“ಕುಡ್ಲಡ್ ನಡಪುನ ಸಂಚಿವ ಸಂಪುಟೊದ ಸಭೆಟ್ ತುಳು ಭಾಷೆಗ್ ಅಧಿಕೃತ ಭಾಷೆದ ಮಾನಾದಿಗೆ ತಿಕ್ಕಡ್”- ಶ್ರೀಮತಿ ಕುಶಾಲಾಕ್ಷಿ ವಿ. ಕುಲಾಲ್ ಕಣ್ವತೀರ್ಥ

Last updated on September 17th, 2026 at 09:06 am

ಸೆಪ್ಟೆಂಬರ್ 18 ಗ್ ಕುಡ್ಲಡ್ ನಡಪರೆ ಉಪ್ಪುನ ಜಿಲ್ಲಾ ಸಚಿವ ಸಂಪುಟದ ಸಭೆಟ್ ಉಡುಪಿ ಬೊಕ್ಕ ದಕ್ಷಿಣ ಕನ್ನಡ ತಾಲೂಕುಲೆಡ್ ತುಳು ಭಾಷೆನ್ ಎಚ್ಚಿಗೆದ ಅಧಿಕೃತ ಪ್ರಾದೇಶಿಕ ಭಾಷೆ ಆದ್ ಪರಿಗಣನೆ ಮಲ್ಪೊಡು ಪಂದ್ ಮಾತಾ ತುಳುವೆರ್ ಮಾನ್ಯ ಮುಖ್ಯಮಂತ್ರಿಲೆನ ಬೊಕ್ಕ ಸಚಿವ ಸಂಪುಟದ ಎದುರು ಒತ್ತಾಯ ಮಲ್ತೊಂದುಲ್ಲೆರ್.
ತುಳು ಪಂಡ ಕಾಲಿ ಭಾಷೆ ಮಾತ್ರ ಅತ್ತ್ ಅವ್ ನಮ್ಮ ಸಂಸ್ಕೃತಿ, ಪ್ರಕೃತಿ. ತುಳು ಆಚರಣೆ, ಪರ್ಬೊಲು ಕಾಲ ಕಾಲೊಗು ಪ್ರಕೃತಿದ ಬದಲಾವಣೆಗ್ ಸಮ್ಮಂದಪಟ್ಟಿನವು. ತುಳು ನಮ್ಮ ಪೆರ್ಮೆ. 2000 ವರ್ಸೊಡ್ದ್ ಎಚ್ಚ ಪಿರಾಕ್‌ದ ಈ ತುಳು ಭಾಷೆದ ಸಾಂಸ್ಕೃತಿಕ ಶ್ರೀಮಂತಿಕೆ ಲೋಕ ಪುಗರ್ತೆದ. ಸ್ವಾತಂತ್ರ್ಯಗ್ ದುಂಬೇ ಈ ನಾಡ್‌ಗಾದ್ ಬೆಂದ್ ಸೊಂದಿನಕುಲು ಬೀರೆರ್, ಯೋಧೆರ್, ಅರಸುಲು, ಮಹಾರಾಜೆರ್, ಮಸ್ತ್ ಜನ ಉಲ್ಲೆರ್, ತುಳುವೆರೆನ ಸೇವೆಲಾ ಸ್ವಾತಂತ್ರ್ಯದ ಪೊರ್ಮ್ಬುಡು ಮಸ್ತ್ ಉಂಡು. ಅಯಿಡ್ದ್ ಬೊಕ್ಕದ ದಿನೊಟು ತುಳುವೆರ್ ಈ ದೇಶೊದ ಆರ್ಥಿಕತೆ, ಶಿಕ್ಷಣ, ಧಾರ್ಮಿಕ, ರಾಜಕೀಯ, ಸಾಮಾಜಿಕ, ಕಲೆ, ಸಾಹಿತ್ಯ, ವೈಜ್ಞಾನಿಕ, ಕ್ರೀಡೆ, ಬೈದ್ಯ, ಭದ್ರತೆ, ಕೃಷಿ ಇಂಚಿತ್ತಿನ ಮಾತಾ ಕ್ಷೇತ್ರೊಡು ಸೇವೆ ಮಲ್ತೊಂದು ಬೈದೆರ್. ತುಳುವೆರೆನ ಸೇವೆ ದೇಶೊದ ಪ್ರಗತಿಡ್ ಮಸ್ತ್ ಉಂಡು.
ಕಲ್ಲ್‌ದ ಶಾಸನೊಲು, ಪನೊಲಿದೋಲೆಲು ತುಳು ಲಿಪಿತ ಬಿಲೆನ್ ಎಚ್ಚಾದ್ ತೋಜಾವುಂಡು. ಪಾರ್ದನ, ಸಂಧಿ, ಬೀರ ಇಂಚಿತ್ತಿನ ಮೌಖಿಕ ಸಾಹಿತ್ಯೊಲು ಇನಿಲಾ ಅಯಿತ ಮೂಲ ಪೊರ್ಲು ತಿರ್ಲ್‌ನ್ ಒರಿತೊಂದು ಬೈದ್ಂಡ್. ದೇಶ ಪರದೇಶೊಡ್ದ್ ಪ್ರವಾಸಿಕೆರೆನ್ ಆಕರ್ಷಣೆ ಮಲ್ತೊಂದುಪ್ಪುನ ತುಳು ಭಾಷೆ ತುಳುನಾಡ್‌ಡ್ ಪ್ರಾದೇಶಿಕ ಅಧಿಕೃತ ಭಾಷೆದ ಸ್ಥಾನಮಾನ ಪಡೆವಡ್, ತುಳುವೆರ್ ದುಂಬರ್ದಿಂಚಿ ತೂವೊಂದು ಬೈದಿನ ಕನ ನನಾಂಡಲಾ ಕೋಡಿ ಎತ್ತಡ್. 18 ತಾರೀಕ್‌ಗ್ ಕುಡ್ಲಡ್ ನಡಪುನ ಸಚಿವ ಸಂಪುಟದ ಸಭೆಟ್ ಈ ವಿಷಯನ್ ಘೋಷಣೆ ಮಲ್ಪಡ್. ಈ ದಿನ ತುಳು ನಾಡ್‌ದ ಚರಿತ್ರೆಡ್ ಬಂಗಾರ್ದ ಅಕ್ಷರೊಡು ಬರೆವಡ್, ಇಂದೆಕ್ ಕೇರಳ ಸರಕಾರಲಾ ಬೆರಿಸಾಯ ಕೊರಡ್ ಪಂದ್ ಹಿರಿಯ ತುಳು ಸಾಹಿತಿ ಶ್ರೀಮತಿ ಕುಶಾಲಾಕ್ಷಿ ವಿ.ಕುಲಾಲ್ ಕಣ್ವತೀರ್ಥೆರ್ ಪನ್ಪೆರ್.