Last updated on September 16th, 2026 at 04:03 pm
ಕುಡ್ಲ, ಸೆ. 16: ತುಳುನಾಡ್ದ ಮೂಲೊದ, ಅಂಚನೆ ಬಾರಿ ಪಿರ ಒರಿದಿನ “ಮನ್ಸ” ಜಾತಿದ ಪುದರ್ ನ್ ಸರಕಾರೊದ ಪರಿಶಿಷ್ಟ ಜಾತಿಲೆನ ಪಟ್ಟಿಗ್ ಗೋಡ್ಯಾವೊಡು ಪನ್ದ್ ಒತ್ತಾಯ ಮಲ್ತ್ದ್ ಸಮುದಾಯೊದ ಮುಖಂಡೆರ್ ಮಂಗಳೂರು ಪ್ರೆಸ್ ಕ್ಲಬ್ಡ್ ಪತ್ರಿಕಾಗೋಷ್ಠಿ ಮಲ್ತ್ದೆರ್.
ಎಂಕ್ಲೆನ ಜಾತಿದ ಮೂಲ ದ.ಕ ಜಿಲ್ಲೆಯಾಂಡಲಾ, ಒಡಿಪು, ಚಿಕ್ಕಮಗಳೂರು, ಹಾಸನ, ಕೊಡಗು, ಶಿವಮೊಗ್ಗ ಅಂಚನೆ ಕೇರಳದ ಕಾಸರಗೋಡ್ ಸೇರ್ದ್ ಒಟ್ಟು ಏಳ್ ಜಿಲ್ಲೆಲೆಡ್ ಎಂಕ್ಲೆನ ಸಮುದಾಯದ ಜನೊಕುಲು ಉಲ್ಲೆರ್. ಈ ಸಮುದಾಯೊದ ಜನಸಂಖ್ಯೆ ಅಂದಾಜಿ 5 ಲಕ್ಷರ್ದ್ ಎಚ್ಚ ಉಂಡು. ಆಂಡ ಈತ್ ಮಲ್ಲ ಸಂಖ್ಯೆಡ್ ಇಪ್ಪುನ ಈ ಜಾತಿದ ಪುದರ್ ಸರಕಾರೊದ ಪರಿಶಿಷ್ಟ ಜಾತಿಲೆನ ಪಟ್ಟಿಡ್ ಗೋಡ್ಯಾವಂದೆ ಬುಡ್ದು ಪೋತಿನ ದುರದೃಷ್ಟಕರ ಸಂಗತಿ ಆದುಂಡು ಪನ್ದ್ ಪತ್ರಿಕಾಗೋಷ್ಠಿಡ್ ಪಂಡೆರ್.
ಬೇತೆ ಜಾತಿದ ಪುದರ್ಡ್ ಜಾತಿ ಪ್ರಮಾಣ ಪತ್ರ!
ಎಂಕ್ಲೆನ ಜಾತಿದ ಪುದರ್ ಸರಕಾರೊದ ಪರಿಶಿಷ್ಟ ಜಾತಿಲೆ ಪಟ್ಟಿಡ್ ದಾಂತಿನೆರ್ದಾವರ, ಎಂಕ್ಲ ಮಂಗಳೂರು ಬೊಕ್ಕ ಒಡಿಪು ಜಿಲ್ಲೆಲೆಡ್ “ಆದಿ ದ್ರಾವಿಡ” ಪಂದ್, ಮಲೆನಾಡ್ ಪ್ರದೇಶೊಲೆಡ್ “ಆದಿಕರ್ನಾಟಕ” ಪಂದ್ ಎಂಕ್ಲೆನ ಅತ್ತಂದಿನ ಬೇತೆ ಜಾತಿದ ಪುದರ್ಡ್ ಜಾತಿ ಪ್ರಮಾಣ ಪತ್ರ ಗೆತೊನೊಂದುಲ್ಲ. ಆಂಡ ಶೈಕ್ಷಣಿಕವಾದ್, ಬೇಲೆದ ದೃಷ್ಟಿಡ್, ಆರ್ಥಿಕವಾದ್, ಸಾಮಾಜಿಕವಾದ್ ಬೊಕ್ಕ ರಾಜಕೀಯವಾದ್ ಎಂಕ್ಲೆನ ಸಮುದಾಯ ಶತಮಾನೊದಾತ್ ಪಿರವುಡೇ ಉಂಡು. ಅಂಚಾದ್ ಎಂಕ್ಲೆನ ಮೂಲ ಜಾತಿಯಾಯಿನ “ಮನ್ಸ” ಪುದರ್ನ್ ಸರಕಾರದ ಪರಿಶಿಷ್ಟ ಜಾತಿಲೆನ ಪಟ್ಟಿಡ್ ಗೋಡ್ಯಾಲೆ ಪನ್ದ್ ಪಾಕ ವರ್ಸೊಡ್ದಿಂಚಿ ಮನವಿ ಕೊರೊಂದಿತ್ತ್ಂಡಲಾ, ನನಲಾ ಸರಕಾರ ಒವ್ವೇ ಕ್ರಮ ಗೆತೊನುನ ತೋಜುಜಿ ಪನ್ದ್ ಅಸಮಾಧಾನ ತೋಜಾಯೆರ್.
