Last updated on September 22nd, 2026 at 04:51 pm
ಬೆಂಗಳೂರ್, ಸೆ. 22: ವಿಧಾನ ಪರಿಷತ್ದ ರಡ್ಡನೇ ದಿನೊತ ಅಧಿವೇಶನೊಡು ಕೆಪಿಸಿಸಿ ಅಧ್ಯಕ್ಷೆ ಬೊಕ್ಕ ಪರಿಷತ್ ಸದಸ್ಯೆ ಬಿ.ಕೆ. ಹರಿಪ್ರಸಾದ್ ಮೇರ್ ಪನ್ತಿನ ಪಾತೆರ ಬಾರೀ ಹೈಡ್ರಾಮಾಗ್ ನೆವನ ಆದಿತ್ತ್ದ್ ಆಡಳಿತ ಬೊಕ್ಕ ವಿಪಕ್ಷೊಲೆನ ನಡುಟು ಮಲ್ಲ ವಾಗ್ವಾದ ನಡತ್ದ್ಂಡ್. ಸಾಲಮನ್ನಾ ವಿಚಾರೊಡು ಚರ್ಚೆ ಮಲ್ಪುನಗ 800 ರೈತೆರೆ ಪೆರಣ ಗೆತೊಂದಿನ ನರೇಂದ್ರ ಮೋದಿ ಪನ್ದ್ ಹರಿಪ್ರಸಾದ್ ಪನ್ಡ್ದಿತ್ತ್ದ್, ಆರೆನ ಈ ಪಾತೆರೊಗು ಬಿಜೆಪಿ ಸದಸ್ಯೆರ್ ಪಿಸ್ರಾತೆರ್. ಆಚಾರದಾಂತಿ ನಾಲಯಿ ಪನ್ದ್ ಪನೊಂದು ತಾಮರೆದಕುಲು ಪಾತೆರೊಗು ಪಾತೆರ ಬುಲೆಪಾಯಿನೆರ್ದಾವರ ಲಡಯಿ ಜೋರಾದಿತ್ತ್ದ್, ಪೀಠೊಡು ಇತ್ತಿನ ಸಭಾಪತಿಕುಲು ಲಕ್ಕ್ದ್ ಉಂತಿನ ಪ್ರಸಂಗೊಲಾ ನಡತ್ಂಡ್.
ಸಭಾಪತಿಕ್ಲೆನ ಬಿನ್ನಪುರ್ದ್ ಬೊಕ್ಕ ಕುಡ ಸುರು ಆಂಡ್ ಚರ್ಚೆ
ಸಾಲಮನ್ನಾದ ವಿಚಾರೊಡು ಚರ್ಚೆ ಆನಗ ಜನೊಕ್ಲೆನ ಅಕೌಂಟ್ ಗ್ 15 ಲಕ್ಷ ಪಾಡುವ ಪನ್ದ್ ಪನ್ಡಿನಕುಲು ಓಲ್ಲೆರ್? ಪನ್ದ್ ಕಾಂಗ್ರೆಸ್ದ ಸುನೀಲ್ ಕೇನ್ದೆರ್. ಈ ಪೊರ್ತುಡು ಆಡಳಿತ-ವಿಪಕ್ಷೊಲೆನ ನಡುಟು ಲಡಯಿ ತೊಡಂಗ್ದಿತ್ತ್ದ್, ಅವ್ವೇ ಪೊರ್ತುಡು ಗುಮೆಲುನ ಸೂ ಕ್ ನೆಯಿ ಮಯಿತಿಲೆಕ ಹರಿಪ್ರಸಾದ್ ಪನ್ಡಿನ ಪಾತೆರ ವಿಪಕ್ಷ ಸದಸ್ಯೆರೆ ಪಿತ್ತ್ಗೆಜಲ್ಪಾದ್ಂಡ್. ಈ ಪೊರ್ತುಡು ಸದಸ್ಯೆರೆ ನಡಕೆಗ್ ಸಭಾಪತಿ ಸಲೀಂ ಅಹ್ಮದ್ ಪಿಸ್ರ್ ಮಲ್ತೊಂದು, ಉಂದು ದಾದ ಮೀನ್ದ ಮಾರ್ಕೆಟಾ? ಪನ್ದ್ ಪ್ರಶ್ನೆ ಮಲ್ತ್ದೆರ್. ಸಭಾಪತಿಕ್ಲೆನ ಈ ಪಾತೆರೊಗು ಬಿಜೆಪಿದ ಕೇಶವ ಪ್ರಸಾದ್ ಸದು ಕೊರ್ದು, ಫಿಶ್ ಮಾರ್ಕೆಟ್ ವ್ಯವಸ್ಥೆ ಮಲ್ದಿನಿ ಈರ್. ಪಾತೆರ್ಯೆರೆ ಅವಕಾಶ ಕೊರ್ನೆಕ್ ಇಂಚ ಪಾತೆರೊಂದುಲ್ಲೆರ್ ಪನ್ದ್ ಆಕ್ರೋಶ ತೂಪಾದೆರ್. ಜನ ನಮನ್ ತೂವೊಂದುಲ್ಲೆರ್. ಗೌರವೊಡು ವಿಚಾರ ಚರ್ಚೆ ಮಲ್ಪುಲೆ. ಒರಿಯಗೊರಿ ಅಗೌರವ ಆಪಿಲೆಕ ನಡತೊನೊರ್ಚಿ ಪನ್ದ್ ಸಭಾಪತಿಕುಲು ಮನವಿ ಮಲ್ತಿ ಬೊಕ್ಕ ಕುಡ ಚರ್ಚೆ ಸುರು ಆತ್ಂಡ್.