Last updated on June 28th, 2025 at 12:07 pm
ದಾವಣಗೆರೆ, ಜೂ. 28: ಮದಿಮೆ ಆತಿನ ರಡ್ಡೇ ತಿಂಗೊಲುಗು ಮರ್ಮಯೆ ತನ್ನ ಮಾಮಿನೊಟ್ಟುಗು ಬಲ್ತಿನ ನಡಕೆ ದಾವಣಗೆರೆ ಜಿಲ್ಲೆದ ಚನ್ನಗಿರಿ ತಾಲೂಕ್ದ ಮುದ್ದೇನಹಳ್ಳಿ ಗ್ರಾಮೊಡು ನಡತ್ದ್ಂಡ್. 48 ವರ್ಸ ಪ್ರಾಯೊದ ಮಾಮಿನೊಟ್ಟುಗು 25 ವರ್ಸ ಪ್ರಾಯೊದ ಮರ್ಮಯೆ ಎಸ್ಕೇಪ್ ಆತೆ. ಮರ್ಮಯೆ ಚನ್ನಗಿರಿ ತಾಲೂಕ್ದ ಮರವಂಜಿ ಗ್ರಾಮೊದಕುಲು ಪನ್ದ್ ತೆರಿದ್ ಬೈದ್ಂಡ್. ಮೇ 2ತಾನಿ ಚನ್ನಗಿರಿ ಬಸ್ ಉಂತಡೆಡ್ ಬೊಡೆದಿನ್ ಬುಡ್ದು ಮಾಮಿನ ಒಟ್ಟುಗು ಎಸ್ಕೇಪ್ ಆತೆ.
ಮರ್ಮಯೆ ಗಣೇಶ್ (25 ವರ್ಸ) ಬೊಕ್ಕ ಮಾಮಿ ಶಾಂತಾ (48 ವರ್ಸ) ಬಲ್ತ್ ಪೋದಿತ್ತ್ದ್ ಇರ್ವೆರ್ಲಾ ಕಾಣೆ ಆತಿವ ಬಗೆಟ್ ಚನ್ನಗಿರಿ ಪೊಲೀಸ್ ಸ್ಟೇಶನ್ಡ್ ಬೇತೆ ಬೇತೆ ಒಯಿಲ್ಲ್ ದಾಕಲಾತ. ಹೇಮಾವತಿ ಪನ್ಪಿನಾರ್ ತನ್ನ ಕಂಡನೆ ಗಣೇಶ್, ತನನ್ ಉಂತಡೆದ ಕೈತಲ್ ಉಂತಾದ್, ಮುಲ್ಪನೇ ಮುಟ್ಟ ಪೋದು ಬರ್ಪೆ ಪನ್ದ್ ಪೋದು ನನಲಾ ಬೈದಿಜೆ ಪನ್ದ್ ಒಯಿಲ್ ಕೊರ್ದಿತ್ತಲ್ನ್ಡ, ಶಾಂತಾನ ಸಂಬಂಧಿ ಪೂಜಾ ಪನ್ಪಿನಾರ್ ಅವ್ವೇ ದಿನ ತನ್ನ ಸಂಬಂಧಿ ಶಾಂತಾ ಕಾಣೆ ಆತೆರ್ ಪನ್ದ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.
ಶಾಂತಾ ಮುದ್ದೇನಹಳ್ಳಿ ಗ್ರಾಮೊದ ನಾಗರಾಜ್ ಪನ್ಪಿನಾರೆನ ರಡ್ಡನೇ ಬೊಡೆದಿ. 13 ವರ್ಸೊಗು ದುಂಬು ಮುದ್ದೇನಹಳ್ಳಿ ನಾಗರಾಜ್ ಪನ್ಪಿನಾರೆನ 2ನೇ ಬೊಡೆದಿ ಆದ್ ಶಾಂತಾ ಇಲ್ಲಗ್ ಬತ್ತಿತ್ತೆರ್. ನಾಗರಾಜ್ರೆನ ಸುರುತ ಬೊಡೆದಿಗ್ ಇರ್ವೆರ್ ಪೊಣ್ಣು ಜೋಕುಲು, ಒರಿ ಮಗೆ. ನಾಗರಾಜ್ನ ಒಟ್ಟುಗು ಮಲ್ಲ ಮಗಲ್ ಹೇಮಾ ಇತ್ತೆರ್. ರಡ್ಡ್ ವರ್ಸೊಗು ದುಂಬು ಗಣೇಶನ್ ಇಲ್ಲಗ್ ಲೆತೊಂದು ಬತ್ತಿತ್ತಿನ ಶಾಂತಾ, ಮಗಲೆನ್ ಮದಿಮೆ ಮಲ್ತ್ ಕೊರ್ಕ, ಇಲ್ಲ ಮರ್ಮಯೆ ಆದ್ ಇಪ್ಪುವೆ ಪನ್ದ್ ನಂಬಾದಿತ್ತಲ್. ರಡ್ಡ್ ತಿಂಗೊಲುಗು ದುಂಬು ಗೌಜಿಡ್ ಗಣೇಶಗ್ ಮಲ್ಲ ಮಗಲ್ ಹೇಮಾನ್ ನಾಗರಾಜ್ ಮದಿಮೆ ಮಲ್ತ್ ಕೊರ್ತೆರ್.
ಮದಿಮೆ ಮಲ್ತ್ ಕೊರ್ತಿನ 15ನೇ ದಿನೊಕು ಗಣೇಶ್ಗ್ ತನ್ನ ಮಾಮಿ ಶಾಂತಾಡ ಅಕ್ರಮ ಸಂಬಂಧ ಇತ್ತಿನವು ಬೊಲ್ಪುಗು ಬೈದ್ಂಡ್. ಗಣೇಶನ ಮೊಬೈಲ್ಡ್ ಶಾಂತಾ ಕಡಪುಡ್ದಿನ ಅಶ್ಲೀಲ ಮೆಸೇಜ್ಲೆನ್ ಹೇಮಾ ತೂತಲ್. ಅಪಗನೇ ಮೆಸೇಜ್ಲೆನ್ ತನ್ನ ಅಮ್ಮೆ ನಾಗರಾಜ್ಗ್ ಹೇಮಾ ಫಾರ್ವರ್ಡ್ ಮಲ್ತಿತ್ತಲ್. ವಿಚಾರ ತೆರಿಯೊಂದಿತ್ತಿ ಲೆಕನೆ ಕಾಸ್-ಬಂಗಾರ್ ಕಂಡ್ದ್ ಶಾಂತಾ ಮರ್ಮಯನ ಒಟ್ಟುಗು ಎಸ್ಕೇಪ್ ಆತಲ್. ಬೊಡೆದಿ ಹೇಮಾನ್ ಬಸ್ ಉಂತಡೆಡೇ ಬುಡ್ದು ಗಣೇಶ್ ಎಸ್ಕೇಪ್ ಆದಿತ್ತ್ದ್, ಚನ್ನಗಿರಿ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.