Last updated on September 5th, 2025 at 10:49 am
ಉಳ್ಳಾಲ, ಸೆ. 05: ಕೋಡೆ ರಾತ್ರೆ ಕೋಟೆಕಾರ್ ಬೀರಿ ಎಟಿಎಂಡ್ ಕಾಸ್ ಕನ್ಡೆರೆ ತೂವೊಂದಿತ್ತಿನ ಆಂಜೊವುನು ದೆಲ್ಲಿದ ಸೆಕ್ಯೂರಿಟಿ ಸಿಸ್ಟಮ್ದ ಅಲರ್ಟ್ದ ಸಕಾಯೊಡು ಉಳ್ಳಾಲ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕೊಪ್ಪಳ ಜಿಲ್ಲೆದ ಕುಷ್ಟಗಿದ ನಾಗಪ್ಪ ಕೇರಳಟ್ಟಿ (41) ಪನ್ಪಿನಾಯೆ ಪುಲ್ಯ ಸುಮಾರ್ 3 ಗಂಟೆದ ಅಂದಾಜಿಗ್ ಎಸ್ಬಿಐ ಎಟಿಎಂಡ್ ಇತ್ತಿನ ಕ್ಯಾಶ್ ಬಾಕ್ಸ್ ಪುಡಪೆರ ಪುನೆಯೊಂದುಪ್ಪುನಗ ಪೊಲೀಸೆರ್ ರೆಡ್ ಹ್ಯಾಂಡ್ ಆದ್ ಪತ್ತ್ದೆರ್.
ಪೊಲೀಸೆರೆ ಪ್ರಕಾರ, ನಾಗಪ್ಪೆ ಸುಮಾರ್ 2:30 ತ ಅಂದಾಜಿಗ್ ಎಟಿಎಂ ದ ಉಲಯಿ ಪೊಗ್ಗುದ್, ತಾನ್ ಕನತಿತ್ತಿನ ಪನೆಕುಲೆನ್ ಗಲಸ್ದ್ ಕ್ಯಾಶ್ ಬಾಕ್ಸ್ ಗ್ ಪುಡಪೆರ ತೂತೆ. ಬೇತೆ ಬೇತೆ ಎಟಿಎಂಲೆನ ಮಿತ್ತ್ ಕಣ್ಣ್ ದೀದುಪ್ಪುನ ದೆಲ್ಲಿದ ಸೆಕ್ಯೂರಿಟಿ ಸಿಸ್ಟಮ್ ಈ ಬಗೆಟ್ ಎಚ್ಚರ್ಗೆ ಕೊರ್ತುಂಡು.
ಬೊಕ್ಕ ಸೆಕ್ಯೂರಿಟಿ ಸಿಬ್ಬಂದಿ ರಂಜಿತ್ ಮೇರ್ ಬೀರಿ ಎಟಿಎಂ ತೂವೊನುನ ದೀಪಕ್ ಅಮಿನ್ ಮೆರೆಗ್ ಒಲವು ಕೊರ್ದಿತ್ತ್ದ್, ಆರ್ ಅಪಗನೇ 112 ಗ್ ಫೋನ್ ಮಲ್ತ್ದೆರ್. ಈ ಒಲವುನು 112 ಉಳ್ಳಾಲ ಪೊಲೀಸೆರೆಗ್ ಕಡಪುಡ್ದ್, ಅಕುಲು ತಾಪುರ್ತೋಪು ಜಾಗೆಗ್ ಬತ್ತ್ದ್ ಎಟಿಎಂದ ಉಲಯಿ ಆರೋಪಿನ್ ಪತ್ತ್ದೆರ್.