Last updated on September 28th, 2026 at 11:34 am
ಮಣಿಪಾಲ, ಸೆ.28: ಕಂಬುಲ ಕ್ಷೇತ್ರೊಡು ಪಾಕ ಸಾದಗೊಲೆನ್ ಬೆನ್ದ್‌ದ್, ಲೆಜೆಂಡ್ ಪಟ್ಟೊಗು ಏರ್ದಿತ್ತಿನ ನಂದಳಿಕೆ ಪಾಂಡು (23 ವ) ಎರು ಸೋಮವಾರ (ಸೆ.28) ಕಾಂಡೆ ತೀರ್ದ್ಂಡ್.
ಪ್ರಾಯ ಆಯಿಲೆಕನೆ ಬರ್ಪಿನ ಆರೋಗ್ಯ ಸಮಸ್ಯೆರ್ದಾವರ ಪಾಂಡು ತೀರ್ದ್ಂಡ್.
ಮಲ್ಲ ಅಭಿಮಾನಿ ಬಳಗ ಇತ್ತಿನ ಪಾಂಡು ಕಂಬುಲಡ್ ತನ್ನನೇ ಆಯಿನ ಛಾಪು ಮಲ್ದಿನ ಎರು. ತನ್ನ ಬಲಿಪು, ಸ್ವಭಾವೊರ್ದಾವರ ಅಭಿಮಾನಿಲೆಗ್ ಮುಟ್ಟ ಆದಿತ್ತಿನ ಪಾಂಡು ಬಲ್ಲ್‌ದ ವಿಭಾಗೊಡು ಮಾಮಲ್ಲ ಸಾದಗೊ ಬೆನ್ತಿನಾಯೆ.
ಕಾರ್ಕಳ ಜೀವನ್‌ದಾಸ್ ಅಡ್ಯಂತಾಯೆರೆ ಇಲ್ಲಡ್ ಇತ್ತಿನ ಪಾಂಡು ಅಲ್ಪರ್ದೇ ಕಂಬುಲ ಜೂವನ ಸುರು ಮಲ್ತಿತ್ತೆ. ಅಪಗ ಆರ್ ಬಲ್ಲ್‌ದ ಎಲ್ಯ ವಿಭಾಗೊಡು ಗಿಡತೊಂದಿತ್ತೆರ್. ಒಂಜಿ ವರ್ಸ ಕರಿದ್ ಅತ್ತೂರು ಮನ್ಮಥ ಶೆಟ್ರ್ ತನ್ನ ಕಂಬುಲ ಜರ್ನಿ ಸುರು ಮಲ್ಪೆರೆ ಅಡ್ಯಂತಾಯೆರೆನಲ್ಪರ್ದ್ ಪಾಂಡುನ್ ಲೆತೊಂದು ಬತ್ತೆರ್. ಅಲ್ಪರ್ದ್ ಸುರು ಆಂಡ್ ಪಾಂಡುನ ಮೆಡಲ್ ಜರ್ನಿ. ಬಲ್ಲ್‌ದ ಜೂನಿಯರ್ ವಿಭಾಗೋಡು ಬೆರಿಬೆರಿ ರಡ್ಡ್ ವರ್ಸ ಸರಣಿ ಶ್ರೇಷ್ಠ ಪ್ರಶಸ್ತಿ ಗೆಂದ್‌ದಿತ್ತೆ.
ಪಾಂಡು 2009 ದ ಅಂದಾಜಿಗ್ ಸೀನಿಯರ್ ನಿಲವುಗು ಬತ್ತೆ. ಅತ್ತೂರು ಮನ್ಮಥ ಶೆಟ್ರ್ ಜೂನಿಯರ್ ವಿಭಾಗೊಡು ಗಿಡತೊಂದಿತ್ತಿನೆರ್ದಾವರ ಪಾಂಡುನು ಮಗ್ತವರ್ಸ ಕರಿಂಜೆ ವಿನು ವಿಶ್ವನಾಥ್ ಶೆಟ್ರ್ ಲೆತೊಂದು ಬತ್ತೆರ್. ಅಲ್ಪ ಪಾಂಡು ಎಡ್ಡೆ ಪುದರ್ ಮಲ್ತೆ. ದುಂಬಗ್ ನಂದಳಿಕೆ ಶ್ರೀಕಾಂತ್ ಭಟ್ರೆ ಕಿದೆಕ್ ಬತ್ತಿನ ಪಾಂಡು ಅಪಗನೇ ಲೆಜೆಂಡ್ ಆದಿತ್ತೆ.
ಕಂಬುಲ ದಿಗ್ಗಜ ಚೆನ್ನೆ, ಮೋಡೆ ಎರ್ಲೆನ ಒಟ್ಟುಗು ಪಾಂಡು ಜತೆಯಾದ್ ಬಲ್ತ್‌ದ್ ಪುದರ್ ಮಲ್ತಿತ್ತೆ. ನಕ್ರೆ ಜಯಕರ ಮಡ್ಯೆಲೆರ್ ಪಾಂಡುನ್ ಗಿಡರ್‌ದ್ ಪಾಕ ಮೆಡಲ್ ಆಕ್‌ದೆರ್.
ಕಾರ್‌ ಸಮದಾಂತೆ ಇತ್ತ್ಂಡಲಾ ಲೆಜೆಂಡ್
ಬೀಸ ಬಲಿಪುನೆಕ್ ಪುದರಾದಿತ್ತಿನ ಪಾಂಡು ಪುಟ್ಟುನಗನೇ ಆಯನ ಎದುರುದ ಬಲತ್ತ ಕಾರ್‌ದ ಪಾದ 70 ಡಿಗ್ರಿ ತಿರ್ಗ್‌ದಿತ್ತ್ಂಡ್. ಈ ನ್ಯೂನತೆ ಇತ್ತ್ಂಡಲಾ ಪಾಂಡುನ ಬಲಿಪು ಏಪೊಗುಲಾ ಮೆಲ್ಲ ಆದಿಜ್ಜಂಡ್. ಆತೇ ಅತ್ತಂದೆ ಪಾಂಡುನ ಕಾರ್‌ದ ಗಂಟ್ ಡಿಸ್ಲೊಕೇಶನ್ ಆವೊಂದಿತ್ತ್ಂಡ್, ಗಂಟ್‌ದ ಸಮಸ್ಯೆ ಇಪ್ಪೆದ್ಂಡ್. ಈತ್ ಮಾತ ಅಡ್ಡ ಇತ್ತ್ಂಡಲಾ ಪಾಂಡು ತನ್ನ ಬಲಿಪುಡೇ ಅಭಿಮಾನಿಲೆನ ಉಡಲ್ ಗೆಂದ್‌ದಿತ್ತೆ.
ಸುಮಾರ್ ಮೂಜಿ ವರ್ಸೋಗು ದುಂಬು ಹೊಕ್ಕಾಡಿಗೋಳಿ ಕಂಬುಲಡ್ ಪಾಂಡು ಅಕೇರಿದ ಮೆಡಲ್ ಆಕ್‌ದಿತ್ತೆ. ಬೊಕ್ಕ ಶ್ರೀಕಾಂತ್ ಭಟ್ರೆನ ಕಿದೆಟ್ ಇತ್ತಿನ ಪಾಂಡು ಇನಿ ಶಾಶ್ವತವಾದ್ ಅಂಚಿಗ್ ಮುಟ್ಟ ಆತೆ.