Last updated on July 11th, 2025 at 12:22 pm
ಕಡಬ, ಜು. 11: ಜೋರು ಜ್ವರ ಪನ್ದ್ ಆಸ್ಪತ್ರೆಗ್ ಮರ್ದ್ಗ್ ಬತ್ತಿನ ಶಾಲೆ ಕಲ್ಪುನ ಪೊಣ್ಣಗ್ ವೈದ್ಯಾಧಿಕಾರಿ ಒರಿ ಆಲ್ ಬಂಜಿನಾಲ್ ಪನ್ದ್ ರಿಪೋರ್ಟ್ ಕೊರ್ದು ಮಲ್ಲ ಕುರ್ತೆಲ್ ಬೇಲೆ ಮಲ್ದಿನ ನಡಕೆ ಕಡಬ ತಾಲೂಕ್ದ ಪಂಜಡ್ ನಡತ್ದ್ಂಡ್.
ವೈದ್ಯಾಧಿಕಾರಿ ಈ ವಿಚಾರೊನು ಆಶಾ ಕಾರ್ಯಕರ್ತೆದಿನಕ್ಲೆಡ, ಆಸ್ಪತ್ರೆದ ಸಿಬ್ಬಂದಿಲೆಡ, ಅಂಚೆನೇ ಬೇತೆಕ್ಲೆಡಲಾ ಪನ್ದಿತ್ತ್ದ್, ಈ ಸುಳ್ಳು ಒಲವು ಸಾರ್ವಜನಿಕವಾದ್ ಪರಡ್ದ್ ಎಂಕ್ಲೆನ ಕುಟುಮೊಗು ಮಾನಸಿಕವಾದ್ ಬಾರೀ ಬೇನೆ ಉಂಡು ಮಲ್ದ್ಂಡ್. ಎನ್ನ ಮಗಲ್ ಶಾಲೆಗ್ ಪೋಯೆರ ಕೇನೊಂದಿಜ್ಜಲ್ ಪನ್ದ್ ಜಿಲ್ಲಾ ಆರೋಗ್ಯಾಧಿಕಾರಿಡ ಪೊಣ್ಣನ ಅಪ್ಪೆಅಮ್ಮೆ ದಾಕಲೆದ ಒಟ್ಟುಗು ಒಯಿಲ್ ಬರೆಪಾದೆರ್.
ಶಾಲೆದ ಜೋಕುಲು, ಟೀಚರ್ನಕುಲು, ಊರುದಕುಲು ಈ ಬಗೆಟೇ ಪಾತೆರ್ದ್ ಪಾತೆರ್ದ್ ಪೊಣ್ಣನ ಮಾನಹಾನಿ ಮಲ್ತೊಂದುಲ್ಲೆರ್. ಅಪ್ರಾಪ್ತ ಪೊಣ್ಣಗ್ ವೈದ್ಯಕೀಯ ಕಲು ಒಲವು ಕೊರ್ತಿನ ಅಂಚೆನೇ ಆಲೆನ ಪ್ರೈವಸಿದ ವಿಷಯೊನು ಅನಧಿಕೃತವಾದ್ ಊರಿಡೀ ಪನ್ಡೊನ್ದು ಬೈದಿನವು POCSO Act ಬೊಕ್ಕ ಐಪಿಸಿ ಸೆಕ್ಷನ್ದ ಅಡಿಟ್ ಮಾಮಲ್ಲ ಅಪರಾಧ ಆಪುಂಡು. ಬಾಲೆದ ಜೂವನೊಡು ಗೊಬ್ಬಿನ ಆ ವೈದ್ಯಾಧಿಕಾರಿನ ಮಿತ್ತ್ ಬೋಡಾಪಿನ ಕ್ರಮ ಗೆತೊನೊಡು ಪನ್ದ್ ಪೊಣ್ಣನ ಅಮ್ಮೆ ಒಯಿಲ್ಡ್ ಬರೆತೆರ್. ಪಂಜ ಪ್ರಾಥಮಿಕ ಆರೋಗ್ಯ ಕೇಂದ್ರೊದ ವೈದ್ಯಾಧಿಕಾರಿನ ಮಿತ್ತ್ ದಲಿತ ದೌರ್ಜನ್ಯ ಪ್ರಕರಣೊದ ಅಡಿಟ್ಲಾ ಕೇಸ್ ಪಾಡ್ಯೆರ ಒಯಿಲ್ಡ್ ಬರೆತೆರ್.
