Last updated on June 28th, 2025 at 03:53 pm
ಕುಡ್ಲ, ಜೂ. 28 : ಕೋಟಿಗಟ್ಲೆ ರೂಪಾಯಿ ಬಿಲೆತ ಕಾರ್ದ ಮೌಲ್ಯ ಕಮ್ಮಿ ಮಲ್ತ್ದ್ ಸರ್ಕಾರೊಗು ತೆರಿಗೆಡ್ ದಗೆ ಮಲ್ದಿನ ಆರೋಪಡ್ ಕುಡ್ಲ ಸಾರಿಗೆ ಇಲಾಖೆದ ಮೂವೆರ್ ಸಿಬ್ಬಂದಿಲೆನ್ ಸಸ್ಪೆಂಡ್ ಮಲ್ತ್ದ್ ಬೆಂಗಳೂರ್ದ ಸಾರಿಗೆ ಬೊಕ್ಕ ಶಿಸ್ತು ಪ್ರಾಧಿಕಾರೊದ ಆಯುಕ್ತೆರ್ ಆದೇಶ ಕೊರ್ತೆರ್.
ಕುಡ್ಲ ಆರ್ಟಿಒ ಪ್ರಥಮ ದರ್ಜೆ ಸಹಾಯಕೆ ನೀಲಪ್ಪ ಎಚ್., ಕಚೇರಿ ಅಧೀಕ್ಷಕಿ ರೇಖಾ ನಾಯಕ್, ಕೇಂದ್ರ ಸ್ಥಾನೀಯ ಸಹಾಯಕಿ ಸರಸ್ವತಿನ್ ಸಸ್ಪೆಂಡ್ ಮಲ್ದೆರ್.
ಕುಡ್ಲ ಆರ್ಟಿಒ ಕಚೇರಿಡ್ 1,96,95,000 ರೂಪಾಯಿದ ಐಷಾರಾಮಿ ಕಾರ್ನ್ 32,15,000 ರೂ. ಮೌಲ್ಯೊಗು ಕಲ್ವ ದಾಖಲೆ ಉಂಡು ಮಲ್ತ್ದ್ ರೆಜಿಸ್ಟರ್ ಮಲ್ತಿತ್ತೆರ್. ಅಂಚಾದ್ ಬೆಂಗಳೂರ್ದ ಸಾರಿಗೆ ಬೊಕ್ಕ ರೋಡ್ ಸೇಫ್ಟಿ ಆಯುಕ್ತೆರೆ ಕಚೇರಿದ ಅಪರ ಸಾರಿಗೆ ಆಯುಕ್ತೆರ್ ಬತ್ತ್ದ್ ಜಡ್ತೆ ಮಲ್ತಿತ್ತೆರ್. ಈ ಪೊರ್ತುಡು ಮೂವೆರ್ ಕರ್ತವ್ಯ ಲೋಪ ಮಲ್ದಿನ ತೆರಿದ್ ಬತ್ತಿನೆರ್ದಾವರ, ಮೂವೆರೆ ಮಿತ್ತ್ ಇಲಾಖಾ ವಿಚಾರಣೆನ್ ಮಲ್ಪರೆ ಸೇವೆರ್ದ್ ಸಸ್ಪೆಂಡ್ ಮಲ್ದೆರ್.
ರೆಜಿಸ್ಟ್ರೇಶನ್ಗ್ ಅರ್ಜಿ ಪಾಡಿನ ಪೊರ್ತುಡು ನೀಲಪ್ಪೆರ್ ಇತ್ತಿನ ರೇಟ್ದ ಪಗತೆಗ್ ಕಮ್ಮಿ ರೇಟ್ ಪಾಡ್ದಿತ್ತೆರ್. ಆ ಅರ್ಜಿನ್ ರೇಖಾ ನಾಯಕ್ ಪರಿಶೀಲನೆ ಮಲ್ತಿತ್ತೆರ್. ಬೊಕ್ಕ ಸರಸ್ವತಿ ಈ ಅರ್ಜಿನ್ ಅನುಮೋದನೆ ಮಲ್ದಿನ ಆರೋಪಡ್ ಉಲ್ಲೆರ್. ಕುಡ್ಲ ಆರ್ಟಿಒ ಕಚೇರಿಗ್ ಶಿವಮೊಗ್ಗ ಉಪ ಆಯುಕ್ತೆರ್ ಬತ್ತ್ದ್ ಜಡ್ತೆ ಮಲ್ದೆರ್
ಸಸ್ಪೆಂಡ್ ಆತಿನ ಈ ಮೂವೆರೆಡ್, ನೀಲಪ್ಪ ಕೆ.ಎಚ್ ಮೆರೆನ್ ಶಿವಮೊಗ್ಗಗ್, ರೇಖಾ ನಾಯಕ್ ಮೆರೆನ್ ಎಲ್ಯಮಗಲ್ನೂರ್ಗ್ ಬೊಕ್ಕ ಸರಸ್ವತಿ ಮೆರೆನ್ ಬಡಕಾಯಿ ಬೆಂಗಳೂರು ಕಚೇರಿಗ್ ಟ್ರಾನ್ಸ್ಫರ್ ಮಲ್ತ್ದೆರ್.