Last updated on September 21st, 2026 at 08:22 am
ಒರಿ ಸಂಶೋಧಕೆರೆನ ಪೊರುಂಬಾಟೊಡ್ದ್ ದ್ರಾವಿಡ ಭಾಷೆದ ಸಾಹಿತ್ಯ ಪಗಪುನಡೆಮುಟ್ಟ
ಒಂಜಿ ಸಂಶೋಧನೆ, ಕೆಲವು ಕಣ್ಣ್ತತ್ತಿನ ಮಸ್ತಿರೆಲು ಬೊಕ್ಕ ಭಾಷೆಲೆನ ನಡುಟು ಉಪ್ಪುನ ಅಂತರ—ಅಯಿಕ್ಲೆನ ನಡುಟು ಪುಟ್ಟಿನ ಬಾವೊನೇ ದ್ರಾವಿಡ ಭಾಷೆ ಅನುವಾದಕೆರೆನ ಸಂಘ (ಡಿಬಿಟಿಎ).
ಡಿಬಿಟಿಎ ಸಂಸ್ಥಾಪಕ-ಅಧ್ಯಕ್ಷೆದಿ ಡಾ.ಸುಷ್ಮಾ ಶಂಕರ್ ಮೆರೆನ ಪಿಎಚ್ಡಿ ಸಂಶೋಧನೆದ ವಿಷಯ ‘ದ್ರಾವಿಡ ಭಾಷೆ ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಕೃತಿಲು – ಒಂಜಿ ಅಧ್ಯಯನ’. ಕನ್ನಡ ಬಾಸೆಡ್ ನಡತಿನ ಈ ಸಂಶೋಧನೆಡ್ ಕನ್ನಡ, ಮಲಯಾಳಂ, ತಮಿಳು ಬಾಸೆಲೆಡ್ 19 ಜ್ಞಾನಪೀಠ ಪ್ರಶಸ್ತಿ ಪಡೆಯಿನ ಕೃತಿಲೆನ್ ಅಧ್ಯಯನ ಮಲ್ತೆರ್.
ಅರೆಗ್ ಕನ್ನಡ ಬೊಕ್ಕ ಮಲಯಾಳ ಓದೆರೆ ತೊಂದರೆ ಇಜ್ಜಂಡ್. ಆಂಡ ತಮಿಳು ಬೊಕ್ಕ ತೆಲುಗು ಕೃತಿಲೆಗ್ ಅನುವಾದೊಲೆನ್ ಒಂಮ್ಬೊನೊಡಾಪುಂಡು. ಸಾಹಿತ್ಯ ಅಕಾಡೆಮಿಲು, ಗ್ರಂಥಾಲಯೊಲು, ಬೂಕುದ ಅಂಗಡಿಲು, ಸಾಹಿತ್ಯ ಕೇಂದ್ರೊಲೆಗ್ ಪೋದು ಬೋಡಾಪಿನ ಬೂಕುಲೆನ್ ನಾಡೊಂದು ಮಸ್ತ್ ಕಡೆಟ್ ಪೋಯೆರ್ಂಡಲಾ ದಿಂಜ ಕೃತಿಕುಲು ತಿಕ್ದಿಜಿ.
ಆ ಅಜಕೆ ಒಂಜಿ ಪೊಸ ಸಾದಿನ್ ತೋಜಾಂಡ್
ತಮಿಳು ಬೊಕ್ಕ ತೆಲುಗು ಕಲ್ಪರೆ ಸುರು ಮಲ್ತಿನ ಡಾ., ಸುಷ್ಮಾ ಮೇರ್ ಬೋಡಾಯಿನ ತುರ್ತೊಗು ಕೃತಿಲೆನ್ ಆರೇ ಕನ್ನಡ ಭಾಷೆಗ್ ತರ್ಜುಮೆ ಮಲ್ತೆರ್. ಅಪಗ ಅರೆಗ್ ಅರ್ಥ ಆಂಡ್:
ಅನುವಾದ ಪಂಡ ಕೇವಲ ಪದೊಕುಲೆನ್ ಪಗಪುನಿ ಅತ್ತ್; ಉಂದು ಒಂಜಿ ಸಾಹಿತ್ಯ ಲೋಕೊನು ಬೊಕೊಂಜಿ ಲೋಕೊಗು ಲೆತೊಂದು ಪೋಪಿನ ಒಂಜಿ ಪಾಂಪು.
