“ಸಿಎಂ ಸರ್, ಬಾರೀ ಬೇನೆಡ್ ಈ ಓಲೆ ಬರೆಯೊಂದುಲ್ಲ: ಈರ್ನ ಪೊಲೀಸೆರ್ ಎಂಕ್ಲೆನ ಮಿತ್ತ್ ಫೇಕ್ ಕೇಸ್ ಪಾಡ್ದೆರ್” ಮಣಿಪಾಲ ವಿದ್ಯಾರ್ಥಿಲೆನ ಗಂಭೀರ ಆರೋಪ

Last updated on November 19th, 2026 at 12:26 pm

ಒಡಿಪು, ನ.19: ಪರ್ಬದ ಪೊರ್ತುಡು ಸಾದಿಡ್ ಪಟಾಕಿ ಪುಡತ್‌ದ್ ಮರ್ಲ್ ಕಟ್ಟ್‌ದಿನ ಪ್ರಕರಣೊಗು ಸಂಬಂಧಿತ್‌ದ್ ಮಣಿಪಾಲ ಪೊಲೀಸೆರೆ ಮಿತ್ತ್ ಗಾತಿದ ದೌರ್ಜನ್ಯೊದ ಆರೋಪ ಕೇನ್ದ್ ಬೈದ್ಂಡ್. ಸಾರ್ವಜನಿಕ ಸಾದಿಡ್ ಏರಾ ಕೆಂಗುಡೆರ್ ಮಲ್ದಿನೆಕ್, ಕೃತ್ಯೊಗು ಸಂಬಂಧೊನೇ ದಾಂತಿನ, ಪರೀಕ್ಷೆಗ್ ಓದೊಂದಿತ್ತಿನ ಅಮಾಯಕ ವಿದ್ಯಾರ್ಥಿಲೆನ ಫ್ಲ್ಯಾಟ್‌ಗ್ ಪೊಗ್ಗುದು ಪೊಲೀಸೆರ್ ಹಲ್ಲೆ ಮಲ್ತ್‌ದೆರ್ ಪನ್ದ್ ಆರೋಪ ಮಲ್ತ್‌ದೆರ್. ಈ ಬಗೆಟ್ ಮಣಿಪಾಲದ ಪ್ರತಿಷ್ಠಿತ ಖಾಸಗಿ ವಿದ್ಯಾಸಂಸ್ಥೆದ ಎಂಜಿನಿಯರಿಂಗ್ ವಿದ್ಯಾರ್ಥಿಲು ಮುಖ್ಯಮಂತ್ರಿಲೆಗ್ ಇ-ಮೇಲ್ ಮುಕೇನ ಒಯಿಲ್ ಸಂದಾದ್, ಇತ್ತೆನೇ ಈ ವಿಷಯೊಗು ಪಿರಿಕಟ್ಟ್ ಮಲ್ಪೆರೆ ಕೇನ್ದೆರ್.

ನವೆಂಬರ್ 10ತಾನಿ ಮಣಿಪಾಲದ ಅಪಾರ್ಟ್‌ಮೆಂಟ್ ಒಂಜೆತ ಅದೆಕ್ ಪೊಗ್ಗಿನ ಪೊಲೀಸ್ ಸಿಬ್ಬಂದಿ, ಪರೀಕ್ಷೆಗ್ ಓದೊಂದಿತ್ತಿನ ವಿದ್ಯಾರ್ಥಿಲೆಗ್ ಮಾತೆರ್ನ ಎದುರೇ ತಾರಾಮರ ಆಕ್‌ದೆರ್ ಪನ್ದ್ ಆರೋಪ ಮಲ್ತ್‌ದೆರ್. ಪೊಲೀಸೆರ್ ವಿದ್ಯಾರ್ಥಿಲೆಗ್ ಆಕುನ ದೃಶ್ಯೊಲು ಅಪಾರ್ಟ್‌ಮೆಂಟ್‌ದ ಸಿಸಿಟಿವಿ ಕ್ಯಾಮೆರಾಡ್ ಕೈದಾತ್ಂಡ್‌ಗೆ.

