Last updated on March 19th, 2024 at 03:44 pm
ಬಂಟ್ವಾಳ: ನೇತ್ರಾವತಿ ಸುದೆಕ್ ಬೂರ್ದ್ ಮಂಜೊಟ್ಟಿದ ಜವನೆ ಒರಿ ತೀರ್ದಿನ ನಡಕೆ ಸೋಮವಾರ ಬಯ್ಯಡ್ ಶಂಭೂರುದ ಸುಬ್ರಹ್ಮಣ್ಯ ದೇವಲ್ಯೊದಲ್ಪ ನಡತ್‌ದ್ಂಡ್.
ಬೊಲ್ತೇರ್ ತಾಲೂಕ್‌ದ ನಡ ಗ್ರಾಮೊದ ಮಂಜೊಟ್ಟಿ ನಿವಾಸಿ ಲೋಹಿತ್(ಲೋಹಿತಾಕ್ಷೆ) (28) ತೀರ್ದಿನ ಜವನೆ. ಪಾಸಾಡಿಲಾಯಿನ ವಿನ್ಸೆಂಟ್, ಮ್ಯಾಕ್ಸಿಂ, ಪ್ರಮೋದ್, ದಯಾನಂದ ಮೊಕಲೆನೊಟ್ಟುಗು ಕಾರ್‌ಡ್ ಶಂಭೂರ್‌ಗ್ ಪೋದಿತ್ತ್‌ದ್ ಮಾತೆರ್ಲಾ ಮೀಯೆರ ಸುದೆಕ್ ಜತ್ತ್ಂಡಲಾ ಲೋಹಿತಾಕ್ಷೆ ಕರೆಟ್ ಕುಲ್ದಿತ್ತೆರ್. ಆಂಡ ದೋಸ್ತಿಲು ಮೀದ್ ಪಿರಬನ್ನಗ ಆರ್ ನೀರ್‌ಗ್ ಬೂರ್ದಿತ್ತೆರ್. ಆರೆನ ತರೆತ ಪಿರವು ಮೆಯಿಟ್ ಗಡಿಯಾದಿತ್ತ್‌ದ್ ಕರೆಟ್ ಕುಲ್ದಿತ್ತಿನಾರೆನ ಆರೋಗ್ಯೊಡು ದಾಲ ಎಚ್ಚಿಕಮ್ಮಿ ಆದ್ ತರೆ ತಿರ್ಗ್‌ದ್ ಬೂರ್ದಿಪ್ಪೊಡು ಅತ್ತ್ಈಡ ಸುದೆಟ್ ನಡತೊಂದು ಪೋನಗ ಕಲ್ಲ್ ಜಾರ್ದ್ ಬೂರ್ದುಪ್ಪೊಡು ಪಂದ್ ಅಂದಾಜಿ ಮಲ್ತೊಂದುಲ್ಲೆರ್. ಆಂಡ ಕೈಟ್ ಕಟೊಂದಿನ ವಾಚ್, ಪಾಡೊಂದಿತ್ತಿನ ಕುಂಟುನು ಮಾಪಂದೆ ಮೀಯೆರೆ ಸುದೆಕ್ ಜತ್ತ್‌ದುವಯೆರ್ ಪಂದ್ ಪಾತೆರ ಕೇಂದ್ ಬರೊಂದುಂಡು. ಲೋಹಿತಾಕ್ಷೆರ್ ಎಲೆಕ್ಟಿಕಲ್ ಕಂತ್ರಾಟ್ ಬೇಲೆಗ್ ಪೋವೊಂದಿತ್ತೆರ್. ಸೋಮವಾರ ಬೇಲೆಗ್ ರಜೆ ಇತ್ತಿನೆರ್ದಾವರ ಶಂಭೂರ್‌ದ ದೋಸ್ತಿನ ಬಿನ್ನೆರೆ ಇಲ್ಲಗ್ ಪೋದು, ಅಲ್ಪರ್ದ್ ನೇತ್ರಾವತಿ ಸುದೆಕ್ ಮೀಮೆರೆ ಪೋತೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಬಂಟ್ವಾಳ ಗ್ರಾಮಾಂತರ ಪೊಲೀಸೆರ್ ಜಾಗೆಗ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್ ಲೋಹಿತಾಕ್ಷೆರ್ ಇಲ್ಲದ ಅಧಾರ ಕುಂದ ಆದಿತ್ತ್‌ದ್ ಒಂಜಿ ವರ್ಸೊದ ಪಿರವು ಮದಿಮೆ ಆದಿತ್ತ್ಂಡ್. ನಡಟ್ ಅಪ್ಪೆ ಬೊಕ್ಕ ಬೊಡೆದಿನೊಟ್ಟುಗು ಇತ್ತೆರ್. ಬೇತೆ ಬೇತೆ ಸಂಘಟನೆಲೆಡ್ ಇತ್ತಿನ ಮೇರ್ ಮಾತೆರೆಡ ಬಾರಿ ಆತ್ಮೀಯತೆಡ್ ಇಪ್ಪೆದೆರ್.