ನಡಕೆದ ಒಲವು
ಕಡಬ ತಾಲೂಕ್ಗ್ ಸೇರ್ದಿನ ಒಂಜಿ ಗ್ರಾಮೊದ 13 ವರ್ಸ ಪ್ರಾಯೊದ ಪೊಣ್ಣಗ್ ಜೋರು ಜ್ವರ ಇತ್ತಿನೆರ್ದಾವರ ಆಲೆನ ಅಪ್ಪೆಅಮ್ಮೆ ಜುಲೈ 1 ತಾನಿ ಪಂಜದ ಪ್ರಾಥಮಿಕ ಆರೋಗ್ಯ ಕೇಂದ್ರೊಗು ಲೆತಬತ್ತಿತ್ತೆರ್. ಅಲ್ಪದ ವೈದ್ಯಾಧಿಕಾರಿ ಡಾ. ಮಂಜುನಾಥ್ ಪೊಣ್ಣನ ಚೆಕಪ್ ಮಲ್ತ್ದ್, ಪಡಿಕೆ-ನೆತ್ತೆರ್ ಪರೀಕ್ಷೆಗ್ ಲ್ಯಾಬ್ ಸ್ಲಿಪ್ ಕೊರ್ತೆರ್.
ಚೆಕಪ್ ಆಯಿನೇ ಔಟ್ ಪೇಷೆಂಟ್ ರಿಜಿಸ್ಟ್ರೇಷನ್ಡ್ UPT Positive (ಬಂಜಿನಾಲ್) ಪನ್ದ್ ಬರೆದ್, ನನಲಾತ್ ಚೆಕಪ್ಗ್ ಸುಳ್ಯದ ಸರಕಾರಿ ಆಸ್ಪತ್ರೆಗ್ ರೆಫರ್ ಮಲ್ತ್ದೆರ್.
ಈ ವರದಿರ್ದಾವರ ಬಾನೊನೇ ತರೆಕ್ ಬೂರಿಲೆಕಾಯಿನ ಅಪ್ಪೆಅಮ್ಮೆ ಪ್ರೈವೇಟ್ ಆಸ್ಪತ್ರೆಗ್ ಪೋದು ಚೆಕಪ್ ಮಲ್ಪಾನಗ ಬಂಜಿನಾಲ್ ಅತ್ತ್ ಪನ್ದ್ ರಿಪೋರ್ಟ್ ಬೈದ್ಂಡ್. ಸುಳ್ಯ ಸರ್ಕಾರಿ ಆಸ್ಪತ್ರೆಗ್ಲಾ ಲೆತೊಂದು ಪೋದು ಪರೀಕ್ಷೆ ಮಲ್ಪುನಗ ಅಲ್ಪಲಾ ಬಂಜಿ ಬೈದಿನ ಬಗೆಟ್ ದಾಲಾ ಪನ್ತಿಜೆರ್.
ಕಲು ಒಲವುದ ಒಯಿಲ್ದ ಬೆರಿಟೇ ಪರಿಶೀಲನೆಗ್ ಬತ್ತಿನ ಅಧಿಕಾರಿಲು
ಈ ಒಯಿಲ್ದ ಗಾತಿನ್ ತೆರಿನ ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಅಧಿಕಾರಿ ಡಾ. ಎಚ್. ಆರ್. ತಿಮ್ಮಯ್ಯೆರ್ ಜಡ್ತೆಗ್ ಕೂಟ ಉಂಡುಮಲ್ತ್ದ್, ಪಂಜಗ್ ಕಡಪುಡುದ್, ಜುಲೈ 10ತಾನಿ ಮಾತ ಒಲವು ಒಟ್ಟು ಮಲ್ದೆರ್.
ಕೂಲಿ ಬೇಲೆ ಮಲ್ತ್ ಇಲ್ಲ್ಬಾಲೆ ಸಾಂಕುನ ಪೊಣ್ಣನ ಅಮ್ಮಗ್ ವೈದ್ಯಾಧಿಕಾರಿನ ವರದಿ ತೂದು ಬಾನೊನೇ ತರೆಕ್ ಬೂರಿಲೆಕಾತ್ಂಡ್. ಸಕಾಯೊಗು ಬೋಡಾದ್ ಕಡಬದ ಭೀಮ್ ಆರ್ಮಿ ಸಂಘಟನೆಗ್ ವಿಷಯ ತೆರಿಪಾದೆರ್. ಸಂಘಟನೆದಕುಲು ಅಮ್ಮಗ್ ಧೈರ್ಯ ಪನ್ಡ್ದ್ ಬೆರಿಕ್ ಉಂತುದ್ ಬೋಡಾಪಿನ ಒಲವು ಕೊರ್ದು ಒಯಿಲ್ ಬರೆಪಾದೆರ್. ಈ ಬಗೆಟ್ ಒವ್ವೇ ಕ್ರಮ ಗೆತೊಂಜಿಂಡ ಪೊರ್ಮ್ಬಾಟದ ಸಾದಿ ಪತ್ತೊಡಾಪುಂಡು ಪನ್ದ್ ಸಂಘಟನೆದ ಜಿಲ್ಲಾ ಒತ್ತುಗುರ್ಕಾರೆ ರಾಘವ ಕಳಾರ ಮೇರ್ ಎಚ್ಚರ್ಗೆ ಕೊರ್ತೆರ್.