ಫ್ಲ್ಯಾಟ್‌ರ್ದ್ ವಿದ್ಯಾರ್ಥಿಲೆನ್ ಒವ್ವೇ ಸಮಗಟ್ಟ್ ನೆನವ ಕೊರಂದೆ ಪೊಲೀಸ್ ಸ್ಟೇಷನ್‌ಗ್ ಒಯ್ತೊಂದು ಪೋದಿತ್ತ್‌ದ್, ಕಾಂಡೆ 11 ಗಂಟೆರ್ದ್ ರಾತ್ರೆ 8 ಗಂಟೆ ಮುಟ್ಟ ಸ್ಟೇಶನ್‌ಡೇ ಕುಲ್ಲಾದ್ ಮಾನಸಿಕ ಬೊಕ್ಕ ದೈಹಿಕ ಹಿಂಸೆ ಕೊರ್ತೆರ್. ಆತೇ ಅತ್ತಂದೆ, ಸಬ್ ಇನ್‌ಸ್ಪೆಕ್ಟರ್ ಅಮಾಯಕ ವಿದ್ಯಾರ್ಥಿಲೆಗ್ ಆಕ್‌ದೆರ್ ಅಂಚೆನೇ ಕಲು ಎಫ್‌ಐಆರ್ ದಾಕಲ್ತ್‌ದೆರ್ ಪನ್ದ್ ವಿದ್ಯಾರ್ಥಿಲು ಪನೊಂದೆರ್.

ತನ್ಕುಲೆ ಭವಿಷ್ಯೊದ ಬಗೆಟ್ ಪೋಡಿದ್ ಖಾಸಗಿ ವಿದ್ಯಾಸಂಸ್ಥೆದ ಎಂಜಿನಿಯರಿಂಗ್ ವಿದ್ಯಾರ್ಥಿಲು ಮುಖ್ಯಮಂತ್ರಿಲೆಗ್ ಬರೆತಿನ ಓಲೆಡ್ ಅಕ್ಲೆನ ಬೇನೆನ್ ಪನ್ಡೊನ್ದೆರ್. “ಗೌರವಾನ್ವಿತ ಮುಖ್ಯಮಂತ್ರಿಲೇ, ಎಂಕ್ಲ ಒಡಿಪು ಜಿಲ್ಲೆದ ಮಣಿಪಾಲದ ಖಾಸಗಿ ವಿದ್ಯಾಸಂಸ್ಥೆದ ಎಂಜಿನಿಯರಿಂಗ್ ವಿದ್ಯಾರ್ಥಿಲು, ಮಣಿಪಾಲ ಪೊಲೀಸೆರೆ ದೌರ್ಜನ್ಯೊದ ಬಗೆಟ್ ಬಾರೀ ಬೆಸರ್‌ಡ್ ಈ ಓಲೆ ಬರೆಯೊಂದುಲ್ಲ. ಎಂಕ್ಲ ನವೆಂಬರ್ 8ದಾನಿ ಎಂಕ್ಲೆನ ಸೊಸೈಟಿಡ್ ಏರೆಗ್ಲಾ ಉಪದ್ರ ಆವಂದಿಲೆಕ ಶಾಂತಿಯುತವಾದ್ ದೀಪಾವಳಿ ಕರಿತ್‌ದ. ಆಂಡ ನವೆಂಬರ್ 10ತಾನಿ ಪೊಲೀಸ್ ಸಿಬ್ಬಂದಿ ಎಂಕ್ಲೆನ ಅದೆಕ್ ಪೊಗ್ಗುದು, ಬೇತೆಕ್ಲೆನ ಎದುರುಡೇ ಎಂಕ್ಲೆಗ್ ಆಕ್‌ದ್ ಸ್ಟೇಷನ್‌ಗ್ ಒಯ್ತೊಂದು ಪೋತೆರ್. ಕಾಂಡೆ 11 ರ್ದ್ ರಾತ್ರೆ 8 ಮುಟ್ಟ ಅಲ್ಪನೇ ಕುಲ್ಲಾದ್ ಎಂಕ್ಲೆನ ಮಿತ್ತ್ ಎಫ್‌ಐಆರ್ ಪಾಡ್ದೆರ್. ಎಫ್‌ಐಆರ್‌‌ಡ್ ಇಪ್ಪುನ ಅಂಶೊಲೆನ ಬಗೆಟ್ ಎಂಕ್ಲೆಗ್ ಬಾರೀ ಅನುಮಾನ ಉಂಡು. ಎಂಜಿನಿಯರಿಂಗ್ ಪರೀಕ್ಷೆದ ಪೊರ್ತುಡು ಏರಾ ಮಲ್ದಿನ ತಪ್ಪುಗು ಎಂಕ್ಲೆನ ಮಿತ್ತ್ ಕೇಸ್ ಪಾಡ್ದಿನ ಎಂಕ್ಲೆಗ್ ಪೋಡಿಗೆ ಉಂಡು ಮಲ್ದ್ಂಡ್. ದಯದೀದ್ ಈರ್ ನಡುಕು ಬತ್ತ್‌ದ್ ಎಂಕ್ಲೆಗ್ ನ್ಯಾಯ ಒದಗಾಲೆ” ಪನ್ದ್ ವಿದ್ಯಾರ್ಥಿಲು ಬಿನ್ನೈತೊಂದೆರ್

