Last updated on November 14th, 2026 at 07:13 am
ಕುಡ್ಲ, ನ. 14: ಒವ್ವೇ ಅಧಿಕೃತ ದಾಕಲೆಲುದಾಂತೆ ಪೇಂಟೆಡ್ ಅಕ್ರಮವಾದ್ ಒಕ್ಕೆಲ್ ಕುಲ್ಲುದು, ರೆಸ್ಟೋರೆಂಟ್ ಒಂಜೆಟ್ ಬೇಲೆ ಮಲ್ತೊಂದಿತ್ತಿನ ಇರ್ವೆರ್ ಬಾಂಗ್ಲಾದೇಶೊದ ಪ್ರಜೆಕುಲೆನ್ ಪಣಂಬೂರು ಪೊಲೀಸೆರ್ ನಾಡ್ಪತ್ತ್ದ್ ಉಲಕೈ ಮಲ್ತೊಂದೆರ್ ಪನ್ದ್ ಕುಡ್ಲ ನಗರ ಪೊಲೀಸ್ ಕಮಿಷನರ್ ಸುಧೀರ್ ಕುಮಾರ್ ರೆಡ್ಡಿ ತೆರಿಪಾದೆರ್. ಬಾಂಗ್ಲಾದೇಶ ಮೂಲೊದ ಅಶಿಕುಲ್ ಇಸ್ಲಾಂ ಬೊಕ್ಕ ಎಂಡಿ ಅಮೀನ್ ಅಕ್ರಮ ವಲಸಿಗೆರ್.

ಪಣಂಬೂರು ಪೊಲೀಸ್ ಸ್ಟೇಶನ್ ಸೀಮೆದ ಪಣಂಬೂರು ಬೀಚ್ ಕೈತಲ್ ರೆಸ್ಟೋರೆಂಟ್ ಒಂಜೆಟ್ ಬಾಂಗ್ಲಾದೇಶೊದ ಅಕ್ರಮ ವಲಸಿಗೆರ್ ಬೇಲೆ ಮಲ್ತೊಂದಿತ್ತಿನ ಬಗೆಟ್ ಪೊಲೀಸ್ ಇನ್ಸ್ಪೆಕ್ಟರ್ ರೆಗ್ ಪತ್ತ ಒಲವು ತಿಕ್ಕ್ದಿತ್ತ್ಂಡ್. ಅಂಚಾದ್ ಪಣಂಬೂರ್ ಪೊಲೀಸೆರ್ ರೆಸ್ಟೋರೆಂಟ್ದ ಮಿತ್ತ್ ದಾಳಿ ಮಲ್ತ್ದ್ ಇರ್ವೆರೆನ್ಲಾ ಉಲಕೈ ಮಲ್ತ್ ವಿಚಾರಣೆ ಮಲ್ತ್ದೆರ್. ವಿಚಾರಣೆದ ಪೊರ್ತುಡು ಇರ್ವೆರ್ಲಾ ಒವ್ವೇ ಪಾಸ್ಪೋರ್ಟ್, ವೀಸಾ ಅತ್ತ್ಂಡ ಬೇತೆ ಅಧಿಕೃತ ದಾಕಲೆಲುದಾಂತೆ ಅಕ್ರಮವಾದ್ ಭಾರತೊಗು ಪೊಗ್ಗುದು ಕುಡ್ಲಡ್ ಕುಲ್ಲುದಿನ ದೃಢ ಆತ್ಂಡ್.
ಇತ್ತೆ ಇರ್ವೆರೆನ್ ವಲಸಿಗೆರೆನ್ ಅಕ್ರಮ ವಲಸಿಗೆರೆ ಬಂಧನ ಕೇಂದ್ರೊಡು (Detention Centre) ದೀತೆರ್. ನನದ ಕಾನೂನು ಪ್ರಕ್ರಿಯೆದ ಭಾಗ ಆದ್ ಮೊಕಲೆನ್ FRRO ಎದುರು ಲೆತೊಂದು ಪೋದಿತ್ತ್ದ್, ಅಕಲೆನ ದೇಶೊಗು ಗಡಿಪಾರ್ (Deportation) ಮಲ್ಪುನ ಪ್ರಕ್ರಿಯೆನ್ ಪಣಂಬೂರು ಪೊಲೀಸೆರ್ ಸುರು ಮಲ್ತ್ದೆರ್. ಪಣಂಬೂರು ಪೊಲೀಸ್ ಇನ್ಸ್ಪೆಕ್ಟರ್ ಸಲೀಂ ಅಬ್ಬಾಸ್ ರೆನ ಮುತಾಲಿಕೆಡ್ ನಡತಿನ ಈ ಕಾರ್ಯಾಚರಣೆಡ್ ಪಿಎಸ್ಐ ಶ್ರೀಕಲಾ ಕೆ.ಟಿ., ಜ್ಞಾನಶೇಖರ್ ಬೊಕ್ಕ ಸಿಬ್ಬಂದಿ ಇಮ್ತಿಯಾಝ್, ಫಕಿರೇಶ್ ಬೊಕ್ಕ ರಾಕೇಶ್ ಎಲ್.ಎಂ. ಪಾಲ್ಪಡೆದಿತ್ತೆರ್.