Last updated on September 11th, 2026 at 02:57 pm
ಒಡಿಪು, ಸೆ. 11: ನ್ಯಾಯಂತಡೆಡ್ ವಿಚಾರಣೆದ ನಿಲವುಡು ಇತ್ತಿನ ಒಂಜಿ ಪ್ರಕರಣೊದ ಆರೋಪಿಗ್ ಜಾಮೀನು ಕೊರ್ಪಾಯೆರೆ ಡುಪ್ಲಿಕೇಟ್ ಆಧಾರ್ ಕಾರ್ಡ್ ಉಂಡು ಮಲ್ತ್ದ್ ನ್ಯಾಯಂತಡೆಗ್ ಕೊರ್ತಿನ ಗಾತಿದ ಆರೋಪಡ್ ಇರ್ವೆರೆನ್ ಒಡಿಪು ನಗರ ಸ್ಟೇಷನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಬಂಟ್ವಾಳ ಮೂಲೊದ ಉಮ್ಮರ್ ಫಾರೂಕ್ (32) ಬೊಕ್ಕ ಕುಡ್ಲದ ನಿಶಾಂತ್ ಕುಮಾರ್ (24) ಕೈದಾತಿನ ಆರೋಪಿಲು.
ಒಡಿಪು ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆಡ್ ವಿಚಾರಣೆ ನಡತೊಂದುಪ್ಪುನ ಒಂಜಿ ಪ್ರಕರಣೊಡು ನೋಮಾನ್ ಪನ್ಪಿ ಆರೋಪಿಗ್ ಜಾಮೀನ್ ಕೊರ್ಪುನ ಪ್ರಕ್ರಿಯೆ ನಡತೊಂದಿತ್ತ್ಂಡ್. ಈ ಪೊರ್ತುಡು ಆರೋಪಿ ಉಮ್ಮರ್ ಫಾರೂಕ್, ಪ್ರಶಾಂತ್ ಪನ್ಪಿನಾರೆನ ಆಧಾರ್ ಕಾರ್ಡ್ಗ್ ಕೆ.ಟಿ. ಮೊಹಮ್ಮದ್ ಪನ್ಪಿನಾರೆನ ಪುದರ್ ಬೊಕ್ಕ ಎಡ್ರಸ್ ಎಡಿಟ್ ಮಲ್ತ್ದ್ ಪೊಸ ಆಧಾರ್ ಕಾರ್ಡ್ ಮಲ್ತ್ದೆ.
ತನ್ನ ಸ್ವಂತ ಲಾಭೊಗು ಬೋಡಾದ್ ಕುಡೊರಿಯನ ಲೆಕ ಬತ್ತದ್, ನಕಲಿ ಆಧಾರ್ ಕಾರ್ಡ್ನ್ ನ್ಯಾಯಂತಡೆಕ್ ಅಧಿಕೃತ ದಾಖಲೆಯಾದ್ ಕೊರ್ದು ದಗೆ ಮಲ್ಪೆರೆ ತೂತೆ. ಈ ಅಕ್ರಮ ತೆರಿದ್ ಬತ್ತಿನೇ ಒಡಿಪು ನಗರ ಪೊಲೀಸ್ ಸ್ಟೇಶನ್ಡ್ ಒಯಿಲ್ ದಾಕಲಾತ್ಂಡ್.
ಪ್ರಕರಣೊದ ಜಡ್ತೆ ಮಲ್ತಿನ ಒಡಿಪು ನಗರ ಪೊಲೀಸೆರ್, ನಕಲಿ ದಾಖಲೆ ಉಂಡು ಮಲ್ತಿನ ಉಮ್ಮರ್ ಫಾರೂಕ್ ಬೊಕ್ಕ ಆಯಗ್ ಸಕಾಯ ಮಲ್ದಿನ ನಿಶಾಂತ್ ಕುಮಾರ್ನ್ ಕೈದ್ ಮಲ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ಪರಿಶೀಲನೆ ಮಲ್ತಿನ ನ್ಯಾಯಾಧೀಶೆರ್ ಇರ್ವೆರ್ ಆರೋಪಿಲೆಗ್ಲಾ ನ್ಯಾಯಾಂಗ ಕೈದ್ (Judicial Custody) ಕೊರ್ದು ಆದೇಶ ಕೊರ್ತೆರ್.