ವಿವಾದ ದಾದ?
ಪರ್ಬದಾನಿ ರಾತ್ರೆ ಮಣಿಪಾಲದ ಸಾರ್ವಜನಿಕ ಸಾದಿಲೆಡ್ ಕೆಲ ಕೆಂಗುಡೆರ್ ಸಾರ್ವಜನಿಕೆರ್ ಬೊಕ್ಕ ಪೊಲೀಸರೆ ಮಿತ್ತ್ ಪಟಾಕಿ ದಕ್ಕ್‌ದ್ ಮರ್ಲ್ ಕಟ್ಟ್‌ದೆರ್. ಈ ದೃಶ್ಯೊಲು ಸಾಮಾಜಿಕ ಬಲೆತ್ತಾನೊಡು ವೈರಲ್ ಆಯಿ ಬೆರಿಟೇ ಲಕ್ಕೊಂಡಿನ ಮಣಿಪಾಲ ಪೊಲೀಸೆರ್ 20 ಜನ ವಿದ್ಯಾರ್ಥಿಲೆನ ಮಿತ್ತ್ ಪ್ರಕರಣ ದಾಕಲ್ತ್‌ದೆರ್. ಆಂಡ, ನಿಜವಾದ್ ಮರ್ಲ್ ಕಟ್ಟಿನಕಲೆನ್ ಬುಡ್ದು, ಪ್ಲಾಟ್‌ದ ಅಮಾಯಕ ವಿದ್ಯಾರ್ಥಿಲೆನ್ ಕೈದ್ ಮಲ್ತ್‌ದ್ ದೌರ್ಜನ್ಯ ಮಲ್ದೆರ್ ಪನ್ಪಿ ಗಾತಿದ ಆರೋಪ ಇತ್ತೆ ಕೇನ್ದ್ ಬರೊಂದುಂಡು. ಇತ್ತೆ ಈ ಪ್ರಕರಣೊಗು ಸಂಬಂಧಿತ್‌ದ್ ವಿದ್ಯಾರ್ಥಿಲು ಸಿಎಂಗ್ ಬಿನ್ನಪು ಮಲ್ತೊಂದೆರ್.

Leave a Reply

Your email address will not be published. Required fields are marked *

Share
error: Content is protected !!