ಉಲಮೀಸಲಾತಿ ಆದೇಶೊಡ್ದು ಸಮುದಾಯೊಗು ದ್ರೋಹ
ಇತ್ತೆ ಕರ್ನಾಟಕೊಡು ಉಲಮೀಸಲಾತಿ ಜಾರಿಯಾಯಿನೆರ್ದ್ ಬೊಕ್ಕ ನಮ್ಮ ಸಮುದಾಯೊಗು ಮಲ್ಲ ಅನ್ಯಾಯ ಆತ್ಂಡ್. ಉಲಮೀಸಲಾತಿ ಆಯೋಗದ ಆದೇಶೊಡ್, ಪರಿಶಿಷ್ಟ ಜಾತಿಲೆ ಪಟ್ಟಿಡ್ ಗೋಡ್ಯಂದಿನ ಅಸ್ಪೃಶ್ಯ ಜಾತಿಲೆನ್ ಪರಿಶಿಷ್ಟ ಜಾತಿಲೆ ಪಟ್ಟಿಗ್ ಗೋಡ್ಯಾಯೆರೆ ಕ್ರಮ ಗೆತೊನೊಡು ಪಂದ್ ಇತ್ತ್ಂಡಲಾ, ಸರಕಾರ ಬಲಿಷ್ಠ ಜಾತಿಲೆನ ಪ್ರಭಾವೊಗ್ ಕಟ್ಟ್ ಬೂರ್ದು ಉಲಮೀಸಲಾತಿ ಆದೇಶ ಮನ್ತ್ಂಡ್. ಇಂದೆರ್ದಾವರ ನಮ್ಮಂಚಿನ ಜಾತಿಲೆಗ್ ಮಾತ್ರ ಅತ್ತ್, ಪಟ್ಟಿಡ್ ಪುದರ್ ಇಪ್ಪುನ ಬೇತೆ ಜಾತಿಲೆಗ್ಲಾ ಅನ್ಯಾಯ ಆವೊಂದು ಉಂಡು ಪನ್ದ್ ಬೇನೆನ್ ಪಟ್ಟೊಂಡೆರ್.
ಎಂಕ್ಲೆನ “ಮನ್ಸ” ಜಾತಿದ ಪುದರ್ನ್ ಸರಕಾರದ ಪರಿಶಿಷ್ಟ ಜಾತಿಲೆ ಪಟ್ಟಿಡ್ ಗೋಡ್ಯಾವುನ ದಿಟ್ಟಿಡ್, ಈ ಜಾತಿದ ಕುಲಶಾಸ್ತ್ರೀಯ ಅಧ್ಯಯನ ನಡಪಾವರೆ ಕಡತ ತಯಾರಾಂಡಲಾ, ಕೆಲವೊಂಜಿ ಪ್ರಭಾವಿ ಜಾತಿಲೆ ಒತ್ತಡೊಡ್ದು ಸಂಬಂಧಿತಿನ ಸಚಿವೆರ್ ಈ ಆದೇಶೊಗ್ ದಸ್ಕತ್ತ್ ಪಾಡಂದೆ ನಾಮಾಸ್ ಮಲ್ತೊಂದುಲ್ಲೆರ್ ಪನ್ಪಿ ಆರೋಪಲಾ ಮಲ್ತ್ದೆರ್.
ಸೆಪ್ಟೆಂಬರ್ 18 ಗ್ ಸಚಿವ ಸಂಪುಟ ಸಭೆ: ಹಕ್ಕೊತ್ತಾಯ
ಅಂಚಾದ್, ಸನ್ಮಾನ್ಯ ಮುಖ್ಯಮಂತ್ರಿಲು ಬೊಕ್ಕ ಸಂಬಂಧಿತಿನ ಇಲಾಖೆದ ಸಚಿವೆರ್ ಎಲ್ಲಂಜಿ ಪಂಡ 18.09.2026 ತಾನಿ ಕುಡ್ಲಡ್ ನಡಪುನ ಸಚಿವ ಸಂಪುಟ ಸಭೆಟ್ ಬೋಡಾಪಿನ ಕ್ರಮ ಗೆತೊನೊಡು ಪಂದ್ ಎಂಕ್ಲೆನ ಸಂಘಟನೆ ಹಕ್ಕೊತ್ತಾಯ ಮಲ್ಪುಂಡು ಪನ್ದ್ ಸುದ್ದಿಗೋಷ್ಠಿಡ್ ಇತ್ತಿನ ಎಂ. ಶಾಂತಾರಾಮ್, ವೆಂಕಣ್ಣ ಕೊಯ್ಯಾರ್, ಹರಿಯಪ್ಪ ಮುತ್ತೂರ್, ಅಚ್ಯುತ ಸಂಪಿಗೆ, ಉದಯ ಗೋಳಿಯಂಗಡಿ, ಎಂ. ರಮೇಶ್ ಬೋಧಿ, ಆನಂದ ಕೊಪ್ಪ ಪಂಡೆರ್.