Last updated on September 27th, 2026 at 08:00 am
ಕುಡ್ಲ, ಸೆ. 27: ಪಾಂಡೇಶ್ವರ ಕೈತಲ್ ಎರ್ಮೆಕೆರೆ ಕ್ರಾಸ್ ದಲ್ಪ ಇಪ್ಪುನ ರಾಮಲಕ್ಷ್ಮೀ ಹಾಲ್ ಸಭಾಭವನೊಡು ವಿದ್ಯಾರ್ಥಿ ಸಂಘಟನೆಲೆನ ಪದಾಧಿಕಾರಿಲೆನ ಸಮಾರಂಭ ನಡತೊಂದಿತ್ತಿನ ಪೊರ್ತುಡು ನೆನೆಪಂದಿನ ದುರಂತ ಒಂಜಿ ನಡತ್‌ದ್ಂಡ್. ಲೆಕ್ಕೊರ್ದೆಚ್ಚ ಜನ ಉಂತಾನೆರ್ದಾವರ ಕಾರಿಡಾರ್‌ದ ದುಂಬೇ ಪುಡವೊಂದು ಬೈದಿತ್ತಿನ ಬಾಲ್ಕನಿದ ಕಡ್ಚಿಲ್ ಜರಿದ್ ಬೂರ್ದಿನೆರ್ದಾವರ ಜೋಕುಲು ಮಿತ್ತ್‌ರ್ದ್ ತಿರ್ತ್ ಬೂರ್ದೆರ್. ಈ ಪೊರ್ತುಡು ಒರಿಯಗ್ ಗಾತಿದ ಗಡಿಕುಲಾದಿತ್ತ್‌ದ್ ಆಯೆ ಬ್ರೈನ್ ಡೆಡ್ ಸ್ಥಿತಿಟ್ ಉಲ್ಲೆ. ಒರಿನ ನಾಲ್ವೆರೆಗ್ಲಾ ಗಡಿಕುಲಾತ.
ನಡಪುಗು ಸಂಬಂಧಿತ್‌ದ್ ಕುಡ್ಲ ನಗರ ಪೊಲೀಸ್ ಆಯುಕ್ತೆ ಸಿ.ಎಚ್. ಸುಧೀರ್ ಕುಮಾರ್ ರೆಡ್ಡಿ ಮೇರ್ ಒಲವು ಕೊರ್ತೆರ್. ಪೊಲೀಸ್ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದಿನ ಪ್ರಕಾರ, ಎರ್ಮೆಕೆರೆ ಕ್ರಾಸ್ ಕೈತಲ್ ರಾಮಲಕ್ಷ್ಮೀ ಸಭಾಭವನೊಡು ವಿದ್ಯಾರ್ಥಿಲು ಅಕಲೆನ ಪದಾಧಿಕಾರಿಲೆನ ಸಮಾರಂಭಗ್ ಮಲ್ಲ ಸಂಖ್ಯೆಡ್ ಸೇರ್ದಿತ್ತೆರ್. ಕಾರಿಡಾರ್‌ಡ್ ಪಿದಯಿ ಉಂತುದಿತ್ತಿನ ಕೆಲ ವಿದ್ಯಾರ್ಥಿಲು ಅಲ್ಪದ ಕಡ್ಚಿಲ್‌ಗ್ ತಾಂಗ್ ಕೊರ್ದು ಉಂತುದಿತ್ತೆರ್. ಆಂಡ, ಅವು ದುಂಬೇ ಪುಡದ್ ಇತ್ತಿನೆರ್ದಾವರ, ದುನ್ನ ತಾಂಗೆರೆ ಆವಂದೆ ಒರರ್ದ್ ಒರಾನೆ ಜರಿದ್ ಬೂರ್ದ್ಂಡ್. ಅಂಚಾದ್ ಅಯಿಕ್ ತಾಂಗ್‌ದ್ ಉಂತುದಿತ್ತಿನ ವಿದ್ಯಾರ್ಥಿಲು ಆಯತತ್ತ್‌ದ್ ತಿರ್ತ್ ಬೂರ್ದೆರ್.
ನಡಪುಡು ಗಾತಿದ ಗಡಿಕುಲಾತಿನ ಒಟ್ಟು 5 ಜನ ವಿದ್ಯಾರ್ಥಿಲೆನ್ ಅಪಗನೇ ಕೈತಲ್ದ ಆಸ್ಪತ್ರೆಗ್ ದಾಕಲ್ತ್‌ದ್ ಮರ್ದ್ ಮಲ್ತ್‌ದೆಎರ್. ಇಂದೆಟ್ ಬಾರೀ ಜೋರ್‌ದ ಪೆಟ್ಟ್ ಬೂರ್ದಿನ ಒರಿ ವಿದ್ಯಾರ್ಥಿ ಇತ್ತೆ ಬ್ರೈನ್ ಡೆಡ್ (ಮೆದುಳು ನಿಷ್ಕ್ರಿಯ) ಸ್ಥಿತಿಟ್ ಇತ್ತ್‌ದ್, ಆಯನ ಸಾವುನು ಡಾಕ್ಟರ್‌ನಕುಲು ಅಧಿಕೃತವಾದ್ ದೃಢ ಮಲ್ತ್‌ದಿಜೆರ್. ಆಯಗ್ ಐಸಿಯು ಡ್ ಮರ್ದ್ ನಡತೊಂದುಂಡು. ಒರಿನ ನಾಲ್ವೆರ ವಿದ್ಯಾರ್ಥಿಲೆಗ್ಲಾ ಆಸ್ಪತ್ರೆಡ್ ಮರ್ದ್ ನಡತೊಂದುಂಡು.
ಜಾಗೆಗ್ ಪೊಲೀಸೆರ್ ಬತ್ತ್‌ದ್ ಪರಿಶೀಲನೆ ಮಲ್ತಿತ್ತ್‌ದ್, ಸಭಾಭವನೊದ ಸುರಕ್ಷತಾ ಕ್ರಮೊಕುಲಕ ಬೊಕ್ಕ ನಡಪುಗು ಸಂಬಂಧಿತ್‌ದ್ ನನದ ಕಾನೂನು ಕ್ರಮ ಗೆತೊನೊಂದುಲ್ಲ ಪನ್ದ್ ನಗರ ಪೊಲೀಸ್ ಆಯುಕ್ತೆರ್ ತೆರಿಪಾದೆರ್.