Last updated on November 21st, 2026 at 04:08 pm
ಕುಡ್ಲ: ನವೆಂಬರ್ 19 ಗುರುವಾರ ಬಯ್ಯಡ್ ಕುಬ್ಲದ ಪುರಭವನೊಡು “ಪ್ರಕೃತಿ ಸಂಭ್ರಮ 2026” ಬೊಕ್ಕ “ಪ್ರಕೃತಿ ಪ್ರಶಸ್ತಿ 2026” ಪನ್ಪಿ ಲೇಸ್ ಗರ್ದ್ಡ್ ನಡತ್ಂಡ್.

ಕಾರ್ಯಕ್ರಮೊದ ಗುರ್ಕಾರ್ಮೆದ ಮಣೆಟ್ ಪುಗರ್ತೆದ ತುಳು ಸಾಹಿತಿಲು ಶ್ರೀ ಮಹೇಂದ್ರನಾಥ್ ಸಾಲೆತ್ತೂರ್ ಮೇರ್ ಕುಲ್ಲುದಿತ್ತೆರ್, ಧಾರ್ಮಿಕ ಕ್ಷೇತ್ರೊದ ಜಿ ಎ ಬೋಳೂರು ಮೇರ್ ತುಡರ್ ಅರ್ಲಾದ್ ಲೇಸ್ದ ಉದಿಪನ ಮಲ್ತೆರ್. ಕಡೀರ ಪ್ರಕೃತಿ ಪ್ರಶಸ್ತಿನ್ ತುಳು ರಂಗ ಭೂಮಿದ ಪೆರಿಯ ಕಲಾವಿದೆದಿ ಅಂಚೆನೇ ಪಘರಿಯ ಬಹುಭಾಷಾ ಚಲನಚಿತ್ರ ನಟಿ ಶ್ರೀಮತಿ ಸರೋಜಿನಿ ಶೆಟ್ಟಿ ಮೆರೆಗ್ ಪ್ರದಾನ ಮಲ್ತೆರ್, ಸಾದಗೊಗು ತಮ್ಮನೊನು ಕರ್ನಾಟಕ ಸರಕಾರೊದ ರಾಜ್ಯ ಧಾರ್ಮಿಕ ಪರಿಷತ್ ಪದುಕೆದಿ ಶ್ರೀಮತಿ ಮಲ್ಲಿಕಾ ಪ್ರಶಾಂತ್ ಪಕ್ಕಳ ಮೇರ್ ಮಲ್ತ್ ಕೊರ್ಯೆರ್. ಸನ್ಮಾನ ಪ್ರಶಸ್ತಿ ಸ್ವೀಕರಿತಿನ ಸರೋಜಿನಿ ಶೆಟ್ಟಿ ಮೇರ್ ಆರೆನ ಪಾಲ್ಗ್ ಒದಗ್ದ್ ಬತ್ತಿನ ಪ್ರಶಸ್ತಿನ್ ಆರೆನ ಕಲೆಕ್ ಬೆರಿತಾಂಗ್ ಆದ್ ಉಂತಿನ ಆರೆನ ಅಪ್ಪೆಗ್ ಸಮರ್ಪಣೆ ಮಲ್ತ್ದ್ ಕಣ್ಣರುನು ಚಂಡಿ ಮಲ್ತೊಂಡೆರ್. ನಮ್ಮ ತುಳು ನಾಟಕ ರಂಗೊದ ಮಾತಾ ಕೂಟೊಲು ಒಂಜಪ್ಪೆ ಜೋಕುಲೆಲೆಕ ಒರಿಯಗೊರಿ ವೊಂದು ಇಪ್ಪೊಡು ಪನ್ದ್ ಕೆಬಿಪಾತೆರ ಪನ್ಡೆರ್. ಆರೆಗ್ ಮಾನಾದಿಗೆ ಮಲ್ತಿನ ಶ್ರೀಮತಿ ಪಕ್ಕಳ ಮೇರ್ ಸರೋಜಿನಿ ಶೆಟ್ಟಿ ಮೆರೆನ ಸಾಧಗೊಲೆನ್ ನೆಂಪು ಮಲ್ತೊಂಡೆರ್.