ಭವಿಷ್ಯದ ಸಂಶೋಧಕೆರ್ ಬೊಕ್ಕ ಅನುವಾದಕೆರ್ ತನ್ಕುಲೆಗ್ ಎದುರಾತಿನ ಕಷ್ಟೊಲೆನ್ ತಲೆದ್ ಉಂತೊಡು ಪನ್ಪಿನ ಆಸೆಡ್ ದ್ರಾವಿಡ ಭಾಷೆಲೆನ ನಡುಟು ಅನುವಾದ, ಸಂವಾದ ಬೊಕ್ಕ ಸಾಹಿತ್ಯ ವಿನಿಮಯೊಗು ಒಂಜಿ ವೇದಿಕೆನ್ ಸೃಷ್ಟಿ ಮಲ್ಪುನ ಕಲ್ಪನೆ ಪುಟ್ಟುಂಡ್. ಹಿರಿಯ ಸಾಹಿತಿಲು, ಅನುವಾದಕೆರೆನ ಉಮೇದ್ಡ್ ಉಂದು ಒಂಜಿ ಸಂಘಟನೆದ ರೂಪೊ ಪಡೆಂಡ್.
24 ಸದಸ್ಯೆರೆನೊಟ್ಟುಗು ಸುರು ಆಯಿನ ಒಂಜಿ ನಡಪು
ಸೆಪ್ಟೆಂಬರ್ 19, 2021ತ ಕೋವಿಡ್ ಕಾಲೊಡು ಡಿಬಿಟಿಎ ದ ಸುರುತ ಆನ್ಲೈನ್ ಸಭೆ ನಡತ್ಂಡ್. 24 ಸದಸ್ಯೆರ್ ಪಾಲ್ ಪಡೆಯೆರ್. ಅವುಲು ಮಸ್ತ್ ಜನ ಡಾ.ಸುಷ್ಮಾಗ್ ಗೊತ್ತಿಜ್ಜಿನ ಹಿರಿಯ ಸಾಹಿತ್ಯಿಕ ವ್ಯಕ್ತಿಲು ಬೊಕ್ಕ ಅನುವಾದಕೆರ್ ಆಂಡಲಾ, ಅಕುಲು ಅರೆನ ಅಂಗಲ್ಪುಗು ಬೆರಿಬೊಟ್ಟಿಯೆರ್ ಬೊಕ್ಕ ಅರೆನ್ ನಂಬುದು ಅರೆನೇ ಗುರ್ಕಾರ್ಲು ಆದ್ ಆಯ್ಕೆ ಮಲ್ತೆರ್.
24 ಸದಸ್ಯೆರೆಡ್ದ್ ಒಂಜಿ ಕನ ತ ಪುರ್ಪ ಅರಳ್ಂಡ್
ಅನುವಾದ ಕಾರ್ಯಾಗಾರೊಲು, ಸಂಗೋಷ್ಠಿಲು, ಸಾಹಿತ್ಯಿಕ ಸಂಭಾಷಣೆಲು, ಕಬಿತೆ ಸಭೆಲು, ಮಸ್ತಿರೆ ಪ್ರಕಟಣೆಲು ಬೊಕ್ಕ ಅನುವಾದಕೆರೆಗ್ ಪ್ರಶಸ್ತಿಲೆನ್ ಕೊರೊಂದು ಭಾಷೆಲೆನ ನಡುಟು ಸಾಹಿತ್ಯೊದ ಪಾಂಪುನ್ ಡಿಬಿಟಿಎ ಕಟ್ಟೊಂದುಂಡು.
24 ಡ್ದ್ 124 ಮುಟ್ಟ
2021ಡ್ 24 ಪದುಕೆರೆರ್ದ್ ಸುರು ಆಯಿನ ಈ ಕೂಟ 2026 ಗ್ 124 ಪದುಕೆರೆನ ಸಾಹಿತ್ಯೊದ ಕುಟುಮ ಆದ್ ಬುಲೆದ್ಂಡ್.
ಉಂದು ಬಜೀ ಸಂಖ್ಯೆಡ್ ಬುಲೆದಿನಿ ಅತ್ತ್. ಉಂದು ಭಾಷೆಲೆನ ನಡುಟು ಬುಲೆಯಿನ ಒತ್ತೊರ್ಮೆದ ಪಜ್ಜೆ, ಅನುವಾದೊದ ಮೂಲಕ ಉದಿತಿನ ಸಂಬಂಧೊಲೆನ್ ಸಾಹಿತ್ಯ ಲೋಕೊಗು ಎತ್ತಾವುನ ಪೊರುಂಬಾಟ.
