Last updated on September 29th, 2026 at 09:21 am
ಕುಡ್ಲ, ಸೆ. 29: ಪೇಂಟೆಡ್ ನೀರ್ ಸಪ್ಲೈ ಬೊಕ್ಕ ಉಲಕನಿ ಸಮ ಮಲ್ಪರೆ ಏಷ್ಯನ್ ಅಭಿವೃದ್ಧಿ ಬ್ಯಾಂಕ್‌ರ್ದ್ ರಡ್ಡ್ ದಶಕೊಗು ದುಂಬು ಗೆತೊಂದಿನ ಕಡತ ಬಾಕಿ ಇತ್ತೆ ಮಲ್ಲ ಮೊತ್ತ ಆದ್ ಬುಲೆದ್ ಉಂತುದುಂಡು. ಈ ಮೊತ್ತ 1,375.17 ಕೋ. ರೂ!
ಮಾಹಿತಿ ಹಕ್ಕು ಕಾಯಿದೆದಡಿಟ್ ತಿಕ್ಕಿನ ಒಲವುದ ಪ್ರಕಾರ, ಯೋಜನೆದ ಜಾರಿ ಸಂಸ್ಥೆಯಾಯಿನ ಕೆಯುಐಡಿಎಫ್‌ಸಿಗ್ ಸುರುಟು ಬುಡುಗಡೆಯಾದಿತ್ತಿನ ಅಸಲ್ ಕಡತ ಮೊತ್ತ 380.34 ಕೋ. ರೂ. ಆದಿತ್ತ್ಂಡ್. ಆಂಡ ಏರೊಂದುಪ್ಪುನ ಬಡ್ಡಿ ಬೊಕ್ಕ ಶೇ. 2.5 ತಾತ್ ದಂಡೊದ ಬಡ್ಡಿರ್ದಾವರ 2026ತ ಎಪ್ರಿಲ್‌ಡ್ ಈ ಮೊತ್ತ 1,375.17 ಕೋ. ರೂ. ಗ್ ಎತ್ತ್‌ದ್ಂಡ್. 2026ಕ್ಕ್ ಕಡತ ಅವಧಿ ಮುಗಿಯೊಂದು ಬತ್ತ್ಂಡಲಾ ಪಾಲಿಕೆ ಇದಮುಟ್ಟ ಒಂಜೇ ಒಂಜಿ ಕಂತ್‌ನ್ಲಾ ಕಟ್ಟ್‌ದಿಜಿ.
ಕಡ ಕಟ್ಟೆರೆ ಕೆಯುಐಡಿಎಫ್‌ಸಿ ಇತ್ತೆನೇ 24ರ್ದ್ ಎಚ್ಚ ‘ಡಿಮ್ಯಾಂಡ್ ನೋಟಿಸ್’ ಕೊರ್ದಿತ್ತ್ಂಡಲಾ ಪಾಲಿಕೆ ಗೆನ್ತೊಂದಿಜ್ಜಿಗೆ. ಪಾಲಿಕೆ ಕಡ ತ ಒಂಜೆ ಒಂಜಿ ಕಂತ್‌ನ್ಲಾ ಕಟ್ಟ್‌ದಿಜಿಂದಾಂಡ, ಉಲಕನಿ ಸೆಸ್ ಬೊಕ್ಕ ಬೇತೆ ಬೇತೆ ತಿರ್ವೆದ ಪುದರ್‌ಡ್ ಸಾರ್ವಜನಿಕೆರೆಡ ಒಟ್ಟು ಮಲ್ತಿನ ಕಾಸ್ ಓಡೆ ಪೋಂಡು? ಅಯಿನ್ ಬೇತೆ ಬೇಲೆಲೆಗ್ ಕಲುಗಲಕೆ ಮಲ್ತೊಂದೆರಾ? ಪನ್ದ್ ಎಡಿಬಿ ಕಡ ಕ್ ಸಂಬಂಧಿತಿನ ಎನ್‌ಜಿಒ ಕಾರ್ಯಪಡೆತ ಮಾಜಿ ಸಂಚಾಲಕೆ ಹರ್ಷ ಡಿ’ಸೋಜಾ ಪ್ರಶ್ನೆ ಮಲ್ತ್‌ದೆರ್.
ಈ ಬಗೆಟ್ ಪ್ರತಿಕ್ರಿಯೆ ಕೊರ್ನ ಪಾಲಿಕೆ ಅಧಿಕಾರಿಲು, ಕೆ.ಯು.ಡಿ.ಸಿ.ಇ. ಎಂ.ಪಿ. ಅಡಿಟ್ ಕಾಮಗಾರಿ ಮುಗಿತಿನೆಕ್ ಸೂಕ್ತ ಪುರಾಪುಲು ಇಜ್ಜ. ಅಂಚಾದ್ ಅಲಕ್ಕ ಕಡನ್ ಮನ್ನಾ ಮಲ್ಪೆರೆ ಕೇನ್ಡ್‌ದ್ ಕೆಯುಐಡಿಎಫ್‌ಸಿಗ್ ಓಲೆ ಬರೆತ್ಂಡ್ ಅಂಚೆನೇ ಸರಕಾರೊದ ನಿರ್ದೇಶನೊಗು ಕಾತೊಂದುಲ್ಲ ಪನ್ದ್ ಪನ್ಡೆರ್.
ಸರಕಾರ ಗ್ಯಾರಂಟರ್
ಇಂಚಿನ ಕಡಕ್ಲೆಗ್ ಸಾಮಾನ್ಯವಾದ್ ರಾಜ್ಯ ಸರಕಾರೊನೇ ಗ್ಯಾರಂಟರ್ ಆದುಪ್ಪುಂಡು, ಅತ್ತಂದೆ ಮಲ್ಲ ಮೊತ್ತ ಆಯಿನೆರ್ದಾವರ ಮನಪಾರ್ದ್‌ಲಾ ಕಡ ಪಿರಕಟ್ಟೆರ ದುಂಬುರ್ದ್‌ಲಾ ಏರ್ಲಾ ಕ್ರಮ ಗೆತೊಂದಿಜೆರ್ ಪನ್ದ್ ಪನ್ಪೆರ್ ಮಾಜಿ ಮೇಯರ್ ಶಶಿಧರ ಹೆಗ್ಡೆ.
ಕುಡೊರಿ ಮಾಜಿ ಮೇಯರ್ ಪ್ರೇಮಾನಂದ ಶೆಟ್ಟಿ ಪನ್ಪುನ ಪ್ರಕಾರ, ಒಂತೆ ವರ್ಸ ಎಡಿಬಿ ಕಡ ಬೂಟೆರ ಬಜೆಟ್‌ಡ್ ಮಂಜೂರಾತಿ ಕೊರೊಂದಿತ್ತೆರ್, ಆಂಡ ಕಾಸ್ ಕೊರೊಂದಿಜ್ಜಂಡ್. ಆತೇ ಅತ್ತಂದೆ ರಾಜ್ಯ ಹಣಕಾಸ್ ಆಯೋಗೊದ ಅನುದಾನೊನ್ಲಾ ಉಂತಾದ್ ಕಡ ತ ಕಂತ್ ಕಟ್ಟುನ ಪನ್ದ್ ಪನೊಂದಿತ್ತೆರ್. ಈತ್ ಮಲ್ಲ ಮೊತ್ತನ್ ನನ ದಾದ ಇತ್ತ್ಂಡಲಾ ಸರಕಾರೊರ್ದೇ ಕಟ್ಟೆರೆ ಕ್ರಮ ಗೆತೊನೊಡು ಪನ್ದ್ ಪನ್ಡೆರ್.