊಂದೆ. ಬೊಕ್ಕ 2024ತ ಸೆಪ್ಟೆಂಬರ್ಡ್ ಶಕ್ತಿನಗರೊದ ಚಾಲುಕ್ಯ ಬಾರ್ ಕೈತಲ್ದ ಬಾಡಾಯಿದ ಇಲ್ಲಡ್ ಬೊಕ್ಕ 2024ರ ನವೆಂಬರ್ರ್ದ್ 2025ತ ಜೂನ್ ನಡುಟು ಅಳಪೆ ಗ್ರಾಮೊದ ಕೆಂಬಾರ್ ಕೆಇಬಿ ಎದುರುದ ಒಂಜಿ ಇಲ್ಲಡ್ ಪೊಣ್ಣನ ಮಿತ್ತ್ ಗಡೀ ಗಡಿ ಅತ್ಯಾಚಾರ ಮಲ್ತ್ದೆ ಪನ್ದ್ ಜಡ್ತೆಡ್ ತೆರಿದ್ ಬೈದ್ಂಡ್.
ಈತೇ ಅತ್ತಂದೆ, ಪೊಣ್ಣು ಬೆಂದ್ರ್ಡ್ ಮೀಯೊಂದುಪ್ಪುನಗ ವೀಡಿಯೊ ಕಾಲ್ ಮಲ್ತ್ದ್, ಅವೆತ ಸ್ಕ್ರೀನ್ಶಾಟ್ ಗೆತೊಂದು ಮೊಬೈಲ್ಡ್ ದೀದಿತ್ತೆ. ಬೊಕ್ಕ ದೈಹಿಕ ಸಂಪರ್ಕೊಗು ಬತ್ತಿಜಿಂಡ ಆ ಉರ್ಬುಲಿ ಫೋಟೋ ನ್ ಸಾಮಾಜಿಕ ಬಲೆತ್ತಾನೊಡು ವೈರಲ್ ಮಲ್ಪೆ ಪನ್ದ್ ಅಂಚೆನೇ ಪೊಣ್ಣನ್, ಆಲೆನ ಅಪ್ಪೆ ಬೊಕ್ಕ ಪಲಿನ್ ಕೆರ್ಪೆ ಪನ್ದ್ ಪೋಡಿಕಟ್ಟಾದೆ ಪನ್ಪಿ ಆರೋಪಲಾ ಇತ್ತ್ಂಡ್.
ಈ ಪ್ರಕರಣೊದ ಜಡ್ತೆನ್ ಕಂಕನಾಡಿ ನಗರ ಪೊಲೀಸ್ ಸ್ಟೇಶನ್ದ ಅಪಗದ ಪೊಲೀಸ್ ನಿರೀಕ್ಷಕೆ ಟಿ.ಡಿ. ನಾಗರಾಜ್ ಮೇರ್ ಮಲ್ತ್ದ್, ಪ್ರಬಲ ಸಾಕ್ಷ್ಯಾಧಾರೊಲೆನ್ ಒಟ್ಟು ಮಲ್ತ್ದ್ ನ್ಯಾಯಂತಡೆಗ್ ದೋಷಾರೋಪಣಾ ಪತ್ರ ಸಂದಾದಿತ್ತೆರ್. ಸರ್ಕಾರೊದ ಕಡೆರ್ದ್ ವಿಶೇಷ ಸರ್ಕಾರಿ ಅಭಿಯೋಜಕಿ ಸಹನಾ ದೇವಿ ವಾದ ಮಂಡನೆ ಮಲ್ತೆರ್.
ವಿಚಾರಣೆ ಮಲ್ತಿನ ನ್ಯಾಯಂತಡೆ ಪೋಕ್ಸೋ ಕಾಯ್ದೆದ ಕಲಂ 6 ಬೊಕ್ಕ ಬಿಎನ್ಎಸ್ದ ಕಲಂ 64(2)(m) ಅಡಿಟ್ ಆರೋಪಿಗ್ 20 ವರ್ಸೊದ ಕಠಿಣ ಕರ್ಪಿಲ್ಲ ಶಿಕ್ಷೆ ಬೊಕ್ಕ ₹50,000 ದಂಡ ಪಾಡ್ದ್ಂಡ್. ಒಟ್ಟುಗು ಬಿಎನ್ಎಸ್ ಕಲಂ 77, ಪೋಕ್ಸೋ ಕಾಯ್ದೆದ ಕಲಂ 15 ಬೊಕ್ಕ ಐಟಿ ಕಾಯ್ದೆದ ಕಲಂ 66(E) ಅಡಿಟ್ ಒಂಜೊಂಜಿ ವರ್ಸೊದ ಕರ್ಪಿಲ್ಲ ಶಿಕ್ಷೆ ಬೊಕ್ಕ ₹5,000 ದಂಡ ಪಾಡ್ದ್ ತೀರ್ಪು ಕೊರ್ತುಂಡು.