Last updated on August 8th, 2026 at 07:45 pm
ಒಡಿಪು, ಆ. 08: ಮುದರಂಗಡಿ ಪೇಂಟೆಡ್ ಶುಕ್ರವಾರ (ಆ.07) ಪಟ್ಟಪಗೆಲ್‌ಡೇ ಒರಿಯನ್ ಕೆರ್ತಿನ ಪ್ರಕರಣೊಡು ಒಡಿಪು ಪೊಲೀಸೆರ್ ರಪಕ್ಕ ಕಾರ್ಯಾಚರಣೆಡ್ ಮೂವೆರ್ ಆರೋಪಿಲೆನ್ ಕೈದ್ ಮಲ್ತ್‌ದೆರ್. ನಡಪು ನಡತಿನ ಒಂತೆ ಗಂಟೆದುಲಯಿಡೇ ಪೊಲೀಸೆರ್ ಮಾತಾ ಮೂಜಿ ಜನ ಸುಪಾರಿ ಗೆತೊಂದು ಕೆರ್ತಿನಕಲೆನ್ ಉಲಕೈ ಮಲ್ತೊಂದೆರ್.
ಆರೋಪಿಲೆನ್ ಉತ್ತರ ಪ್ರದೇಶೊದ ರಾಜು (42), ಉತ್ತರಾಖಂಡ ರಾಜ್ಯೊದ ಅಜಯ್ ರಸ್ತೋಗಿ ಯಾನೆ ಅನ್ನೋಲ್ (23) ಬೊಕ್ಕ ಬಿಹಾರ ರಾಜ್ಯೊದ ಜಿಯಾಹುಲ್ ವಜೂಲ್ ಶೇಖ್ ಅಲಿಯಾಸ್ ದೀಪಕ್ (38) ಪನ್ದ್ ಗುರ್ತ ಪತ್ತ್‌ದೆರ್.
ನಡಪುದ ಒಲವು
ಕಾಪು ತಾಲೂಕ್ ಮುದರಂಗಡಿದ ಸೈಂಟ್ ಕ್ಷೇವಿಯರ್ ಚರ್ಚ್‌ದ ಕಾಂಪ್ಲೆಕ್ಸ್‌‌ಡ್ ಡೇವಿಡ್ ಡಿಸೋಜಾ (55) ಪನ್ಪಿನಾರ್ ಪ್ರಿನ್ಸ್ ಎಂಟರ್‌ಪ್ರೈಸಸ್ ಪನ್ಪಿ ಪುದರ್‌ದ ವೈವಾಟ್‌ದ ಆಫೀಸ್ ಮಲ್ತಿತ್ತೆರ್. ಶುಕ್ರವಾರ ಆಫೀಸ್‌ಗ್ ಬತ್ತ್‌ದ್ ಬೊಕ್ಕ ಆರೆನ ಥಾರ್ ಗಾಡಿದಡೆ ಪೋನಗ ಕೆಂಗುಡೆ ಒರಿ ಪಿಸ್ತೂಲ್ ಡ್ ತರೆಕ್ ಶೂಟ್ ಮಲ್ತ್‌ದೆ. ಬೊಕ್ಕ ಆರೋಪಿಲು ಅಲ್ಪರ್ದ್ ಪದ್ರಾಡಾತೆರ್.
ಬಸ್‌ಡ್ ದ್ರಾಡಾತಿನ ಆರೋಪಿಲು
ಮುದರಂಗಡಿರ್ದ್ ಬೈಕ್‌‌ಡ್ ಬಲ್ತಿತ್ತಿನ ಆರೋಪಿಲು ಬೈಕ್‌ನ್ ಎರ್ಮಾಳ್‌ಡ್ ಬುಡ್ದು ಬೊಕ್ಕ ಬಸ್‌ಡ್ ಭಟ್ಕಳ ದಂಚಿ ಪೋತೆರ್. ಇಂದೆತ ಬಗೆಟ್ ಪತ್ತ ಒಲವು ಪೊಲೀಸೆರೆಗ್ ತಿಕ್ಕ್‌ದ್ಂಡ್. ಅಂಚಾದ್ ಪೊಲೀಸೆರ್ ಬೈಂದೂರ್‌ದ ಒತ್ತಿನೆಣೆ ಪನ್ಪಿನಲ್ಪ ಬಸ್ ಉಂತಾದ್ ತಪಾಸಣೆ ಮಲ್ಪುನಗ ಆರೋಪಿಲು ಬಸ್‌‌ರ್ದ್ ಜತ್ತ್‌ದ್ ಬಲಿತ್‌ದೆರ್.
