Last updated on September 28th, 2026 at 09:15 am
ಬೆಂಗಳೂರ್, ಸೆ. 28: ದ್ರಾವಿಡ ಭಾಷಾ ಅನುವಾದಕೆರೆನ ಸಂಘ ವೈಟ್ ಫೀಲ್ಡ್ ಬೆಂಗಳೂರು ಉಂದೆತ ಐನನೇ ವರ್ಷೋಚ್ಚಯ ಬೆಂಗಳೂರುಡು ಕನ್ನಡ ಸಂಸ್ಕೃತಿ ಇಲಾಖೆದ ನಯನ ಸಭಾಂಗಣಡ್ ಬಾರೀ ಗೌಜಿಡ್ ನಡತ್ಂಡ್. ಕೂಟದ ಸುಗಿಪುರ್ದು ಬೊಕ್ಕ ದ್ರಾವಿಡ ಭಾಷೆಲಾಯಿನ ತುಲು, ಕನ್ನಡ, ತಮಿಳು, ತೆಲುಗು, ಮಲಯಾಳಂ ಭಾಷೆದ 15 ಜನ ಕವಿನಕುಲು ಅಕುಲು ಅನುವಾದ ಮಂತಿನ ಕಬಿತೆಲೆನ ಕವಿಗೋಷ್ಠಿ ನಡತ್ಂಡ್, ಅಯಿರ್ದ್ ಬೊಕ್ಕ ಪಂಚ ದ್ರಾವಿಡ ಭಾಷೆದ ಅನುವಾದದ ಬಗೆಟ್ ಪಾತೆರಕತೆತ ತುಲಿಪೂ ನಡತ್ಂಡ್. ಒಂಜಿ ಭಾಷೆ ಬೊಕ ಪರಪೋಕುದ ಪೊರ್ಲು ತಿರ್ಲ್‌ನ್ ಬೊಕ್ಕೊಂಜಿ ಭಾಷೆ ಬೊಕ ರಾಜ್ಯೊದ ಜನಕುಲೆಗ್ ಎತ್ತಾಯೆರೆ ಅನುವಾದ ಅಗತ್ಯವುಂಡು, ಅನುವಾದಕೆರೆಗ್ ಅಕಾಡೆಮಿದ ಬೆರಿಬಲತ ಅಗತ್ಯವುಂಡು, ಸರಕಾರ ಈ ದಿಸೆಟ್ ಗುಮನ ಕೊರೊಡೂಂದು ಪಾತೆರ್ಯೆರ್. 2026ನೇ ಸಾಲ್‌ದ ಅನುವಾದ ಪ್ರಶಸ್ತಿ ನ್ ತಮಿಳು ಕಾದಂಬರಿ ‘ಸುಲುಂಧೀ’ ನ್ ತೆಲುಗುಗು ಅನುವಾದ ಮಂತಿನ ಶ್ರೀ ಬೊಳ್ಳಿ ರಾಮಸ್ವಾಮಿ ರಘುಪತಿರೆಗ್ ಪ್ರದಾನ ಮಂತೆರ್. ಈ ಪೊರ್ತುಡು ಡಿಬಿಟಿಎ ದ ವೆಬ್‌ಸೈಟ್ ಲೋಕೊಗರ್ಪಿತ ಆಂಡ್.
ಪ್ರಶಸ್ತಿ ಪ್ರದಾನ ಲೇಸ್‌ದ ಮಿತ್ತರ್ಮೆಡ್ ಡಾ. ಪುರುಷೋತ್ತಮ ಬಿಳಿಮಲೆ ಉದಿಪನ ಮಂತ್‌ದ್ ಅನುವಾದದ ಎಚ್ಚೆಲ್ಮೆದ ಬಗೆಟ್ ತೆರಿಪಾಯೆರ್. ಎನ್ ರಾಮನಾಥ್, ಡಿಬಿಟಿಎ ದ ಸಲಹೆಗಾರೆರಾಯಿನ ಡಾ.ನಾ ದಾ ಶೆಟ್ಟಿ, ಡಿಬಿಟಿಎ ದ ಗುರ್ಕಾರ್ಲು ಶ್ರೀಮತಿ ಸುಷ್ಮಾ ಶಂಕರ್, ಕಾರ್ಯಂತೆರಾಯಿನ ಶ್ರೀ ಕೆ.ಪ್ರಭಾಕರನ್, ಪಣವುದ ಪಾಲವೆರಾಯಿನ ಪ್ರೊ.ರಾಕೇಶ್.ವಿ.ಎಸ್, ಒತ್ತು ಗುರ್ಕಾರ್ಲು ಡಾ ಡಿ.ಎಸ್.ಶಿವಕುಮಾರ್ ಮಿತ್ತರ್ಮೆಡ್ ಒಲಾಗಾದಿತ್ತೆರ್. ಕಾರ್ಯಕಾರಿ ಸಮಿತಿದ ಶ್ರೀ ರೆಬಿನ್ ರವೀಂದ್ರನ್ ಸುದಾರಿಕೆ ಮಂತೆರ್. ಶ್ರೀ ಸರಸ್ವತಿ ಎಜ್ಯುಕೇಶನ್ ಸೆಂಟರ್ ದ ಕಲ್ಪಾದಿಲು ಬೊಕ ಕಲ್ಪಾರ್ತಿಲು ಸಹಾಯ ಮಂತೆರ್. ತೆನ್ಕಾಯಿ ಭಾರತದ ಕವಿನಕುಲು, ಊರ ಪರವೂರುದ ಸಾಹಿತ್ಯ ಅಭಿಮಾನಿಲು ಲೇಸ್‌ಗ್ ಕಲೆದಿಂಜಾಯೆರ್.
