Last updated on September 16th, 2026 at 05:02 pm
ಕುಡ್ಲ, ಸೆ. 16: ಕುತ್ತಾರ್ಡ್ ಸೋಮಾರ ರಾತ್ರೆ ನಡತಿನ ಭೀಕರ ಎಡ್ತೆಡ್ ಗಾತಿದ ಗಡಿಕುಲಾದ್ ಬ್ರೈನ್ಡೆಡ್ ಆತಿನ ಜವನನ ಅಂಗಾಂಗೊಲೆನ್ ದಾನ ಮಲ್ಪೆರೆ ಆರೆನ ಅಪ್ಪೆಅಮ್ಮೆ ನಿರ್ಧಾರ ಮಲ್ತ್ದೆರ್ ಪನ್ದ್ ವರದಿ ಆತ್ಂಡ್. ಕುತ್ತಾರ್ದ ಆಯೆರೆಬೊಟ್ಟು ನಿವಾಸಿ ಗೋಪಾಲ್ ಬೊಕ್ಕ ವೇದಾವತಿ ದಂಪತಿನ ಎಲ್ಯ ಮಗೆ ವರ್ಷಿತ್ ಕುಲಾಲ್ (21) ಬ್ರೈನ್ಡೆಡ್ ಆತಿನಾರ್. ಫ್ಯಾಬ್ರಿಕೇಷನ್ ಬೇಲೆ ಮಲ್ತೊಂದಿತ್ತಿನ ವರ್ಷಿತ್, ಅಪ್ಪೆ, ಅಮ್ಮೆರ್ ಬೊಕ್ಕ ಒರಿ ಪಲಯನ್ ಅಗತ್ದೆರ್.
ಸೋಮವಾರ ರಾತ್ರೆ ಅಂದಾಜಿ 7:30 ಕ್ ವರ್ಷಿತ್ ಕುಲಾಲ್ ಬೈಕ್ಡ್ ಇಲ್ಲಗ್ ಪೋವೊಂದಿತ್ತೆರ್. ಈ ಪೊರ್ತುಡು ಕುತ್ತಾರ್ದ ಕೈತಲ್ ರಾಣಿಪುರೊರ್ದು ಕುತ್ತಾರ್ದಂಚಿ ಬಾರೀ ಬೀಸಡ್ ಪೋವೊಂದಿತ್ತಿನ ಸ್ಕೂಟರ್ ಬೊಕ್ಕ ವರ್ಷಿತ್ನ ಬೈಕ್ ಎದುರೆದುರು ಎಡ್ತೊಂದ. ಎಡ್ತೆದ ಬರಸ್ಗ್ ವರ್ಷಿತ್ ಸಾದಿಗ್ ರಟ್ಟ್ದಿತ್ತ್ದ್, ಆರೆನ ತರೆಕ್ ಗಾತಿದ ಗಡಿಕುಲಾದಿತ್ತ. ಅಪಗನೇ ಆರೆನ್ ದೇರಳಕಟ್ಟೆದ ಯೆನೆಪೋಯ ಆಸ್ಪತ್ರೆಗ್ ದಾಕಲ್ತ್ದ್ ಐಸಿಯು ಡ್ ಮರ್ದ್ ಮಲ್ತ್ಂಡಲಾ, ಮರ್ದ್ ಪಲಿಪಂದೆ ಆರ್ ಬ್ರೈನ್ಡೆಡ್ ಆತೆರ್.
ಮಗೆ ಬ್ರೈನ್ಡೆಡ್ ಆತಿನ ತೆರಿನ ಅಪ್ಪೆಅಮ್ಮೆ, ಡಾಕ್ಟ್ರೆನಕ್ಲೆನ ಪಾತೆರೊದ ಲೆಕ ವರ್ಷಿತ್ನ ಅಂಗಾಂಗ ದಾನ ಮಲ್ಪುನ ನಿರ್ಧರ ಗೆತೊಂದು ಬೇತೆಕ್ಲೆನ ಬದ್ಕ್ ಅರ್ಲಾವೊಂದುಲ್ಲೆರ್. ವರ್ಷಿತ್ನ ಮೂತ್ರಪಿಂಡ (Kidneys), ಕರ್ಯಟ (Liver), ಹೃದಯ (Heart) ಬೊಕ್ಕ ಉರೆ (Lungs) ಕ್ ಆಸ್ಪತ್ರೆಲೆರ್ದ್ ಒಲವು ತಿಕ್ಕ್ದಿತ್ತ್ದ್, ಅಂಗಾಂಗೊಲೆನ್ ರಪಕ್ಕ ಕಡಪುಡ್ರೆ ‘ಗ್ರೀನ್ ಕಾರಿಡಾರ್’ (ತಡೆದಾಂತಿ ವಾಹನ ಸಂಚಾರ) ವ್ಯವಸ್ಥೆ ಮಲ್ತ್ದ್ಂಡ್ ಪನ್ದ್ ಆಸ್ಪತ್ರೆದ ಮೂಲೊಲು ತೆರಿಪಾದ.
ಉಂದೇ ಎಡ್ತೆಡ್ ಸ್ಕೂಟರ್ ಬುಡೊಂದಿತ್ತಿನ ಧೀರಜ್ ಪನ್ಪಿನಾರೆಗ್ಲಾ ಗಾತಿದ ಗಡಿಕುಲಾದಿತ್ತ್ದ್, ಆಸ್ಪತ್ರೆಡ್ ಮರ್ದ್ ನಡತೊಂದುಂಡು. ನಡಪುಗು ಸಂಬಂಧಿತ್ದ್ ತೆನ್ಕಾಯಿ ಕುಡ್ಲ ಸಂಚಾರ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾದಿತ್ತ್ದ್, ಜಡ್ತೆ ನಡತೊಂದುಂಡು.