ಲೇಸ್ಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಪದುಕೆರ್ ಬೆಳುವಾಯಿ ನವೀನ್ ಕುಮಾರ್ ಹೆಗ್ಡೆ, ಲ| ಗಣೇಶ್ ಶೆಟ್ಟಿ, ನ್ಯಾಯವಾದಿಲು, ಕನ್ನಡ ಜಾನಪದ ಪರಿಷತ್ದ ಉಪಾಧ್ಯಕ್ಷೆರ್ ಮೋಹನ್ ದಾಸ್ ರೈ, ಶ್ರೀಧರ್ ಅಮೀನ್ ಮಣಿಪುರ, ಯಶೋಧರ ಚೌಟ, ಸುರೇಶ್ ಆಚಾರ್ ದೇರಳಕಟ್ಟೆ ಮಿತ್ತಚಾವಡಿಡ್ ಇತ್ತ್ದ್ ಲೇಸ್ದ ಪೊರ್ಲು ಎಚ್ಚಾಯೆರ್.
ಪ್ರಕೃತಿ ಕಲಾವಿದೆರ್ ಕೂಟೊದ ಗುರ್ಕಾರೆ ರಂಗಕೇಸರಿ ರಮೇಶ್ ರೈ ಕುಕ್ಕುವಳ್ಳಿ ಪ್ರಾಸ್ತಾವಿಕವಾದ್ ಪಾತೆರ್ದ್ ಬಿನ್ನೆರೆನ್ ಎದುಕೊಂದು ಒಟ್ಟುಗು ಕೂಟ ಬುಲೆದ್ ಬತ್ತಿನ ಸಾದಿದ ಬಗೆಟ್ ಪನ್ಡೆರ್. ಪೆರಿಯ ಸಾಹಿತಿ ಮಹೇಂದ್ರನಾಥ್ ಸಾಲೆತ್ತೂರು ಮೇರ್ ಪೆರಿಯ ನಟಿ ಸರೋಜಿನಿ ಶೆಟ್ಟಿ ಮೆರೆನ ಸಾದಗೊಲೆನ್ ನೆಂಪು ಮಲ್ತ್ದ್ ಎಡ್ಡೆಪ್ಪು ಬಯಕ್ದ್, ಕೂಟೊದ ಪೆರಿಯ ಕಲಾವಿದೆರೆಗ್ ಮಾನಾದಿಗೆ ಮಲ್ಪುನವು ಇನಿತ ತರೆಮಾರ್ಗ್ ಮಾದರಿ ಪನ್ದ್ ಪನ್ಡೆರ್. ನಮ್ಮ ಕುಡ್ಲ ವಾಹಿನಿದ ಸುದ್ದಿ ವಾಚಕೆರಾಯಿನ ಡಾ| ಪ್ರೀಯಾ ಹರೀಶ್ ಲೇಸ್ ಸುದಾರ್ತೇರ್, ಗೋಪಿನಾಥ್ ಶೆಟ್ಟಿ ಕಾವೂರು ಮೇರ್ ಸೊಲ್ಮೆ ಸಂದಾಯೆರ್.
ಬೊಕ್ಕ “ರಂಗಕೇಸರಿ” ರಮೇಶ್ ರೈ ಕುಕ್ಕುವಳ್ಳಿ ಸಾರಥ್ಯೊದ ಪ್ರಕೃತಿ ಕಲಾವಿದೆರ್ ಕುಡ್ಲ ಮೊಕಲೆನ “ಕೃಷ್ಣಣ್ಣ ಬೇಗ ಬಲೆ” ಪನ್ಪಿ ತುಳು ಹಾಸ್ಯನಾಟಕ ಯಶಸ್ವಿಯಾಗಿ ಪ್ರದರ್ಶನ ಆಂಡ್.