ಅಕಲೆನ್ ಬೆರಿಪತ್ತುನ ಪೊರ್ತುಡು ಪ್ರಮುಖ ಆರೋಪಿ ರಾಜು, ಕಾಪು ಪೊಲೀಸ್ ಸ್ಟೇಶನ್ ಪಿ.ಎಸ್.ಐ. ತೇಜಸ್ವಿ ಮೆರೆನ್ ನೂಕುದ್ ಪಾಡ್ದ್ , ಆಯನ ಕೈಟಿತ್ತಿನ ಪಿಸ್ತೂಲ್‌ಡ್ ಶೂಟ್ ಮಲ್ತ್‌ದೆ. ಈ ಪೊರ್ತುಡು ತೇಜಸ್ವಿ ಮೇರ್ ಆಯನ ಕಾರ್‌ಗ್ ಶೂಟ್ ಮಲ್ತ್‌ದ್ ಆಯನ್ ಬೊಕ್ಕ ಆಯಡ ಇತ್ತಿನ ಗನ್‌ನ್ ಉಲಕೈ ಮಲ್ತೊಂದೆರ್.
ಉತ್ತರ ಪ್ರದೇಶ ಮೂಲೊದ ರಾಜು ಪನ್ಪಿನಾಯೆನೇ ಡೇವಿಡ್ ಡಿಸೋಜೆರೇಗ್ ಶೂಟ್ ಮಲ್ತ್ ಕೆರ್ತಿನ ಆರೋಪಿ. ಆಯನ ಮಿತ್ತ್ ಪೊಲೀಸೆರೆಗ್ ಬೆಡಿ ದಕ್ಕ್‌ದ್ ಗಡಿ ಮಲ್ತಿನೆರ್ದಾವರ ಕೆರ್ಪುನ ಪುನೆಪು ಬೊಕ್ಕ ಬೇಲೆಗ್ ತಲೆಪು ಮಲ್ದಿನ ಬಗೆಟ್‌ಲಾ ಪ್ರಕರಣ ಬೈಂದೂರು ಪೊಲೀಸ್ ಸ್ಟೇಶನ್‌ಡ್ ದಾಕಲಾತ್ಂಡ್.
ಈ ಪೊರ್ತುಡು ಒರಿನ ಇರ್ವೆರ್ ಆರೋಪಿಲು ತಪ್ಪಾವೊಂದೆರ್. ಇಂದೆಟ್ ಅಜಯ್ ರಸ್ತೋಗಿ ಯಾನೆ ಅನ್ನೋಲ್ ನ್ ಕುಮಟಾ ಪೊಲೀಸೆರೆ ಸಹಕಾರೊಡು ಕುಮಟಾಡ್ ಬೊಕ್ಕ ಜಿಯಾಹುಲ್ ವಜೂಲ್ ಶೇಖ್ ನ್ ಭಟ್ಕಳ ಪೊಲೀಸೆರೆ ಸಕಾಯೊಡು ಭಟ್ಕಳಡ್ ಶನಿವಾರ ಕಾಂಡೆ ಪತ್ತ್‌ದೆರ್.
ಕಾರ್ಯಾಚರಣೆದ ಪೊರ್ತುಡು ಗಡಿಕುಲಾದಿತ್ತಿನ ಕಾಪು ಪೊಲೀಸ್ ಸ್ಟೇಶನ್ ಪಿ.ಎಸ್.ಐ. ತೇಜಸ್ವಿ ಮೆರೆಗ್ ಒಡಿಪು ಜಿಲ್ಲಾ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು, ಗಡಿಕುಲಾತಿನ ಆರೋಪಿಗ್ಲಾ ಒಡಿಪು ಜಿಲ್ಲಾ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ಸುಪಾರಿ ಮರ್ಡರ್
ಕಾಂಗ್ರೆಸ್ ಮುಖಂಡೆರಾದಿತ್ತಿನ, ಉದ್ಯಮಿ ಡೇವಿಡ್ ಡಿಸೋಜಾ ನಡಪಾವೊಂದಿತ್ತಿನ ಕಂತ್ರಾಟ್ ಸಂಬಂಧಿತ್‌ದ್ ಬೇತೆ ರಾಜ್ಯೊದ ಕಂಪೆನಿದ ಒಟ್ಟುಗೂ ಕಾಸ್‌ದ ವಿಚಾರೊಡು ಮಚ್‌ಮಚ್ ಉಂಡಾದಿತ್ತ್ಂಡ್. ಉಂದೇ ಡೇವಿಡ್‌ನ್ ಕೆರ್ಯೆರ ನೆವನ ಆತ್ಂಡ್. ಈ ವಿಚಾರೊಡು ಕೈದಾತಿನ ಆರೋಪಿಲೆಗ್ ಸುಪಾರಿ ಕೊರ್ದಿತ್ತೆರ್ ಪನ್ದ್ ಇತ್ತೆ ತೆರಿದ್ ಬೈದ್ಂಡ್. ಈ ಬೇಲೆಗ್ ಬೆರಿತಾಂಗ್ ಕೊರ್ತಿನಕುಲು ಬೊಕ್ಕ ಆರೋಪಿಲೆಗ್ ಆಶ್ರಯ ಕೊರ್ತಿನಕಲೆನ್ ನಾಡ್‌ಪತ್ತುನ ಬೇಲೆ ನಡತೊಂದುಂಡು