ಐನ್ ನೇ ವಾರ್ಷಿಕೋತ್ಸವದ ಆಚರಣೆ
ಈ ಐನ್ ವರ್ಷದ ನಡಕೆನ್ ಆಚರಣೆ ಮಲ್ಪರೆ, ಡಿಬಿಟಿಎ ದ 5ನೇ ವರ್ಷೊಚ್ಚಯ ಬೊಕ ದ್ರಾವಿಡ ಭಾಷೆ ಅನುವಾದ ಪ್ರಶಸ್ತಿ ಪಟ್ಟುನ ಲೇಸ್ ಉಂದುವೇ ಬರ್ಪುನ ಸೆಪ್ಟೆಂಬರ್ 26 ತಾರೀಕ್ ಗ್ ಬೆಂಗ್ಳೂರುದ ಕನ್ನಡ ಭವನದ ನಯನ ಆಡಿಟೋರಿಯಂ ಡ್ ನಡಪರೆ ಉಂಡು.
ಈ ಸರ್ತಿ, ಡಿಬಿಟಿಎ ದ ತೆಲುಗು ಅನುವಾದ ಪ್ರಶಸ್ತಿನ್ ತಮಿಳು ಲೇಖಕೆರಾಯಿನ ಮುತ್ತು ನಾಗ ರೆನ ಕಾದಂಬರಿ ‘ಸುಲುಂಧೀ’ನ್ ತೆಲುಗು ಭಾಷೆಗ್ ಅನುವಾದ ಮಲ್ತಿನ ಬೊಳ್ಳಿ ರಾಮಸ್ವಾಮಿ ರಘುಪತಿರೆಗ್ ಕೊರೊಂದುಲ್ಲೆರ್.
ಕನಾ೯ಟಕ ಸರ್ಕಾರದ ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲು ಡಾ ಪುರುಷೋತ್ತಮ ಬಿಳಿಮಲೆ ಪ್ರಶಸ್ತಿ ಪ್ರದಾನ ಮನ್ಪುವೆರ್.
ಐನ್ ಬಾಸೆಲೆನ ಸಾಹಿತ್ಯಿಕ ಒತ್ತೊರ್ಮೆನ್ ಪ್ರತಿಬಿಂಬಿಸಾವುನ ಈ ಲೇಸ್ ಡ್ ನಾಲ್ ಪ್ರಮುಖ ಅಧಿವೇಶನೊಲು ಉಪ್ಪುಂಡು:
1. ಪಂಚ ದ್ರಾವಿಡ ಭಾಷಾ ಕಬಿಗೋಷ್ಠಿ
ಕನ್ನಡ, ತಮಿಳು, ತೆಲುಗು, ಮಲಯಾಳ, ತುಳು ಕವಿಕ್ಲೆನ್ ಕೂಟುಪಾಡೊಂದು.
2. ದ್ರಾವಿಡ ಭಾಷಾ ಸಂವಾದ
ದ್ರಾವಿಡ ಭಾಷೆಲೆನ ನಡುಟು ಅನುವಾದ, ಸಾಹಿತ್ಯ ವಿನಿಮಯ ಬೊಕ್ಕ ಪರಸ್ಪರ ಪಾತೆರಕತೆ .
3. ಉದ್ಘಾಟನಾ ಸಮಾರಂಭ ಬೊಕ್ಕ ಅನುವಾದ ಪ್ರಶಸ್ತಿ ಪ್ರದಾನ
ಡಿಬಿಟಿಎ ಐನನೇ ವರ್ಷೊಚ್ಚಯದ ನಿಲೆಟ್ ನಡಪುನ ಲೇಸುಲು.
4. ವಾರ್ಷಿಕ ಸಾಮಾನ್ಯ ಸಭೆ (ಎಜಿಎಂ)
ಸಂಘಟನೆದ ನನದ ಯೋಜನೆ ಬೊಕ್ಕ ಸಾಹಿತ್ಯ ಚಟುವಟಿಕೆಲೆನ ಬಗೆಟ್ ಚರ್ಚೆ.
ಒಂಜಿ ಬೂಕುದ ಅನ್ವೇಷಣೆಡ್ದ್ ಸುರು ಆಯಿನ ಪಯಣ ಇನಿ ಅವೇತೋ ಸಾಹಿತ್ಯಿಕ ಮನಸ್ಲೆನ್ ಒಟ್ಟು ಸೇರಾವುನ ಪಾಂಪು ಆದ್ ಬದಲಾತ್ಂಡ್.
ಪೂ ಅರಳೊಂದುಂಡು
ಕಮ್ಮೆನ ಪಸೆರೊಂದು ಪೋಪುಂಡು.
ಪಾಂಪು ಬುಲೆವೊಂದುಂಡು.
ಡಿಬಿಟಿಎ — ಅನುವಾದದ ಮೂಲಕ ಭಾಷೆಲೆನ್ ಬೊಕ ಮನಸ್ಲೆನ್ ಒಟ್ಟು ಮಲ್ತೊಂದುಂಡು.