Last updated on September 10th, 2025 at 12:49 pm
ಕುಡ್ಲ : ಸೆ. 10: ಕುಡ್ಲದ ಫೆರಾರ್ದ ಆಶ್ನಾ ಜುವೆಲ್ ಡಿಸೋಜಾ, ಶನಿವಾರ ಬೆಂಗಳೂರ್ದ ದಿ ಕಿಂಗ್ಸ್ ಮೀಡೋಸ್ನಾಡ್ ನಡತಿನ ಗೌಜಿದ ಅಕೇರಿದ ಪಂತೊಡು ಮಿಸ್ ಇಂಡಿಯಾ ಆಸ್ಟ್ರಲ್ 2025 ಆದ್ ಅಜತ್ ಬೈದೆರ್.
ದೇಶೊದ ಬೇತೆ ಬೇತೆ ಕಡೆರ್ದ್ ಬತ್ತಿತ್ತಿನ 45 ಸ್ಪರ್ಧಿಲೆನ ನಡುಟು ನಡತಿನ ಈ ಪಂತೊ, ಮಿಸ್ & ಮಿಸೆಸ್ ಇಂಡಿಯಾ ಆಸ್ಟ್ರಲ್ ಪೇಜೆಂಟ್ಸ್ದ 9ನೇ ಸೀಸನ್ ಆದಿತ್ತ್ಂಡ್. ಪುಗರ್ತೆದ ರಾಷ್ಟ್ರೀಯ ಕಿರೀಟೊದ ಒಟ್ಟುಗು, ಆಶ್ನಾ ಬೇತೆ ಟೈಟಲ್ಲೆನ್ಲಾ ಗೆಂದ್ದೆರ್. ಮಿಸ್ ಬೆಸ್ಟ್ ಟಾಲೆಂಟ್, ಮಿಸ್ ಬೆಸ್ಟ್ ಸ್ಟೇಜ್ ಪ್ರೆಸೆನ್ಸ್, ಅಂಚೆನೇ ಮಿಸ್ ಬೆಸ್ಟ್ ವಾಕ್ ಪ್ರಶಸ್ತಿಲು ಆರೆನ್ ಈ ಪಂತೊಡು ಗೆಂದುಲೆಕ ಮಲ್ತ್ಂಡ್. ಈ ಸಾದಗೊದೊಟ್ಟುಗು, ಆಶ್ನಾ ಮಿಸ್ ಯೂನಿವರ್ಸ್ ಸೆಲೆಸ್ಟಿಯಲ್ ಇಂಡಿಯಾ 2026 ಪನ್ಪಿನ ಪುಗರ್ತೆದ ಮಾನಾದಿಗೆನ್ಲಾ ಗೆಂದ್ದೆರ್.
ಈ ಮುಕೇನ ಆರ್ ಬರ್ಪಿನ ಮಿಸ್ ಯೂನಿವರ್ಸ್ ಸೆಲೆಸ್ಟಿಯಲ್ ಇಂಟರ್ನ್ಯಾಷನಲ್ ಪಂತೊಡು ಭಾರತೊನು ಪ್ರತಿನಿಧಿಪುವೆರ್. ಮಿಸ್ & ಮಿಸೆಸ್ ಇಂಡಿಯಾ ಆಸ್ಟ್ರಲ್ ಪೇಜೆಂಟ್ಸ್ ಅಟ್ಟನೆ ಮಲ್ತಿತ್ತಿನ ಈ ಪಂತೊದ ಗರ್ದ್ ಬೊಕ್ಕ ಎಡ್ಡೆ ಮ್ಯಾನೇಜ್ಮೆಂಟ್ನ್ ಮಾತಾ ಪುಗರೊಂದಿತ್ತೆರ್. ಆಶ್ನಾ ಮೆರೆಗ್ ‘ಪಾತ್ವೇ ಮಾಡೆಲಿಂಗ್ ಅಕಾಡೆಮಿ’ ಗೈಡೆನ್ಸ್ ಕೊರ್ದಿತ್ತ್ಂಡ್.
ಗೆಂದಿಬೊಕ್ಕ ಪಾತೆರ್ನ ಆಶ್ನಾ ತನ್ನ ಭಾವನೆಲೆನ್ ಪಟ್ಟೊಂದು, “ಭಾರತೊದ ಪುದರ್ನ್ ಪೆರ್ಮೆ, ಪೊಲ್ಸು ಬೊಕ್ಕ ಸಮರ್ಪಣೆದೊಟ್ಟುಗು ವಿಶ್ವ ಮಿತ್ತರ್ಮೆದ ಮಿತ್ತ್ ಪ್ರತಿನಿಧಿಪುನ ಸಂದರಪ್ಪು ಎಂಕ್ ತಿಕ್ಕ್ದಿನವು ಬಾರೀ ಕುಸಿತ ಸಂಗತಿ. ಈ ಜಬದರಿನ್ ಪೂರ್ಣ ಶ್ರದ್ಧೆಡ್ ತೂವೊನುವೆ,” ಪನ್ದ್ ಪನ್ಡೆರ್. ಆರೆನ ಈ ಗೆಲ್ಮೆ ರಾಷ್ಟ್ರೀಯ ಮಟ್ಟೊಡು ತುಳುನಾಡ್ಗ್ ಪೆರ್ಮೆ ಕನತಿತ್ತ್ದ್, ಬರ್ಪಿನ ಮಿಸ್ ಯೂನಿವರ್ಸ್ ಸೆಲೆಸ್ಟಿಯಲ್ 2026ಡ್ ಪಾಲ್ಪಡೆಪಿನ ಆರೆಗ್ ತುಳುಸಮಾಚಾರ ಎಡ್ಡೆಪು ಬಯಕುಂಡು.