Last updated on August 12th, 2026 at 01:47 pm
ರಾಮಕುಂಜ, ಆ. 12: ಕಡೀರಾದ್ ತುಳು ಭಾಷೆನ್ ಮೂಜನೇ ಐಚ್ಛಿಕ ಭಾಷೆ ಆದ್ ಕಲ್ಪಾಯೆರೆ ಸುರು ಮಲ್ದಿನ, ತುಳುವ ಸಂಸ್ಕೃತಿನ್ ಜೋಕುಲೆಗ್ ತೆರಿಪಾಲುನೆಟ್ ಏಪೊಲ ದುಂಬು ಇಪ್ಪುನ ಕಡಬ ತಾಲೂಕ್ ರಾಮಕುಂಜದ ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಶಾಲೆಡ್, ಶಾಲೆ ಬೊಕ್ಕ ನೇತ್ರಾವತಿ ತುಳುಕೂಟ (ರಿ.) ರಾಮಕುಂಜ ನೆತ್ತ ಒಟ್ಟು ಸೇರಿಗೆಡ್ ಆಗಸ್ಟ್ 12 ತಾನಿ 20 ನೇ ವರ್ಸೊದ ‘ಆಟಿದ ಅಮಾಸೆದ ಪೊಲಬು’ ಲೇಸ್ ನಡತ್ಂಡ್.
ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಶಾಲೆದ ಕಾರ್ಯಂತೆರ್ ಶ್ರೀ ಕೆ ಸೇಸಪ್ಪ ರೈಕ್ಲೆನ ಗುರ್ಕಾರ್ಮೆಡ್ ನಡತಿನ ಈ ಲೇಸ್ಡ್ ನಿವೃತ್ತ ಉಪನ್ಯಾಸಕೆರಾಯಿನ ಶ್ರೀ ಮಹಾಲಿಂಗೇಶ್ವರ ಭಟ್ ಪೆರಿಯಡ್ಕ ಗೇನೊದ ಮಾನಿಲಾದ್ ಬತ್ತ್ದ್ ಆಟಿದ ಪೊಲಬು ಪಟ್ಯೆರ್. ಈ ಲೇಸ್ಡ್ ಪ್ರಾಥಮಿಕ ಕೃಷಿ ಪತ್ತ್ದ ಸಹಕಾರಿ ಸಂಘ, ಆಲಂಗಾರ್ ಇಂದೆತ ಕೊೖಲ ಶಾಖೆದ ವ್ಯವಸ್ಥಾಪಕೆರ್ ಶ್ರೀಮತಿ ಆಶಾ ಬೊಕ್ಕ ಸುದ್ದಿ ಬಿಡುಗಡೆ ಪತ್ರಿಕೆದ ವರದಿಗಾರೆರ್ ಶ್ರೀ ಹರೀಶ್ ಬಾರಿಂಜ ಮಲ್ಲ ಬಿನ್ನೆರಾದ್ ಅಂಚೆನೇ ಶ್ರೀ ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಶಾಲೆದ ಶಿಕ್ಷಕ-ರಕ್ಷಕ ಸಂಘೊದ ಗುರ್ಕಾರ್ರ್ ಶ್ರೀ ಪ್ರಕಾಶ್ ಗೌಡೆರ್ ಅಂಚೆನೇ ಶ್ರೀ ರಾಮಕುಂಜೇಶ್ವರ ವಿದ್ಯಾಲಯೊದ ಶಿಕ್ಷಕ-ರಕ್ಷಕ ಸಂಘೊದ ಗುರ್ಕಾರ್ರ್ ಶ್ರೀ ಗುರುರಾಜ್ ರೈ ಕೇವಳ ಮೊಕುಲು ಮಾನಾದಿಗೆದ ಬಿನ್ನೆರಾದ್ ಪಾಲ್ಪಡೆಯೆರ್.
ಜೋಕುಲೆಗ್ ತುಳುವ ಸಂಸ್ಕೃತಿಡ್ ವಿಶೇಷ ದಿನ ಆಟಿದ ಅಮಾಸೆದ ಪೊಲಬು ಪಟ್ಟುನ ಈ ಲೇಸ್ಡ್ ಪರಪುದ ಪನಿ ಬೊಕ್ಕ ಸಬಿಸವಾಲ್ ಪಂತೊ ನಡತ್ಂಡ್. ಅಂಚೆನೇ ಆಟಿದ ವಿಶೇಷ 83 ತೆನಸ್ಲೆನ ಪೊಲಬು, ಮಲ್ಪುನ ವಿಧಾನೊನು ತೆರಿಪಾವುನ ಪುನೆಪುಲಾ ಈ ಲೇಸ್ಡ್ ನಡತ್ಂಡ್.